«Śvietły, Božy čałaviek». Čamu ŭłady nakinulisia na śviatara Juchnieviča z Šumilina
Andžej Juchnievič, katalicki śviatar ź miastečka Šumilina, pravioŭ bolš za 50 dzion pad aryštam u viciebskim IČU. A niadaŭna jaho pieraviali ŭ SIZA pa kryminalnaj spravie. Čamu da ksiandza takaja ŭvaha?
Ajciec Andžej Juchnievič, probašč ryma-katalickaj parafii ŭ Šumilinie, trapiŭ na sutki jašče 8 maja. Z taho času jon byŭ asudžany ŭžo jak minimum čatyry razy zapar: vierahodna, pieršyja try razy — na terminy pa 15 sutak, a čaćviorty raz — na 10 sutak. Apošni raz termin jaho źniavoleńnia byŭ padoŭžany da 2 lipienia, a niadaŭna stała viadoma, što śviatara pieraviali ŭ SIZA pa kryminalnym abvinavačvańni. Pravaabaroncy pryznali Juchnieviča palitviaźniem.
Nahadajem, u jakich umovach siadziać na sutkach palityčnyja aryštanty biełaruskich IČU: uvieś čas biez matraca, pieradač, prahułak. Siarod nočy — padjom. Ź pieradač Juchnieviču byli dazvolenyja tolki lekavyja srodki.
Andžej Juchnievič naradziŭsia 3 studzienia 1982 hoda na Hrodzienščynie. Jon staŭ śviatarom u 2008-m, a praz čatyry hady pryjechaŭ słužyć u Šumilina, dzie i zastavaŭsia da aryštu.
Z čym źviazanaja takaja ŭvaha da śviatara ź miastečka?
Viadomy katalicki aktyvist, ź jakim my pahutaryli, miarkuje, što Juchnievič — chutčej, vypadkovaja achviara:
«Ciažka skazać, čamu jamu dastałasia stolki ŭvahi. U apošnija hady jon vykazvaŭsia i nie maŭčaŭ. Ale hetaksama, jak i inšyja śviatary. Heta naš, biełaruski čałaviek, ludzi jaho lubili. Słužyŭ addana, apošnim časam šmat pracavaŭ dla Kaardynacyjnaj hrupy vyšejšych nastajacielaŭ u Biełarusi, jašče niadaŭna pradstaŭlaŭ Biełaruś u Vatykanie ad hetaj struktury».
Na dumku aktyvista, pieraśled ajca Andžeja Juchnieviča — chutčej, sproba zastrašyć inšych śviataroŭ i takim čynam «pieravychavać» ich.
My pahutaryli pra śviatara Andžeja Juchnieviča z ksiandzom, jaki asabista znajomy ź viaźniem. Pavodle našaha surazmoŭcy, Juchnievič chacia i ścipły, i dalikatny čałaviek, ale pry hetym maje svoj duchoŭny stryžań:
«Jon vieryć nie «jak by», a pa-sapraŭdnamu, i heta vielmi važna, jon vierny svaim pierakanańniam. Jon nie viadzie padvojnaha žyćcia, heta nie toj vypadak, kali śviatar idzie prapaviedavać i pry hetym tolki i dumaje, jak by sabrać hrošy ź ludziej. Da jaho ciahnułasia moładź. Ź Viciebska da Šumilina 50 kiłamietraŭ, i moładź caniła, što pobač ź imi jość taki śviatar — zaŭždy adkryty i haścinny, achvočy parazmaŭlać. Kažuć, što moładź niemahčyma padmanuć, tak i jość.
Ksiondz Juchnievič — heta śvietły, Božy čałaviek. Jaho i zatrymali, tamu što jon taki. Jašče raniej, pakul było možna, jon vykazvaŭsia suprać taho biezzakońnia, jakoje dziejecca ŭ krainie z 2020-ha. Jon zaachvočvaŭ heta rabić i inšych śviataroŭ, dazvalaŭ sabie kazać u bok ijerarchaŭ zaŭvahi pra toje, što my nie možam maŭčać tady, kali adbyvajecca biezzakońnie. Jon matyvavaŭ nieści słova Božaje, zaachvočvaŭ ludziej žyć u pakajańni i praŭdzie».
Surazmoŭca ličyć, što takija vierujučyja ludzi, jakija nie pojduć prystasoŭvacca pad režym, nie mohuć upisacca ŭ siońniašnija abrysy hramadskaha žyćcia. Režym imkniecca vyšturchnuć takich ludziej, złamać.
Śviatar padkreślivaje, što pieraśled Juchnieviča — heta jašče i prajava cisku na katalicki kaścioł, jaki ciahniecca dahetul:
«Z adnaho boku, hramadstva bačyć, što šmat chto z katalickich ijerarchaŭ pačynaje paddakvać tamu tonu, jaki zadaje režym. Ale hetaha mała, jany chočuć bolšaha — kab kaścioł pačaŭ naŭprost apraŭdvać i prasłaŭlać biezzakońnie.
Režym sprabuje jašče bolš nacisnuć na ijerarchaŭ, duchavienstva i Vatykan i dla hetaha sadžaje za kraty śviataroŭ».
Zvyčajna ich vypuskajuć, nahadvaje surazmoŭca, ale Juchnievič pravioŭ dva miesiacy va ŭmovach administratyŭnaha aryštu — z 2020-ha heta pieršy taki vypadak siarod katalickich śviataroŭ. I naš surazmoŭca miarkuje, što takaja «ŭvaha» da śviatara źviazanaja z tym, jak jon trymajecca za kratami.
«Siońnia ŭžo 2024-ty hod, heta nie 2020-ty. U 2020-2021-m jašče mahli vypuścić śviatara niezłamanym paśla dvuch, troch, dziesiaci sutak, jak heta było z ksiandzom Barkom. Ale ŭ 2024-m [dla režymu] niedapuščalna, kab z turmy vychodzili niezłamanymi, biełaruski režym łamaje ludziej, u tym liku śviataroŭ.
Śviatary, jakija vyjšli z-za krataŭ, kažuć, što tam im prapanavali supracoŭničać ci zapisać prymusova-pakajalnaje videa, abo vymušali źjechać z krainy. Kali ž čałaviek nie łamajecca, jany jaho nie vypuskajuć. Pabačyli b, što Juchnievič žadaje vyjechać, nie choča ci nie moža prapaviedvać słova Božaje na terytoryi Biełarusi — tady b jany jaho vypuścili. Vyhladaje, što jon nie łamajecca i tamu jaho tam trymajuć», — ličyć śviatar.
«Naša Niva» — bastyjon biełaruščyny
PADTRYMAĆ
Kamientary