Biełaruskija biznesmieny śpiešna pradajuć doli ŭ svaich polskich transpartnych kampanijach. Što adbyvajecca?
U čym sens sankcyj, jakija zapracujuć 2 žniŭnia, raskazvaje Most.
04.07.2024 / 19:47
Biełaruskija pradprymalniki, u jakich jość transpartny biznes u Polščy, terminova šukajuć pakupnikoŭ na doli ŭ svaich kampanijach.
Takim čynam pieravozčyki sprabujuć zachavać biznes paśla 2 žniŭnia, kali zapracujuć novyja sankcyi ES u dačynieńni da Biełarusi i Rasii.
Novy pakiet tyčycca ŭ tym liku transpartnaj haliny. Z 2 žniŭnia kampanii, stvoranyja na terytoryi ES paśla 8 krasavika 2022 hoda, nie zmohuć rabić pieravozki pa terytoryi Jeŭrasajuza, kali 25% i bolš akcyj (dolaŭ) u ich naležyć biełaruskaj abo rasijskaj fizičnaj asobie, jurydyčnaj asobie abo orhanu.
Hetaja miera nie raspaŭsiudžvajecca na tych, chto maje druhoje hramadzianstva adnoj z krain ES albo dazvoł na žycharstva (pastajanny abo časovy) u ES.
Čamu mnohija biznesy mohuć paciarpieć
Mnohija biełaruskija transpartnyja arhanizacyi ŭ Polščy zarehistravanyja paśla 8 krasavika 2022 hoda. Reč u tym, što biełaruski transpartny biznes staŭ aktyŭna «drabnicca» paśla ŭviadzieńnia papiarednich sankcyj — kali ES zabaraniŭ biełaruskim i rasijskim pieravozčykam rabić rejsy pa svajoj terytoryi, a Biełaruś uviała simietryčnyja zachady ŭ dačynieńni da jeŭrapiejskich kampanij.
Kab abyści hetyja abmiežavańni, biełaruskija biznesmieny stali rehistravać jurydyčnyja asoby ŭ ES i pieradavać im na bałans častku ruchomaha składu.
U vyniku pieravozki pamiž Biełaruśsiu i ES robiacca mietadam pierahruzki/pieračepki. Fura na biełaruskich abo rasijskich numarach jedzie da transpartna-łahistyčnaha centra na miažy, a adtul hruz zabiraje ciahač na polskich numarach i vykonvaje rejs pa terytoryi ES. Farmalna rejsy robiacca roznymi arhanizacyjami, ale faktyčna hruz transpartuje adzin i toj ža biznes, tolki ŭ dva etapy.
Pakolki raniej praca pa takoj schiemie nie patrabavała ad uładalnikaŭ biznesaŭ pierajezdu ŭ ES, mnohija pradprymalniki nie imknulisia atrymlivać DNŽ. Dla vyrašeńnia biahučych kiraŭničych zadač im dastatkova było vizy.
Ciapier ES zakryvaje ščylinu, pa jakoj takija kampanii pracavali ŭvieś hety čas.
Krynica Most u transpartnaj halinie havoryć, što miera moža zakranuć sotni arhanizacyj pa ŭsioj Polščy. Sama jana pracuje ŭ Biała-Padlascy.
«Tolki ŭ nas na virtualnym ofisie try takija firmy, usiaho ŭ horadzie moža być i 33».
Što robiać biznesmieny
U halinie kažuć, što mnohija biznesmieny, jakija razdrabili ŭ apošnija hady biełaruski biznes, ciapier šukajuć ludziej z pašpartam hramadzianina ES, jakim možna pradać doli ŭ polskich kampanijach. Partnioraŭ pavinna być niekalki, kab u adnaho nie akazałasia bolš za 75% — inakš vialikaja ryzyka stracić kiravanaść biznesu.
«Ludzi buduć ryzykavać, buduć sprabavać zachavać biznes, — śćviardžaje inšaja krynica ŭ halinie. — Mała chto choča pradać pradpryjemstva, kab sapraŭdy pajści z hetaha biznesu».
Pavodle źviestak krynicy, pradprymalniki buduć masava padavacca na DNŽ u Polščy. Adnak atrymać dakumient mienš čym za miesiac niemahčyma, tamu schiema z prodažam moža vykarystoŭvacca dla taho, kab pradpryjemstva nie prypyniała dziejnaść u pieryjad razhladu dakumientaŭ.
U teoryi damoŭlenaści z patencyjnymi pakupnikami mohuć praduhledžvać mahčymaść zvarotnaha vykupu akcyj z premijaj dla partnioraŭ, paśla taho jak ciapierašnija ŭładalniki kampanij atrymajuć DNŽ u Polščy. Adnak taki krok taksama moža być ryzykoŭnym: dumajecca, što ŭ kantrolnych orhanaŭ mohuć uźniknuć pytańni adnosna taho, ci nie źjaŭlajecca ździełka ŭjaŭnaj.
Lehalizavacca, kab zachavać biznes
Krynica ŭ halinie nie dumaje, što atrymańnie DNŽ u Polščy stanie prablemaj dla pradprymalnikaŭ, jakija viaduć tut biznes. Jana miarkuje, što sens novaj miery nie ŭ tym, kab adsiekčy im mahčymaść pracavać u Jeŭropie, a ŭ tym, kab da biznesmienaŭ «praściej było daciahnucca biurakratyi», kali ich kampanii vykryjuć u abychodzie sankcyj.
Biełarus śćviardžaje, što jość niuansy ŭ pracy pravaachoŭnaj sistemy ź inšaziemcami, u jakich jość DNŽ i jakija znachodziacca ŭ krainie pa vizie.
Čamu Polšča zabaraniła vyvaz tavaraŭ fizičnym asobam i jakija pakupki ciapier nielha pravieźci?
Polšča ŭviała zabaronu na vyvaz mnohich tavaraŭ u Biełaruś dla fizičnych asob
Padsankcyjnyja aŭto i hruzaviki ŭsio adno traplajuć u Biełaruś i Rasiju, ale jość niatanny niuans
ES pašyryŭ na Biełaruś sankcyi, uviedzienyja suprać Rasii