Jeŭrakamisija bajkatuje staršynstva Vienhryi ŭ ES
Kiraŭnik Jeŭrakamisii Ursuła fon der Lajen admianiła vizit Kalehii JEK u Vienhryju i paniziła ŭzrovień pradstaŭnictva na niefarmalnych pasiadžeńniach Rady ES pad vienhierskim staršynstvam, piša Radyjo Svaboda.
16.07.2024 / 07:17
Viktar Oŕan. Fota: Thannasis Stabrakis / AP
Jeŭrapiejskaja kamisija navažyła bajkatavać paŭhadavoje staršynstva Vienhryi ŭ Radzie ES u adkaz na «nieadnaznačnyja pajezdki Viktara Orbana ŭ Maskvu i Piekin, jakija mnohija paličyli abrazaj palityčnaha adzinstva błoka», havorycca ŭ publikacyi na sajcie Mižnarodnaha Jeŭrapiejskaha telekanała.
«U śviatle apošnich padziej, jakija adznačyli pačatak staršynstva Vienhryi staršynia (Ursuła fon der Lajen) navažyła, što Jeŭrakamisija budzie pradstaŭlenaja na ŭzroŭni starejšych dziaržaŭnych słužboŭcaŭ tolki na nieaficyjnych pasiadžeńniach Rady», — paviedamiŭ u paniadziełak uviečary pradstaŭnik JEK Eryk Mamier.
«Vizit Kalehii (Jeŭrakamisii) u Vienhryju nie adbudziecca», — dadaŭ jon, paćvierdziŭšy, što hałoŭnaja padzieja, jakaja aznačaje pačatak kožnaj ratacyi staršynstva, admieniena.
Padčas svajho niadaŭniaha vizitu ŭ Maskvu Orban sustreŭsia z prezidentam Uładzimiram Pucinym. Praź niekalki dzion rasiejskija vojski razbambili dziciačuju lakarniu ŭ Kijevie.
U Piekinie Orban vysoka acaniŭ «kitajski mirny płan» staršyni Si Czińpina, jaki byŭ adkinuty kiraŭnictvam ES za vybarčaje tłumačeńnie mižnarodnaha prava i razmyvańnie miažy pamiž ahresaram i achviaraj ahresii.
«Kitaj — adzinaja suśvietnaja dziaržava, jakaja z samaha pačatku vyrazna prytrymlivajecca pryncypu miru», — skazaŭ Orban, abviarhajučy aściarohi Zachadu, što Piekin padtrymlivaje vajskovuju ekanomiku Rasii.
Budapiešt nastojvaje na tym, što abiedźvie pajezdki, jakija Orban rekłamavaŭ jak pajezdki kiraŭnika tak zvanaj «miratvorčaj misii», byli ździejśnienyja stroha ŭ ramkach dvuchbakovaj dypłamatyi. Adnak terminy mižnarodnaha turne, vybar krain i vykarystańnie aficyjnaha łahatypa vuhorskaha staršynstva ŭ ES vyklikali rezkija abvinavačvańni ŭ złoŭžyvańni ŭładaj i niełajalnaści.
Akramia taho, Orban pryniaŭ udzieł u niefarmalnym samicie Arhanizacyi ciurkskich dziaržaŭ, u jakuju ŭvachodzić «Tureckaja Respublika Paŭnočnaha Kipra», pryznanaja tolki Turcyjaj, što vyklikała novaje asudžeńnie.
Rašeńnie Jeŭrakamisii, pryniataje staršynioj Ursułaj fon der Lajen, paćviardžaje: Brusel nie budzie ŭdzielničać na samym vysokim uzroŭni ŭ šmatlikich mierapryjemstvach, jakija Budapiešt płanuje pravieści da kanca hoda.
Reahujučy na hetuju navinu, Janaš Boka, ministr pa spravach ES Vienhryi, zajaviŭ, što jaho kraina pa-raniejšamu «prychilnaja ščyramu supracoŭnictvu» dla vyrašeńnia «ahulnych prablem».
Orban adpraviŭ usim lidaram krain ES svoj płan urehulavańnia va Ukrainie
Zialenski patłumačyŭ, čamu nie pahadziŭsia na prapanovu Orbana ab spynieńni ahniu