Zialenski patłumačyŭ, čamu nie pahadziŭsia na prapanovu Orbana ab spynieńni ahniu
Uładzimir Zialenski publična prakamientavaŭ prapanovu premjera Vienhryi Viktara Orbana padčas jaho vizitu va Ukrainu. Pa słovach Zialenskaha, nielha prosta kazać ab spynieńni ahniu, patrebien płan. Ab hetym jon skazaŭ u intervju Bloomberg TV, piša «Jeŭrapiejskaja praŭda».
«My ŭ pryncypie nie možam daviarać Pucinu, tamu što dla nas jon zabojca i ahresar. Važna, što Vienhryja pryznaje, što Rasija — ahresar, što pryznaje terytaryjalnuju cełasnaść i suvierenitet Ukrainy», — skazaŭ jon.
Zialenski nahadaŭ, što Ukraina praviała «sotni sustreč» jašče z časoŭ Minskich pahadnieńniaŭ z damoŭlenaściami ab pieramirji, i Rasija ŭsio heta zryvała.
«Tamu tolki kali heta budzie na zrazumiełaj mižnarodnaj placoŭcy ŭ prysutnaści krain, lidaraŭ, jakim daviarajuć. U ich roznyja mierkavańni ab etapach zakančeńnia hetaj vajny, ale my ŭsie pavinny być na adnym baku, my pavinny daviarać adzin adnamu», — rastłumačyŭ Zialenski.
Pavodle jaho słoŭ, treba razumieńnie, što Rasija nie budzie vykarystoŭvać spynieńnie ahniu dla nazapašvańnia techniki na akupiravanaj terytoryi Ukrainy, kali Ukraina, budučy źviazanaj umovami pieramirja, nie budzie spyniać jaje svaimi ŭdarami.
Premjer-ministr Vienhryi Viktar Orban pryznaŭ, što Zialenski ŭ razmovie adprečyŭ prapanavanaje im «pieramirje» Ukrainy z Rasijaj z zamarožvańniem biahučaj linii frontu.
Orban padčas vizitu ŭ Kijeŭ zajaviŭ, što prasoŭvaŭ ideju nieadkładnaha pieramirja, jakaja jość va ŭsich prarasiejskich mirnych płanach, ale nie staŭ nastojvać na joj.
Pavodle słoŭ Orbana, prezident Ukrainy zajaviŭ, što sumniavajecca ŭ łohicy płana Orbana i nie padtrymlivaje jaho, pakolki va Ukrainy drenny vopyt sprob pieramirja z Rasijaj. Padobnyja pieramirji «nie byli dobrymi dla Ukrainy», pierakazaŭ jahonyja słovy Orban.
Taksama stała viadoma, što paśla zaviaršeńnia sustrečy lidaraŭ u Kijevie kiraŭnik MZS Vienhryi patelefanavaŭ rasijskamu kiraŭniku MZS Siarhieju Łaŭrovu.
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary