U sacsietkach biełarusam aktyŭna prapanujuć kupić pravy. Jak pracuje machlarskaja schiema?
Biez zdačy ekzamienaŭ, biez naviedvańnia aŭtaškoły, u karotki termin — za hrošy ŭsiaho za paru dzion abiacajuć zrabić dakumienty z uniasieńniem u bazu DAI. Rekłama z prapanovaj kupić paśviedčańnie kiroŭcy prosta nie daje prachodu ŭ instahramie. Kab zrazumieć, jak pracuje hetaja schiema, vydańnie Tochka.by śpisałasia z takimi pradaŭcami, daviedałasia prajs i spytała ŭ MUS, što tam dumajuć z hetaj nahody.
01.07.2024 / 18:04
Fota: UDAI HUUS Minharvykankama / Telegram
Za hrošy — tak
Niekalki padazronych akaŭntaŭ u instahramie apošnim časam aktyŭna kruciać rekłamu — abiacajuć zrabić pravy za karotki termin. Lubaja katehoryja, biez ekzamienaŭ, 100%-naja harantyja. Pryčym zapeŭnivajuć, što heta budzie aryhinał.
Fota: Instagram
Usie, chto maderuje takija staronki ŭ sacsietkach, prapanujuć praciahnuć znosiny ŭ telehramie. Adzin z karystalnikaŭ pad nikam Maksim Uładzimiravič aktyŭna viadzie svoj akaŭnt: pościć fota zadavolenych klijentaŭ, jakija ź jaho dapamohaj atrymali pravy, vodhuki i zvyčajnyja momanty z žyćcia.
U pierapiscy jon pierš za ŭsio ŭdakładniaje, jakija pravy patrabujucca. Košt pytańnia, mabyć, zaležyć ad katehoryi. Tak, za pravy katehoryi B — Br850. Abiacaje, što ŭsio budzie hatova praz dva-piać dzion.
Mužčyna prosić pieradapłatu — usiaho 30%. Na kartu biełaruskaha banka. U jakaści harantyi abiacaje vysłać fatahrafiju hatovych pravoŭ i fota bazy.
Pravy Maksim Uładzimiravič abiacaje samyja što ni na jość sapraŭdnyja.
«Usio budzie pa bazie, tamu što ŭsio aficyjna praz DAI», — zapeŭniŭ jon.
Na ŭdakładniajučaje pytańnie, ci treba paćvierdzić fakt navučańnia ŭ aŭtaškole, mužčyna adkazaŭ: nijakich daviedak nie treba.
Paprasiŭ tolki fota pašparta, fota 3×4 sm, fota podpisu. Zapeŭniŭ, što pravy nie vykličuć nijakich padazreńniaŭ u supracoŭnikaŭ DAI ni ŭ Biełarusi, ni za miažoj.
Čyściniu i prazrystaść namieraŭ mužčyna paćvierdziŭ navat hałasavym paviedamleńniem: maŭlaŭ, słova daju. Prapanavaŭ jašče pahladzieć fotavodhuki zadavolenych klijentaŭ. Heta asobny kanał u telehramie z 1,2 tys. padpisčykaŭ. Spakojna pracuje niekalki hadoŭ.
Viadoma ž, usie akaŭnty z vodhukami schavanyja karystalnikami, znajści choć by adnaho «žyvoha» čałavieka nie ŭdałosia.
Zrešty, fatahrafii sapraŭdy realnyja. Niekatoryja skradzienyja z akaŭntaŭ sapraŭdnych aŭtaškoł.
Kałaž: Tochka.by
U pryvatnaści, udałosia znajści niekalki fotavodhukaŭ z profilu bresckaj škoły — uładalniki paśviedčańniaŭ kiroŭcaŭ dzialilisia svaimi pośpiechami paśla paśpiachovaj zdačy ekzamienaŭ u DAI.
Kupi pravy
Padrobka pravoŭ kiroŭcy ŭ Biełarusi — źjava nie skazać kab častaja. Ale stabilna niekalki razoŭ na hod siłaviki vyjaŭlajuć takija vypadki. Jak minimum pra čatyry takija fakty ŭ 2022-m paviedamlali ŭ telehram-kanale minskaj milicyi.
Što cikava, udałosia znajści i adnaho paciarpiełaha — ad ruk taho samaha Maksima Uładzimiraviča. Historyja — i śmiech i hrech.
Fota: Instagram
Natknuŭšysia na rekłamu ŭ sacsietkach, chłopiec pavieryŭ abiacańniam atrymać paśviedčańnie kiroŭcy za hrošy. Pieravioŭ zadatak Br400 — ale pravy nie atrymaŭ. Jamu prapanavali pieravieści jašče Br500 — maŭlaŭ, tady dakumient dakładna budzie hatovy. Da chłopca dajšło: jaho padmanuli. I, niahledziačy na žadańnie kupić pravy (heta značyć zrabić pravaparušeńnie), paśla znosin z ašukancami małady čałaviek usio ž źviarnuŭsia ŭ milicyju. Što było dalej, nieviadoma.
Realnyja terminy za padrobku
Za padrobku, vykarystańnie abo zbyt padroblenych dakumientaŭ praduhledžanaja kryminalnaja adkaznaść: pakarańnie ad štrafu da pazbaŭleńnia voli na termin da troch hadoŭ. Ale ŭ milicyi adznačyli: schiema tut zusim inšaja.
«Prymityŭnyja padrobki, vyrablenyja samatužnym sposabam, sučasny druk zrabić dazvalaje. Ale kali sapraŭdnaść takich dakumientaŭ zdolny vyznačyć navat zvyčajny supracoŭnik DAI bieź śpiecyjalnaj ekśpiertyzy, to možna mierkavać, jakoha ŭzroŭniu hetyja padrobki. A ŭnieści ŭ bazu takija dakumienty — heta naohuł niemahčyma ŭ našaj krainie», — upeŭnieny namieśnik načalnika Hałoŭnaha ŭpraŭleńnia pa supraćdziejańni kibierzłačynnaści MUS Alaksandr Rynhievič.
Fota: Instagram
Samaje vierahodnaje tłumačeńnie takoj schiemy z kuplaj pravoŭ — banalnaje machlarstva. Raźlik złamyśnikaŭ vielmi prosty: kali ty zachacieŭ nabyć niešta niezakonnaje i zapłaciŭ za heta, to, nie atrymaŭšy žadanaje, naŭrad ci budzieš źviartacca ŭ milicyju.
U MUS adznačajuć: ciapier vypadkaŭ machlarstva ŭ struktury kibierzłačynstvaŭ stała značna bolš — amal 5000 faktaŭ.
Machlary prydumali novuju schiemu: hrošy patrabujuć za razbłakavańnie telefona
Čarhovaja schiema: «Biełpošta» papiaredžvaje pra paviedamleńni machlaroŭ u miesiendžarach
Machlary pierakanali 83-hadovuju žančynu pieravieści im hrošy, bo «kupiury zaražanyja»
Novaja schiema machlarstva pry arendzie žylla — ciažka nie padmanucca