Čarha ŭ Polšču amal źnikła, ale ludzi ŭsio adno stajać pa 10 hadzin. Jak tak?
Čerhi na punkcie propusku «Brest» na miažy z Polščaj istotna skaracilisia. Na praciahu suboty, 6 lipienia, vyjezdu ź Biełarusi čakali 50-60 lehkavikoŭ. Heta ŭ razy mienš, čym jašče niekalki tydniaŭ tamu, kali ŭ čarhu časam vystrojvałasia až da 500 aŭto.
07.07.2024 / 01:30
Karystalniki pamiežnych čataŭ adznačajuć, što zajechać u zonu čakańnia na miažy možna adrazu ž. Tym nie mienš ahułam prachodžańnie miažy ŭ bok Polščy zajmaje kala 9-10 hadzin. Za košt čaho nabiahaje hety čas?
Kala troch hadzin davodzicca prastojvać u zonie čakańnia. Nastupnyja try hadziny zajmaje znachodžańnie ŭ biełaruskim punkcie propusku. Kala hadziny kiroŭcy stajać na moście, i jašče try hadziny ich dahladajuć na polskim baku miažy.
Viartańnie ŭ Biełaruś na aŭtamabili zajmaje jašče bolš času.
Zony čakańnia z polskaha boku niama, mašyny stajać prosta ŭzdoŭž trasy. Heta čarha da šłahbauma składaje pryblizna 3,5-4 km. Kab jaje prajści, davodzicca patracić kala 13-14 hadzin. Pryčym pasažyry-vałanciory pastajanna zmahajucca z parušalnikami, jakija sprabujuć praskočyć na miažu, nie stojačy ŭ ahulnaj čarzie.
Samo znachodžańnie na pamiežnych punktach zajmaje jašče 5-7 hadzin — u zaležnaści ad vybaru čyrvonaha ci zialonaha kanała.
Takim čynam, ahułam prachodžańnie miažy ŭ bok Biełarusi zajmała ŭ subotu, 6 lipienia, kala 18-20 hadzin.
Cikavaść da pajezdak u Polšču stała spadać paśla taho, jak źjavilisia źviestki, što Polšča pierastała afarmlać VAT i vypuskać u Biełaruś z šeraham tavaraŭ.
Adbyłosia heta ŭ suviazi z pryniaćciem novaha pakieta sankcyj u dačynieńni da Biełarusi.
Čamu Polšča zabaraniła vyvaz tavaraŭ fizičnym asobam i jakija tavary ciapier nielha pravieźci?