Kiroŭca Śledčaha kamiteta danosiŭ na pratestoŭcaŭ u 2020-m. A jašče zajmaŭsia machlarstvam i źlivaŭ paliva
Niahledziačy na vializarnuju škodu, «samy humanny biełaruski sud» vyrašyŭ nie adpraŭlać Alaksandra Praśniaka ŭ kałoniju. U SIZA jon taksama nie byŭ.
26.07.2024 / 08:00
Alaksandr Praśniak. Fota ź jahonaj staronki ŭ Adnakłaśnikach
Alaksandru Praśniaku 36 hadoŭ. Rodam jon z ahraharadka Bacevičy Kličaŭskaha rajona.
Niezrazumieła, dzie jon vučyŭsia, ale viadomyja dva miescy pracy Praśniaka: kiroŭca ŭ Śledčym kamitecie (jak minimum u 2020-2022), a z 2023-ha — kiroŭca ŭ «Biełaŭtaturyście». Apošniaja kampanija zajmajecca arhanizacyjaj turaŭ, trymaje sietku haścinicaŭ i turbazaŭ.
Adznačyŭsia Praśniak u 2020-m. Tady jon pazvaniŭ u milicyju i danios, što 15 listapada, u dzień pamiaci zabitaha Ramana Bandarenki, pažyły mužčyna z unukam stajali na moście praz MKAD i vitali mašyny, jakija jechali i sihnalili.
A niadaŭna jaho asudzili.
Reč u tym, što pad čas pracy kiroŭcam u SK Praśniak napazyčaŭ hrošaŭ u siabra T. pad roznymi nahodami — apłaty žytła, uniasieńnia płaty pa ipatecy, kupli detalaŭ i dapamohi z nabyćciom śpisanaj techniki Śledčaha kamiteta. Ahułam — $12 300. Jon ža napazyčaŭ u roznych ludziej jašče paru tysiač dalaraŭ.
Paśla, kali pracavaŭ u «Biełaŭtaturyście», jon źlivaŭ paliva, jakoje pradavaŭ svaim znajomym. Ahułam źliŭ 300 litraŭ na 708 rubloŭ.
Sam Praśniak patłumačyŭ, što padčas pracy ŭ SK jon paznajomiŭsia z T., jaki prapanavaŭ jamu adkryć STA. Jon pazyčyŭ $4250 i ŭkłaŭsia, ale chutkaha prybytku nie atrymałasia. Praśniak, maŭlaŭ, akazaŭsia ŭ ciažkim stanoviščy — na im paviśli daŭhi, dvoje dziaciej, žonka, arenda i ramont u chacie.
Alaksandr Praśniak z žonkaj. Fota z Ukantakcie
Paśla jon pazyčaŭ u T. hrošy. Paśla taho, jak jon nadakučyŭ T., to kab atrymać hrošy, prydumaŭ bajku pra toje, što moža dapamahčy kupić śpisanyja aŭtamabili SK. I ŭziaŭ na heta jašče $3800.
Dalej jon nie prydumaŭ ničoha lepšaha, čym pačać pazyčać va ŭsich zapar — znajomych, susiedziaŭ i kalehaŭ… Ale doŭh nie było čym hasić, tamu Praśniak nikomu ničoha nie viartaŭ. Dla salidnaści ŭsim kazaŭ, što niečuvanyja bahaćci pad pracentam u banku, ale jak tolki padydzie termin, to jon adrazu addaść hrošy. A paralelna braŭ jašče i «chutkija kredyty».
U vyniku niekalki čałaviek źviarnulisia ŭ milicyju, i ŭ adnosinach Praśniaka zaviali spravu. Pad čas rasśledavańnia ŭskryłasia jašče i toje, što jon źlivaŭ paliva.
Da suda były kiroŭca SK byŭ pad padpiskaj ab niavyjeździe, choć i ździejśniŭ ciažkaje złačynstva.
Jaho abvinavacili pa troch artykułach — «prysabiečvańnie abo rastrata» (č. 2 art. 211 KK) i «machlarstva» (č. 2 i 3 art. 209 KK). Praśniaku pahražała da siami hadoŭ kałonii i štraf.
Na sudzie da jamu vystavili pazovaŭ na $14 200. Taksama ŭ Praśniaka zapatrabavali maralnyja kampiensacyi — pryčym nie tyja, chto najbolš paciarpieŭ, a jahonyja byłyja kalehi. Adzin ź ich, B., paprasiŭ 20 tysiač rubloŭ, choć pazyčyŭ Praśniaku ŭsiaho 400 rubloŭ.
U jakaści źmiahčalnych abstavinaŭ u sudzie prahučała toje, što ŭ Praśniaka dvoje dziaciej, što jon pakajaŭsia, a taksama što addaŭ 700 rubloŭ «Biełaŭtaturystu». U jakaści abciaržarvajučaj akaličnaści — toje, što jon parušyŭ prysiahu.
U vyniku Praśniak atrymaŭ 5 hadoŭ chimii z pazbaŭleńniem zvańnia «staršy praparščyk justycyi zapasa». Taksama jon pavinien viarnuć pazyčanaje. Kampiensacyja maralnaj škody byłym kaleham skłała sumarna 1000 rubloŭ. B., jaki prasiŭ 20 tysiačaŭ, atrymaje tolki 100 rubloŭ.
Paśla suda Praśniaka pakinuli z zabaronaj na vyjezd ź Biełarusi.
Asudzili milicyjaniera z elitnaha padraździaleńnia. Jon chadziŭ pa vioscy biez trusoŭ