Валерый Кавалеўскі патлумачыў прычыны свайго сыходу з Кабінета Ціханоўскай
«Святлана Ціханоўская павінна мець побач з сабою тых людзей, якія цалкам падзяляюць яе падыходы».
01.07.2024 / 23:13
Валерый Кавалеўскі. Скрын відэа: dwbelarus / YouTube
Прычыны свайго сыходу з Аб'яднанага пераходнага кабінета Валерый Кавалеўскі патлумачыў у эфіры ютуб-канала «DW Беларусь». Па словах ужо былога прадстаўніка па замежных Кабінета, асноўным стала тое, што
«ў першую чаргу неабходна думаць аб тым, як працаваць на Беларусь, як працаваць з беларусамі як за межамі краіны, так і ўнутры яе».
Па словах палітыка, цяпер у дэмакратычным руху відавочны выразны акцэнт на міжнародную працу:
«Іронія заключаецца ў тым, што гэта і мая адказнасць таксама. І я павінен быць зацікаўлены ў тым, каб фокус на міжнароднай дзейнасці быў вышэйшы. Але я лічу, што з-за таго, што змены ў Беларусі магчымы толькі рукамі, сэрцамі і намаганнямі беларусаў, то галоўнае намаганне дэмакратычнага руху павінна быць накіравана менавіта на работу з беларусамі».
Па словах Кавалеўскага, у Кабінеце ён у тым ліку выступаў з прапановамі па ўнутрыпалітычнай рабоце.
«Нешта знайшло прыняцце, нешта не. У рэшце рэшт я лічу, што кіраўнік Кабінета і лідар беларускага дэмакратычнага руху Святлана Ціханоўская павінна мець побач з сабою тых людзей, якія цалкам падзяляюць яе падыходы. Таму я прыйшоў да такога рашэння».
Кавалеўскі запэўніў, што яго сыход ніяк не звязаны з расследаваннем Беларускага расследавальніцкага цэнтра аб тым, што кампанія, якая прапаноўвала паслугі друку «пашпарта Новай Беларусі», звязаная з бізнэсоўцам, набліжаным да Лукашэнкі.
«Калі гаварыць аб тым, што менавіта адсутнасць выразнага прагрэсу ў пашпартным праекце магла стаць прычынай майго сыходу, то безумоўна не»,
— дадаў Кавалеўскі.
Намеснік Ціханоўскай Валер Кавалеўскі пакінуў пасаду
Валер Кавалеўскі пракаментаваў расследаванне БРЦ, датычнае праекта пашпарта Новай Беларусі