Беларусь ці Польшча: хто важнейшы гандлёвы партнёр для Кітая?
Ці сапраўды Польшча настолькі важны для Кітая партнёр, каб у Пекіне прыслухоўваліся да Варшавы? Давайце пабачым лічбы ў параўнанні з аналагічнымі паказчыкамі Беларусі.
21.07.2024 / 12:56
Тэрмінал у Малашэвічах. Фота: PKP Cargotor
Пасля працяглага візіту прэзідэнта Польшчы Анджэя Дуды ў Кітай стала вядома, што Варшава спрабуе ўздзейнічаць на Мінск праз Пекін. А пазней міністр Сікорскі яшчэ і заявіў, што Польшча «дзейнічае дзеля змякчэння напружання між Кітаем і ЗША». Ці сапраўды Польшча настолькі важны для Кітая партнёр, каб у Пекіне прыслухоўваліся да Варшавы? Што ўяўляе сабою гандлёвы абарот Польшчы з Кітаем? Давайце пабачым лічбы ў параўнанні з аналагічнымі паказчыкамі Беларусі.
У 2023 годзе гандлёвы абарот Польшчы з Кітаем склаў 54,7 мільярдаў долараў. Прычым, калі яго падзяліць на імпарт і экспарт, то заўважны катастрафічны дысбаланс на карысць Кітая.
Пры імпарце з Кітая на 51,3 мільярды Польшча экспартуе сваіх тавараў і паслуг толькі на 3,4 мільярды долараў (6,6% абароту гандлю).
Пасол Кітая ў Польшчы напярэдадні візіту прэзідэнта Польшчы Дуды ў Пекін выказаў задавальненне тым, што «Польшча стала самым вялікім гандлёвым партнёрам Кітая ў Цэнтральнай і Усходняй Еўропе».
Па яго словах, Кітай «актыўна падтрымлівае ініцыятывы польскага боку, якія датычаць мадэрнізацыі тэрміналу Малашэвічы і гатовыя да супрацоўніцтва ў гэтай сферы. Рост руху на тэрмінале падкрэслівае надзённую неабходнасць падтрымання бяспекі і стабільнасці міжнародных ланцужкоў паставак».
Як вядома, візіт Дуды закончыўся падпісаннем пагаднення аб дазволе экспарту польскай птушкі ў Кітай, што павінна трохі выправіць гандлёвы баланс.
У той жа час урад Польшчы заклапочаны нядобрасумленнай канкурэнцыяй і распрацоўвае новыя правілы, якія пакліканыя прымусіць кітайцаў прымяняць мясцовае заканадаўства, плаціць мытныя зборы і ПДВ.
Па фоне польскіх лічбаў гандлёвы баланс Беларусі з Кітаем выглядае больш збалансаваным. Але ён і значна меншы. Адпаведна, беларускі рынак менш важны для Кітая, чым польскі. У мінулым годзе гандлёвы абарот склаў 8,4 мільярды долараў. З іх экспарт беларускай прадукцыі склаў 2,6 мільярды (31%).
Ва ўмовах санкцый Беларусь істотна павялічыла таваразварот з Кітаем. Адпаведна інфармацыі кітайскай мытні, імпарт з Кітая ў Беларусь вырас амаль на 80%, а экспарт — на 44,5%.
Праўда, Кітай мала што купляе ў Беларусі, акрамя сыравіны: больш за палову беларускага экспарту складаюць калійныя ўгнаенні. Акрамя гэтага Кітай купляе ў Беларусі прадукцыю сельскай гаспадаркі і драўніну.
Калі ў цэлым параўнаць гандлёвыя балансы з Кітаем Польшчы і Беларусі, то розніца складзе 6,5 разоў. Пры гэтым у Польшчы пражывае ў 4,1 разы больш насельніцтва, чым у Беларусі (37,6 млн супраць 9,1 млн).
Як піша Obserwator Gospodarczy за першае паўгоддзе польскі экспарт у цэлым знізіўся на 10%, імпарт таксама зніжаецца, але не ў выпадку Кітая.
«Палякам падабаюцца тавары з Кітая», — заўважае выданне і адзначае, што на гэту краіну прыпадае 13,4% усяго аб'ёму польскага імпарту. І гэта толькі на 6,5% менш, чым з Германіі.
Ці наважыцца ў такой сітуацыі Польшча цалкам закрыць Малашэвічы, выклікае вялікія сумневы.
Кіраўнік МУС Польшчы не выключае закрыцця мяжы з Беларуссю
Чаму беларускія ўлады асцерагаюцца закрыцця мяжы з Польшчай?
Вось чаму ў Кітаі могуць прыслухоўвацца да Польшчы
Узмоцнены кантроль чыгункі на польскай мяжы спыніўся праз 33 гадзіны. Слова за Лукашэнкам