Bujnyja donary-demakraty źbirajucca zamarozić 90 miljonaŭ dalaraŭ unioskaŭ na kampaniju Bajdena
Bujnyja donary Demakratyčnaj partyi paviedamili Kamitetu palityčnych dziejańniaŭ Future Forward, jaki padtrymlivaje prezidenta ZŠA Džo Bajdena, pra namier prypynić unioski na sumu kala 90 młn dalaraŭ, kali Bajden zastaniecca ŭ pieradvybarnaj honcy, paviedamlaje hazieta The New York Times sa spasyłkaj na infarmavanyja krynicy.
12.07.2024 / 22:33
Džo Bajden. Fota: AP Photo/Jacquelyn Martin
Pa słovach surazmoŭcaŭ vydańnia, zamarožanyja ŭnioski ŭklučajuć u siabie «šmatlikija vaśmiznačnyja abaviazacielstvy».
U Kamitecie palityčnych dziejańniaŭ Future Forward, jakomu donary i paviedamili ab zamarozcy vypłat, admovilisia ad kamientaroŭ. Kansultant kamiteta skazaŭ, što čakaje viartańnia donaraŭ, jak tolki «biahučaja niavyznačanaść» budzie vyrašanaja.
Imiony donaraŭ, jakija vyrašyli adklikać abiacanyja čeki, nie nazyvajucca.
Jašče adna krynica, blizkaja da Future Forward, skazała, što kamitet uchilajecca ad pryniaćcia važnych stratehičnych rašeńniaŭ, pakul nie stanie jasna, chto budzie ŭznačalvać pieradvybarčuju honku.
Future Forward, jak adznačaje NYT, była pryznačanaja pieradvybarnym štabam Bajdena viadučym kamitetam padtrymki na rańnich etapach prezidenckaj kampanii i ŭžo abviaściła pra reziervavańnie 250 miljonaŭ dalaraŭ na televizijnuju i ličbavuju rekłamu. Jaje zapusk zapłanavany na žnivień — paśla źjezda Demakratyčnaj partyi, dzie kančatkova zaćviardžajecca kandydat u prezidenty.
«Faktar Śvift». Amierykanskaja hramadskaść čakaje zajavy Tejłar Śvift nakont Bajdena
Bajden nazvaŭ vice-prezidenta Charys Trampam. Toj rezka adreahavaŭ
Bajden nazvaŭ prezidentam Ukrainy Pucina
Bajden nie ŭbačyŭ sensu ŭ dazvole Ukrainie bić pa Kramli
Bajden nazvaŭ siabie najbolš kvalifikavanym supiernikam Trampa, jon nie źbirajecca pakidać honku