Bajden nazvaŭ siabie najbolš kvalifikavanym supiernikam Trampa, jon nie źbirajecca pakidać honku
Prezident Džo Bajden pravioŭ u čaćvier viečaram pres-kanfierencyju, adkazaŭšy na vielmi składanyja pytańni žurnalistaŭ, piša «Hołas Amieryki».
Raniej kiraŭnik dziaržavy sutyknuŭsia z zaklikami z boku častki demakrataŭ admovicca ad pieravybrańnia na fonie sumnievaŭ u zdolnaści Bajdena, u suviazi z uzrostavymi kahnityŭnymi parušeńniami, a taksama jaho fizičnaj formaj, pieramahčy byłoha prezidenta Donalda Trampa.
Va ŭstupnym słovie Bajden skazaŭ: «Kožny amierykaniec pavinien spytać siabie: ci staŭ śviet bolš biaśpiečnym? Z NATA vy ŭ bolšaj biaśpiecy? Vaša siamja ŭ bolšaj biaśpiecy? Ja liču, što amierykanski narod viedaje, što adkaz na ŭsie hetyja pytańni — tak. I ja vieru, što amierykanski narod razumieje, što Amieryka stanovicca macniejšaj dziakujučy našym sajuzam»»
Džo Bajden zajaviŭ, što jaho kandydatura na prezidenckich vybarach macniejšaja, čym kandydatura Donalda Trampa: «Ja dumaju, što ja najbolš kvalifikavany, kab pieramahčy jaho, kab bałatavacca na pasadu prezidenta: Ja pieramoh jaho adzin raz i ja zrablu heta znoŭ».
Kiraŭnika Biełaha doma spytali, ci ličyć jon, što vice-prezident Kamała Charys maje dastatkovuju kvalifikacyju, kab vykonvać abaviazki prezidenta. Jon adkazaŭ śćviardžalna, spasłaŭšysia na jaje prafiesijnuju kampietentnaść. Bajden taksama dadaŭ: «Ja b nie abraŭ jaje, kali b nie ličyŭ, što jana padychodzić dla pasady prezidenta».
Vierahodny supiernik ciapierašniaha prezidenta, respublikaniec Donald Tramp nie budzie addany abaronie krain NATA, dadaŭ Džo Bajden, padkreśliŭšy abaviazacielstvy ZŠA pierad zachodnim aljansam.
«Moj papiarednik jasna daŭ zrazumieć, što ŭ jaho niama abaviazacielstvaŭ pierad NATA. Jon daŭ zrazumieć, što nie adčuvaje abaviazańnia vykonvać piaty artykuł (Statuta NATO)», — skazaŭ Bajden na pres-kanfierencyi.
Jon padkreśliŭ, što Złučanyja Štaty «nie mohuć izalavać siabie ad śvietu» i zapeŭniŭ, što pad jaho kiraŭnictvam Vašynhton nie admovicca ad padtrymki Ukrainy, dadaŭšy, što mocny transatłantyčny aljans nieabchodny dla biaśpieki Amieryki.
Bajden padkreśliŭ, što vajna pamiž Izrailem i Hazaj pavinna skončycca zaraz, paviedamiŭšy žurnalistam, što jaho płan spynieńnia ahniu ŭ Hazie byŭ uzhodnieny jak Izrailem, tak i paleścinskaj isłamisckaj hrupoŭkaj CHAMAS, ale dadaŭ, što jašče zastalisia niavyrašanyja pytańni.
«Hety płan ciapier uzhodnieny jak Izrailem, tak i CHAMAS. Tamu ja adpraviŭ svaju kamandu ŭ rehijon, kab dapracavać detali», — skazaŭ Bajden na pres-kanfierencyi.
«Heta składanyja i ciažkija pytańni. Jašče jość prabieły, jakija treba zakryć. My damahajemsia prahresu. Tendencyja pazityŭnaja. Ja poŭny rašučaści zaviaršyć hetuju spravu i pakłaści kaniec hetaj vajnie, jakaja pavinna skončycca zaraz ža», — dadaŭ Bajden.
Bajden adznačyŭ, što jeŭrapiejskija sajuźniki kazali jamu padčas samitu, što jon pavinien pieramahčy Donalda Trampa i što druhoje prezidenctva Trampa budzie «katastrofaj».
«Ja čuŭ, jak jany kazali: vy pavinny pieramahčy», — skazaŭ Bajden
«Jon nie moža pieramahčy ŭ bitvie z časam». Viadomy akcior Džordž Kłuni zaklikaŭ Bajdena vyjści z prezidenckaj honki
Bajden: Ukraina moža spynić i jana spynić Pucina
«Ja kiruju hetym śvietam» — Bajden
Bajden zajaviŭ, što vyjdzie ź pieradvybarnaj honki tolki «pa ŭkazańni Usiavyšniaha»
Paśla pravalnych teledebataŭ Džo Bajden paabiacaŭ bolš spać i nie chadzić na viačernija mierapryjemstvy
Kamientary