U Minsku moža źjavicca pomnik kačcy, za losam jakoj niadaŭna sačyli haradžanie
U pačatku leta staličnyja błohiery, a ŭśled za imi i astatnija minčuki sačyli za losam kački, jakaja niečakana źviła hniazdo ŭ centry horada. Ptuška nahledzieła sabie kłumbu kala budynka «eks-Kiempinski», dzie raźmiaščajecca ofis Śbier Banka ŭ Minsku. Finansisty taksama nie abyšli ptušku svajoj uvahaj — padkormlivali i achoŭvali jaje, a ciapier zadumalisia, ci nie pastavić u honar kački-maci pomnik, piša Office Life.
05.07.2024 / 16:28
Fota: Śbier
Cikava, što kačka pasialiłasia kala ŭvachodu ŭ ofis akurat u toj dzień, kali ŭ Śbier Banku źmianiŭsia staršynia praŭleńnia.
«U karparatyŭnych čatach kačku abmiarkoŭvali navat bolš, čym majo pryznačeńnie, — śmiajecca Jaŭhien Jelisiejeŭ, ale pryznajecca, što i sam sačyŭ za losam kački. Ptušku nazvali Kapiejka, padkormlivali, nazirali za joj pa videakamierach, kab nie turbavać, a kłumbu z hniazdom abharadzili čyrvonaj stužkaj.
«A kali vyjavili ŭ niejki momant, što kačka niekudy pajšła, pakinuŭšy jajki, surjozna abmiarkoŭvali, što budziem rabić, kali jana nie vierniecca», — uspaminajuć u banku.
Kačka, na ščaście, viarnułasia, a ŭ banku na ŭsialaki vypadak damovilisia z administracyjaj budynka, kab pobač z hniazdom niekatory čas nie myli vokny na pieršym paviersie: heta tryvožyła ptušku.
Praź niekatory čas paśla taho, jak kačaniaty vyłupilisia, kačka pierasialiłasia ź imi na Śvisłač. U Śbier Banku ž vyrašyli hetuju historyju pieratvaryć u markietynhavuju aktyŭnaść. Adzin z varyjantaŭ, pa słovach staršyni praŭleńnia Jaŭhiena Jelisiejeva, — heta stvareńnie liniejki praduktaŭ, dzie budzie vykarystoŭvacca vobraz kački.
Akramia taho, u banku zadumalisia pra pomnik Śbierkačcy.
Kačka vyvieła kačaniat prosta na kłumbie ŭ centry Minska VIDEA
U Čyžoŭcy pasialiłasia vielmi redkaja ptuška. Jaje sustreć — vialikaja ŭdača
U Minsku znoŭ zaŭvažyli niezvyčajnuju ptušku cikavaj afarboŭki