Ад 11 з паловай да 10 гадоў. Вынеслі прысуды «аналітыкам Ціханоўскай»
Генеральная пракуратура паведаміла пра прысуды, вынесеныя па крымінальнай справе адносна ўдзельнікаў «экстрэмісцкага фармавання «Аналітыкі Святланы Ціханоўскай». Па ёй праходзілі 20 чалавек, а суд праходзіў завочна, бо ўсе абвінавачаныя знаходзяцца за мяжой.
01.07.2024 / 18:17
Па справе праходзілі наступныя 20 чалавек: Аляксандр Дабравольскі, Рыгор Астапеня, Філіп Біканаў, Юрый Дракахруст, Андрэй Казакевіч, Ганна Красуліна, Яўген Крыжаноўскі, Дзяніс Кучынскі, Вераніка Лапуцька, Аляксандр Лагвінец, Ганна Любакова, Васіль Навумаў, Марыя Рогава, Пётра Рудкоўскі, Алеся Руднік, Наталля Рабава, Павел Усаў, Таццяна Чуліцкая, Аляксандр Шлык, Кацярына Шмаціна.
Справу будзе разглядаць суддзя Уладзімір Арэшка.
Згодна з матэрыяламі справы, усіх абвінавачвалі ў здзяйсненні «злачынстваў экстрэмісцкага характару» ў сувязі з кампаніяй па выбарах Аляксандра Лукашэнкі, а таксама ў постэлектаральны перыяд:
- змова з мэтай захопу дзяржаўнай улады неканстытуцыйным шляхам (ч. 1 арт. 357 КК РБ);
- удзел у экстрэмісцкім фарміраванні і ўваходжанне ў склад такога фармавання ў мэтах здзяйснення злачынства экстрэмісцкай накіраванасці (ч. 3 арт. 361-1 КК);
- спрыянне ў публічных закліках да захопу дзяржаўнай улады; здзяйсненне іншых дзеянняў на шкоду нацыянальнай бяспецы Рэспублікі Беларусь; закліках, скіраваных да замежнай дзяржавы, замежнай і міжнароднай арганізацыі, здзяйсненне дзеянняў на шкоду нацыянальнай бяспецы Рэспублікі Беларусь з выкарыстаннем СМІ і сеткі Інтэрнэт (ч. 6 арт. 16, ч. 3 арт. 361 Крымінальнага кодэкса Рэспублікі Беларусь (у рэдакцыі ад 26 траўня 2021 года);
- спрыянне ў наўмысных дзеяннях, накіраваных на распальванне сацыяльнай варожасці і варожасці па прыкмеце іншай сацыяльнай прыналежнасці, учыненых групай асоб (ч. 6 арт.16, ч. 3 арт. 130 КК РБ).
Акрамя таго, Аляксандра Дабравольскага абвінавачвалі ў кіраўніцтве экстрэмісцкім фармаваннем (ч. 1 арт. 361-1 КК).
Суд прагназавана прызнаў усіх 20 аналітыкаў вінаватымі па ўсіх пунктах абвінавачвання і прызначыў ім наступныя пакаранні:
- Аляксандру Дабравольскаму — 11 гадоў 6 месяцаў пазбаўлення волі са штрафам у памеры 6000 базавых велічынь (240 тыс. рублёў);
- Ганне Красулінай, Дзянісу Кучынскаму, Пётру Рудкоўскаму, Аляксандру Шлыку — па 11 гадоў пазбаўлення волі са штрафам ад 1000 да 40000 базавых велічынь (ад 40 тыс. да 1,6 млн рублёў);
- Паўлу Усаву — 11 гадоў пазбаўлення волі;
- Рыгору Астапеню, Філіпу Біканаву, Юрыю Дракахрусту, Андрэю Казакевічу, Яўгену Крыжаноўскаму, Вераніцы Лапуцька, Алесю Лагвінцу, Ганне Любаковай, Васілю Навумаву, Марыі Рогавай, Алесі Руднік, Наталлі Рабавай, Таццяне Чуліцкай, Кацярыне Шмацінай — па 10 гадоў пазбаўлення волі.
Самы шматлюдны завочны суд: пачынаецца разгляд «справы аналітыкаў Святланы Ціханоўскай»
Генпракуратура накіравала ў суд справу «аналітыкаў Ціханоўскай» і выбрала «кіраўніка»
Дабравольскі пра справу «аналітыкаў Ціханоўскай»: Не ўсе мне былі знаёмыя, гэта абсурд
Следчы камітэт арыштаваў маёмасць 20 «аналітыкаў Ціханоўскай»
СК завёў справы на 20 «аналітыкаў Ціханоўскай». Там ёсць і аналітыкі супраць Ціханоўскай