Hramadstva

Prarasijskaja aktyvistka aburyłasia, što nie moža apublikavać fota ź bieł-čyrvona-biełym ściaham

Elvira Mirsalimava z nahody 30-hodździa pieršaj inaŭhuracyi Łukašenki vyrašyła zapościć histaryčnaje fota. Voś tolki ściah joj daviałosia zamazać.

Hety skrynšot videa inaŭhuracyi apublikavała Elvira Mirsalimava. Adnak u siabie jana pakazalna nieakuratna zamazała nacyjanalny ściah

Prarasijskaja aktyvistka Elvira Mirsalimava nie zastałasia ŭbaku ad daty, jakuju šyroka adznačajuć łukašysty — 30 hadoŭ tamu adbyłasia pieršaja inaŭhuracyja Łukašenki.

Z hetaj nahody Mirsalimava apublikavała ŭ svaim telehram-kanale viadomaje histaryčnaje fota — na im Łukašenka staić pobač z na toj momant dziaržaŭnym bieł-čyrvona-biełym ściaham. Voś tolki ściah aktyvistka vyrašyła zamazać.

«A heta, usim viadomaje fota, ja mahu vykładvać tolki tak — zamazvajučy niekatoryja detali. Situacyja, daviedzienaja da absurdu», — panarakała Mirsalimava.

Sioleta prarasijskaja aktyvistka praviała dvoje sutak u IČU i atrymała štraf u 2600 rubloŭ za «niesankcyjanavany pikiet» — u tym liku za vyjavy ź bieł-čyrvona-biełym ściaham, jakija jana zabiaśpiečvała krytyčnymi ŭ dačynieńni da praciŭnikaŭ Łukašenki podpisami.

Paśla Mirsalimava skardziłasia, što prapahandystam, naprykład, Ryhoru Azaronku, možna publikavać u siabie ŭ kanałach vyjavy sa svastykaj i bieł-čyrvona-biełym ściaham, a jaje za heta pakarali.

Nahadajem, prarasijskaja častka łukašystaŭ adkryta kanfliktuje z hrupaj aficyjnych prapahandystaŭ. Nie tak daŭno Azaronak i Alaksiej Dziermant abvinavacili Mirsalimavu i danosčycu Volhu Bondaravu ŭ pracy na zamiežnyja śpiecsłužby.

Kamientary da artykuła