Як жыла жанчына пад Чавусамі, якую 20 гадоў лічылі памерлай?
Нядаўна пад Чавусамі знайшлі жанчыну, якую суд 20 гадоў прызнаў памерлай. Так выйшла, што яна засталася з пашпартам СССР і не атрымала беларускі.
30.06.2024 / 16:29
Галіна, якая 20 гадоў па паперах лічылася памерлай. Скрыншот відэа АНТ
Дэталі расказалі ў эфіры АНТ.
Галіна нарадзілася ў горадзе Бяроза (Брэсцкая вобласць). У 90-х яна двойчы трапляла ў калонію — за забойства, а пасля за крадзеж. Старыя савецкія дакументы пасля вызвалення яна не памяняла.
Са сваякоў у Галіны былі малодшая сястра і сын (але Галіну пазбавілі бацькоўскіх правоў). Жылі яны ў Бярозе. Сястра адмовілася пускаць Галіну ў кватэру. Пасля гэтага яны не камунікавалі.
Жанчына жыла ў розных месцах, пакуль не пасялілася ў вёсцы Пуцькі Чавускага раёна ў сваёй сяброўкі Алесі.
У 2004 годзе суд Бярозаўскага раёна абвясціў жанчыну памерлай і мясцовы ЗАГС выдаў пасведчанне аб яе смерці.
Некалькі месяцаў таму камісіяй па пажарнай бяспецы правяла праверку ў Алесі — там і адшукалася Галіна.
Суд ужо адмяніў рашэнне, якое прызнала жанчыну памерлай. Галіна можа атрымаць пашпарт і афіцыйна працаўладкавацца.
Сама жанчына лічыць, што гэта малодшая сястра прыдумала прызнаць яе памерлай, каб самой атрымаць спадчыну ад бацькоў, якіх ужо няма. Галіна хоча вярнуць сваю долю спадчыны і палепшыць адносіны з сынам.
Пад Чавусамі знайшлі жанчыну, якую 20 гадоў таму суд… абвясціў памерлай