Ksiondz Andžej Juchnievič: Ja ryzykuju być pryciahnutym da suda, ale mnie b chaciełasia, kab hetaje piarečańnie było pačutaje publična
Ksiondz Andžej Juchnievič viedaŭ, što jaho mohuć pieraśledvać, i śviadoma braŭ na siabie ryzyku. Heta vynikaje sa słoŭ, apublikavanych na sajcie misijanieraŭ-abłataŭ u ZŠA, piša «Chryścijanskaja vizija».
16.07.2024 / 13:08
Andžej Juchnievič, fota Chryścijanskaja vizija
«Napisaŭšy heta, ja ryzykuju być pryciahnutym da adkaznaści pierad biełaruskim sudom, ale mnie b chaciełasia, kab hetaje piarečańnie było pačutaje publična.
Popieł na našy hałovy, na dadzienym etapie historyi dla mnohich biełarusaŭ hety žest nie tolki simvaličny, ale i vyjaŭlaje ŭnutrany stan: pieražyvańnie hłybokaha soramu i depresii. Bo z našaj krainy, z našaj ziamli iduć vajskovyja ataki rasiejcaŭ, pravakacyi i hienacyd ukrainskaha naroda.
Ad siabie i ad imia ŭsich misijanieraŭ Niepraročnaj Maryi, što słužać u Biełarusi, ja chacieŭ by vykazać hłybokuju salidarnaść i duchoŭnuju padtrymku našym subratam va Ukrainie i ŭsiamu ŭkrainskamu narodu.
My vyrašyli kožny dzień razam z našymi prychadžanami malicca za zvarot Rasii i Biełarusi i za nieadkładnaje spynieńnie vajny va Ukrainie. Siońnia ŭ parafii ŭ Šumilinie dla hetaha namieru kruhłasutačnaje adaracyja najśviaciejšaha sakramentu», — pisaŭ ksiondz Andžej Juchnievič.
***
Andžeja Juchnieviča zatrymali 8 maja i spačatku pryciahnuli da administracyjnaj adkaznaści za raźmiaščeńnie ŭ fejsbuku vyjavy bieła-čyrvonaha-biełaha i ŭkrainskaha ściahoŭ. Jaho aryštavali na 15 sutak, i z taho času na volu jon tak i nie vyjšaŭ. Jamu niekalki razoŭ davali pa 15 sutak.
U pačatku lipienia stała viadoma, što jaho pieravodziać ź IČU, dzie jon adbyvaŭ aryšty ahulnaj praciahłaściu amal dva miesiacy, u SIZA. Suprać śviatara raspačata kryminalnaja sprava. Dahetul zastajecca nieviadomym, što mienavita jamu inkryminujecca.
Ksiandza Andžeja Juchnieviča pryznali palitviaźniem
«Śvietły, Božy čałaviek». Čamu ŭłady nakinulisia na śviatara Juchnieviča z Šumilina
Suprać ksiandza Andžeja Juchnieviča zaviali kryminalnuju spravu