Хто яна, новая жонка Сяргея Міхалка?
Калі музыка Сяргей Міхалок толькі пачаў з’яўляцца на публіцы ў кампаніі незнаёмай маладой дзяўчыны, многія фанаты задаваліся пытаннем: хто гэта, яго дачка, унучка ці дачка Святланы Зелянкоўскай? Пазней высветлілася, што гэта новая дзяўчына лідара Brutto і Ляпісаў. А сёння — яго законная жонка.
27.07.2024 / 15:20
«Наша Ніва» даведалася пра яе асобу крыху больш.
Новай абранніцай Сяргея стала ўкраінка Алена Варашыла. Дзяўчыне нядаўна споўнілася 30 год (Міхалку зараз 52). Родам яна з Чарнігава.
Сяргей Міхалок і яго новая жонка Алена. Фота: @lyapis98
Сям’я і сябры дзяўчыны пацярпелі ад вайны. Сам Міхалок расказваў пра гэта так:
«У Чарнігаве трапілі пад абстрэл сем'і маіх родных людзей. Там жывуць бацькі маёй Алёны. Мама — просты бібліятэкар. А ў яе найлепшай сяброўкі Марыны, якая будзе сведкай на нашым з Алёнай вяселлі, адарвала ногі. У таты адарвала ногі, ён яшчэ гадзіну трымаўся і памёр».
Міхалка і актрысу Святлану Зелянкоўскую лічылі ўзорнай парай, яшчэ ў 2019-м у іх нарадзіўся трэці сын. Але ў відэаінтэрв’ю праекту «Ток» Святлана падзялілася, што ўжо ў 2020-м іх стасункі пачалі руйнавацца:
«Шмат чаго — і палітычныя моманты ёсць, і мы змяніліся, аддаліліся неяк. Калі яшчэ кавід быў, мы пачалі аддаляцца. Нешта не вытрымала, значыць, скончыўся наш шлях».
Сяргей Міхалок і яго новая жонка Алена. Фота: @lyapis98
У 2022-м Міхалок пачаў публікаваць фотаздымкі з Аленай і ўпершыню прэзентаваў яе як нявесту. Цяпер яна ўжо носіць яго прозвішча.
Алена знялася ў кліпе «Ляпісаў» на ўкраінскую версію песні «Гары»
Па апошніх звестках, сям’я асела ў Эстоніі. У тым ліку з імі пражываюць сыны Міхалка ад Зелянкоўскай. Сама Святлана знаходзіцца ў Польшчы і пры любой магчымасці наведвае дзяцей.
Алена і тры сыны Сяргея ад Святланы Зелянкоўскай. Фота: @lyapis98
Бліжэйшыя канцэрты Міхалка і «Ляпісаў» запланаваныя ва Украіне: усе песні там будуць гучаць на ўкраінскай мове. Артыст актыўна збірае грошы для патрэбаў УСУ і ахвяруе грамадзянскім: так, пасля трагедыі з дзіцячай лякарняй «Ахматдзет» ён перавёў на яе аднаўленне сто тысяч грывень (амаль $2500).
Амаль у той самы час Trubetskoy з Паўлам Булатнікавым плануе святкаваць дзесяцігадовы юбілей праекта ў Маскве.
Як цяпер выглядае Сяргей Міхалок ФОТА