Pamiatajecie kamunista Ciuchaja, adyjoznaha funkcyjaniera BRSM? Jaho sudziać za zdradu dziaržavie — da 25 hadoŭ źniavoleńnia
U 2020 hodzie jon dapamahaŭ milicyi patrulavać vulicy, kab łavić udzielnikaŭ pratestaŭ.
Uładzimiru Ciuchaju 37 hadoŭ. Jon skončyŭ pryvatny VNU — Instytut parłamientaryzmu i pradprymalnictva.
Pieršuju viadomaść Ciuchaj atrymaŭ u 2008-m. Tady jon byŭ sakratarom minskaj kamunistyčnaj partyi i supracoŭnikam BRSM. Dziela taho, kab svajaki i paplečniki palitviaźnia Alaksandra Barazienki nie mahli prajści na sud, jon całkam zabiŭ zału studentami minskich VNU. U adkaz na abureńnie maci palitviaźnia jon šturchnuŭ jaje tak, što jana ŭpała na ruki muža. Anijakaj adkaznaści za heta nie panios.
Paźniej Ciuchaj bałatavaŭsia ad Kamunistyčnaj partyi ŭ deputaty. Pierad vybarami Łukašenki ŭ 2010-m jaho spačatku zaprasili ŭ Usiebiełaruski narodny schod, paśla jon udzielničaŭ u składzie vybarčaj kamisii. U intervju, jakoje jon daŭ pierad vybarami, Ciuchaj raspaviadaŭ pra toje, što jany «demakratyčnyja i prazrystyja», a «tak zvanyja pradstaŭniki demakratyčnaj apazicyi tolki lijuć brud na svaju krainu». U pieramozie Łukašenki jon nie sumniavaŭsia.
Padziei 19 śniežnia 2010 jon nazvaŭ «pravakacyjaj pjanych małojčykaŭ, jakich viali palityčnyja bankruty». Brutalny razhon Płoščy i represii, jakija adbylisia paśla, Ciuchaj horača padtrymaŭ.
U 2013-m Ciuchaj znoŭku askandaliŭsia. Žodzinskija łaŭcy piedafiłaŭ śćviardžali, što złavili jaho na žyŭca, kali viali pierapisku ad imia 15-hadovaha chłopca, jaki zaprasiŭ funkcyjaniera BRSM na «haračuju noč». Pry sustrečy ŭ Ciuchaja pry sabie byccam znajšli intymnuju zmazku i preziervatyvy. Sam jon heta admaŭlaŭ.
Paśla Ciuchaj na niejki čas źnik z radaraŭ.
Viadoma, što jon zaniaŭsia biznesam, byŭ dyrektaram kampanii CVR «Kastryčnicki» i AAT «Vydaviecki dom «ViAłVi»». Pieršaja zajmajecca stvareńniem sajtaŭ i prahramaŭ dla dziaržorhanaŭ, a taksama ŭpisałasia ŭ hrantavy dziaržaŭny prajekt pa papularyzacyi ŭnutrybiełaruskaha turyzmu «Prystaličča» i stvaryła prahramu «QR-hid», kartu turystyčnych słavutaściaŭ Biełarusi.
Druhaja stvaraje katałoh biełaruskich biznesaŭ Exportofby i kalendary «Ziamla biełaruskaja».
Praŭda, i «hramadskuju pracu» Ciuchaj nie kinuŭ. Naprykład, jon uznačalvaŭ Kaardynacyjnuju radu hramadskich abjadnańniaŭ, palityčnych partyj i prafsajuzaŭ Kastryčnickaha rajona Minska. Taksama kiravaŭ savietam hramadskaha punkta achovy pravaparadku (heta słavutyja «družyńniki»), udzielničaŭ u dziejnaści miascovych orhanaŭ samakiravańnia.
U 2020-m mužčyna dapamahaŭ milicyi patrulavać vulicy. Jon žaliŭsia telekanału ANT, što «nie moža vyjści ź siamjoj na vulicu ŭ niadzielu». Tamu, maŭlaŭ, jon i jašče dzieviać jaho pryjacielaŭ ustupili ŭ družyny, kab «adsočvać, ci nie prachodzić niedzie niesankcyjanavanaje mierapryjemstva».
Paśla Ciuchaj vystupaŭ na roznych dyjałohavych placoŭkach i praŭładnych mierapryjemstvach, pradstaŭlali jaho jak «palitołaha». Paŭdzielničaŭ jon i ŭ VNS u 2021-m. Apošniaja ŭzhadka pra jaho, jakuju my adšukali — vystup u 2022-m hodzie.
Va «Ukantakcie» Ciuchaj byŭ apošni raz anłajn u lipieni 2022 hoda. Jaho telefonny numar, jakim jon karystaŭsia ŭsio darosłaje žyćcio, nieaktyŭny.
Data jaho aryštu i sens vystaŭlenych abvinavačvańniaŭ nieviadomyja.
U žniŭni 2023 hoda partniory Ciuchaja pa vydavieckim domie «ViAłVi» źviartalisia ŭ sud, kab prymusić jaho zrabić niejkija źmieny ŭ statutnyja dakumienty kampanii. Čym skončyŭsia praces, nieviadoma, jak i niezrazumieła, ci na toj momant Ciuchaj užo byŭ u źniavoleńni.
Tak ci inačaj, 21 červienia 2024 hoda byłoha funkcyjaniera BRSM i Kampartyi pačnuć sudzić pa dźviuch častkach artykuła «Zdrada dziaržavie», a taksama ŭ «prymusie asoby da ŭdziełu ŭ złačynnaj dziejnaści z prymianieńniem hvałtu abo źniščeńniem majomaści».
Niezrazumieła, ci jość u spravie palityčny składnik. Ahułam Ciuchaju pahražaje da 25 hadoŭ kałonii.
«Naša Niva» — bastyjon biełaruščyny
PADTRYMAĆ
Kamientary