Biełarusaŭ prymušajuć pavieryć u fejk nakont škody ad vakcyny Pfizer
Śćviardžajecca, što vakcyny raspracoŭvajucca, kab vyklikać hłabalny ŭzryŭ sardečna-sasudzistych zachvorvańniaŭ i turba-raku. Što?
23.07.2024 / 13:34
Štab-kvatera Pfizer u Ńju-Jorku. Fota: Beata Zawrzel/NurPhoto via Getty Images
U telehram-kanale «MyBiełaruś», jaki maje amal 3000 padpisčykaŭ, niekalki dzion tamu źjaviłasia videa, u jakim pierakazvajecca zajava byłoha vice-prezident Pfizer Pitera Rosta (Peter Rost) ab tym, što «vakcyna stvorana, kab vyklikać prybytkovyja prablemy sa zdaroŭjem, jakija kampanija mahła b manietyzavać».
Aŭtary, spasyłajučysia na Rosta, śćviardžajuć, što Pfizer śpiecyjalna raspracoŭvaje vakcyny, kab vyklikać hłabalny vybuch sardečna-sasudzistych zachvorvańniaŭ i turba-raku. Što ŭ vyniku daść im miljardy vysokadachodnych pacyjentaŭ.
Pieršapačatkova videa źjaviłasia ŭ akaŭncie TPV Sean u tvitary, jaki napoŭnieny dopisami z teoryjami zmovy.
Voś adna cytata ź inšaha materyjału, jakaja jaskrava śviedčyć ab pohladach aŭtaraŭ:
«Nie słuchajcie Biła Hiejtsa, bujnuju farmaceŭtyku i asnoŭnyja srodki masavaj infarmacyi, pakolki jany ŭdzielničajuć u apieracyi pa jaŭhienicy i depapulacyi. Ich nieabchodna pryciahnuć da adkaznaści, kab rastłumačyć miljony śmierciaŭ ad vakcyn».
Kanał maje kala 32 tysiač padpisčykaŭ. Ale jaho materyjały z zadavalnieńniem pierapoščvajuć sajty i kanały, aŭtary jakich taksama vierać u teoryi zmovy.
Kadr videa kanała TPV Sean z «vykryćciom» kampanij-raspracoŭščykaŭ vakcyn
Pačniem z taho, što sam termin «turba-rak» (ahresiŭnaja forma raka, jakaja chutka raźvivajecca) nie adnosicca da miedycynskich i nie pryznany ŭ navukovaj supolnaści. Adnak jaho z zadavalnieńniem vykarystoŭvajuć u kantekście teoryj zmovy i dezynfarmacyi ab pabočnych efiektach vakcyn.
Sam Piter Rost daŭno ŭžo nie maje adnosin da Pfizer. Kampanija, u jakoj jon pracavaŭ jak kiraŭnik adzieła markietynhu, zvolniła mužčynu jašče ŭ 2005 hodzie. Paśla hetaha Rost nabyŭ viadomaść jak vykryvalnik, napisaŭ niekalki knih, staŭ vieści błoh i kansultavać pa sudovych raźbiralnictvach (sam jon prajšoŭ praź niekalki sudoŭ).
Jašče ŭ 2005 hodzie kampanija Pfizer raspaŭsiudziła zajavu ab tym, što ŭ Pitera Rosta niama adpaviednaj kvalifikacyi, kab havaryć ab lekach.
Adznačym, što kadry z zajavami Pitera Rosta źniatyja vielmi daŭno. Tak, adno vystupleńnie ŭvohule adnosicca da 2004 hoda.
Što tyčycca vakcyn, jakija vykarystoŭvajucca pry lačeńni COVID-19, to daśledavańnie Hłabalnaj sietki danych ab vakcynach, jakoje achapiła vosiem krain i 99 miljonaŭ vakcynavanych, pakazała, što jany efiektyŭna abaraniajuć ad ciažkich formaŭ zachvorvańnia, śmierci i praciahłych simptomaŭ chvaroby.
U toj ža čas aŭtary nie chavajuć taho faktu, što vakcyny byli źviazany ź nievialikim rostam nieŭrałahičnych, kryvatvornych i sardečna-sasudzistych zachvorvańniaŭ.
Vyniki daśledavańnia byli apublikavanyja ŭ krasaviku 2024 hoda ŭ časopisie Vaccine.
Aŭtary padkreślivajuć, što za apošnija try hady va ŭsim śviecie było ŭviedziena zvyš 13,5 miljarda doz vakcyn ad COVID-19, što vyratavała 1 miljon žyćciaŭ tolki ŭ Jeŭropie.
Tym nie mienš nievialikaja častka imunizavanych ludziej mieli ciažkija pabočnyja efiekty, što vyklikała sprečki ab karyści vakcynacyi. Adnak ni ab jakim «hłabalnym vybuchu sardečna-sasudzistych zachvorvańniaŭ i turba-raku» razmova nie idzie.
Pandemija skončyłasia, ale nastupstvy zastalisia. Što COVID-19 prynios Biełarusi?
Ci stała bolej paśla karanavirusa sardečna-sasudzistych zachvorvańniaŭ? Voś što zaŭvažyli biełaruskija daktary