Astranaŭt Uiljam Anders zahinuŭ u avijakatastrofie va ŭzroście 90 hadoŭ, kirujučy samalotam
Spadar Anders zrabiŭ u 1968 hodzie samy viadomy zdymak Ziamli z kosmasa.
08.06.2024 / 08:24
Uiljam Anders. Fota: J.B. Spector/Museum of Science and Industry, Chicago/Getty Images
Amierykanski astranaŭt Uiljam Anders, jaki ablacieŭ Miesiac na kaśmičnym karabli «Apałon-8» u 1968 hodzie i zrabiŭ u kosmasie adnu z samych viadomych fatahrafij Ziamli, zahinuŭ va ŭzroście 90 hadoŭ, kirujučy lohkamatornym samalotam, piša Bi-bi-si.
Jaho samalot upaŭ u vadu na poŭnač ad Sietła ŭ štacie Vašynhton. Syn Andersa Hreh paćvierdziŭ, što jaho baćka kiravaŭ nievialikim samalotam i što jaho cieła było vyjaŭlena ŭ piatnicu dniom.
«Naša siamja spustošana. Jon byŭ vydatnym piłotam. Nam jaho budzie nie chapać», — havorycca ŭ zajavie siamji.
U 1968 hodzie Anders byŭ piłotam miesiacavaha modula misii «Apałon-8» — pieršaha kaśmičnaha karabla z ekipažam, jaki dasiahnuŭ Miesiaca. Jon staŭ aŭtaram kultavaj fatahrafii «uzychod Ziamli» — adnaho z samych znakamitych fatazdymkaŭ našaj płaniety z kosmasu.
Fota: William Anders/NASA via AP, File
Zdymak byŭ zrobleny napiaredadni Kaladaŭ. Na im Ziamla nad haryzontam pavierchni Miesiaca.
Paźniej Anders nazvaŭ heta fota svaim samym značnym układam u kaśmičnuju prahramu.
«My prarabili ŭvieś hety šlach, kab daśledavać Miesiac, i samym važnym, što my adkryli, była Ziamla», — kazaŭ jon.
Mnohija ličać, što hety vobraz matyvavaŭ hłabalny ekałahičny ruch i pakłaŭ asnovu suśvietnaj akcyi «Dzień Ziamli».
Hety čałaviek staŭ pieršym u historyi kasmanaŭtam, jaki pravioŭ na arbicie bolš za 1000 sutak
Maryna Vasileŭskaja: Z kosmasu bačyła Biełaviežskuju pušču i Paleśsie
Minski płanietaryj šukaje mietearyt, jaki niadaŭna ŭpaŭ na Biełaruś