Kaho pryznali najlepšymi skulptarami Biełarusi 2024 hoda? Voś jak vyhladajuć ich tvory
Mikita Monič padrychtavaŭ ahlad prac, jakija pieramahli na vystavie «Art-Minsk-2024».
26.07.2024 / 21:28
Fiodar Šurmialoŭ. Minataŭr. Fota: artcenter.by
Sioleta na vystavie «Art-Minsk» było 450 tvoraŭ, što mienš, čym u minułyja hady. Dziasiatki mastakoŭ i skulptaraŭ trapili ŭ čornyja śpisy, im nie dazvalajuć vystaŭlacca. A što było admietnaha siarod tych, chto na vystavie ŭsio ž apynuŭsia? Ź pieramožcami hladackaha hałasavańnia mastactvaznaŭca Mikita Monič znajomić u novym vypusku svajho jutub-kanała.
Monič źviartaje ŭvahu, što hledačy hałasavali nie za tvory, a za aŭtaraŭ, tamu nie zaŭsiody zrazumieła, što z pradstaŭlenych tvoraŭ kankretnaha ŭdzielnika vystavy spadabałasia bolš.
Pieršym u śpisie pieramožcaŭ u naminacyi «Skulptura» znachodzicca pastajanny ŭdzielnik vystaŭ Fiodar Šurmialoŭ, jaki prezientavaŭ svaju hrafiku i skulpturu.
«Tvory Šurmialova — heta prastora dla interpretacyi», — adznačaje mastactvaznaŭca i pryvodzić svaju interpretacyju tvora: «Heta nie sam źvier, a jahony škilet, ažyŭleny kaściak. Peŭna, jon ujaŭlaje saboju padniataha z paśmiercia monstra, užo zabitaha hierojem. Ale, vidać, nie da kanca. Ciažka ŭstrymacca ad asacyjacyj».
Nastupnym pieramožcam staŭ Alaksandr Šapo, jaki taksama praktykuje jak u hraficy, tak i ŭ manumientalnaj skulptury. Monič źviartaje ŭvahu na skulpturu «Chłopčyk sa Śmiłavič» — heta skulpturny partret mastaka Chaima Sucina, hienija rodam ź Biełarusi.
Alaksandr Šapo. Chłopčyk sa Śmiłavič. Fota: artcenter.by
«Aŭtar udała pieranios ekspresiju aŭtapartreta ŭ bronzu», — ličyć mastactvaznaŭca.
Treciaje miesca ŭ naminacyi «Skulptura» zaniaŭ Andrej Biele, jaki naradziŭsia ŭ Minsku, ale stała žyvie ŭ Rasii. Akramia skulptury, mastak stvaraje partrety i naciurmorty.
Andrej Biele. Amatarka churmy. Fota: artcenter.by
Nastupnym u śpisie najlepšych staŭ Jan Basałyha, jaki naležyć da treciaha pakaleńnia vialikaj tvorčaj dynastyi karaniami sa Słuččyny.
Jan Basałyha. Čajnik vina. Fota: artcenter.by
«U tvorach Jana Basałyhi strymany ekspresijanizm, razvažańni pra čałaviečyja pačućci i spałučeńnie čałaviečych tvaraŭ i rečaŭ. Tvory ŭ jaho niakidkija, ale źmiastoŭnyja. I materyjał jon biare sabie nie taki efiektny, jak papiarednija tvorcy. Zamiest ambicyjnaj važkaj bronzy — kieramika», — daje svaju acenku Monič.
Pa słovach mastactvaznaŭcy, vielmi kantrasnaj da tvoraŭ Basałyhi vyhladaje stylistyka piataha pieramožcy. Im staŭ mastak Dźmitryj Čužakoŭ, jaki pracuje pad psieŭdanimam DSNT 87.
Dźmitryj Čužakoŭ. Scull Cat 80. Fota: artcenter.by
Jak zaŭvažaje Monič, Čužakoŭ pačynaŭ jak vuličny mastak i aŭtar hrafici. Papiaredni dośvied vyliŭsia ŭ ekśpierymienty z abstrakcyjaj, arnamientalnaściu, śvietłavymi prajekcyjami. Ciapier Čužakoŭ stvaraje pano i skulptury, u jakich dobra bačna zachapleńnie mastaka anime.
«Usie naminanty stvarajuć koła tvorčaj aktyŭnaści, nazirajučy jakoje možna zrazumieć štości važnaje ab stanie našaha hramadstva i krainy», — padvodzić vyniki Mikita Monič.
Ułady tak začyścili vystavu «Art-Minsk», što navat łukašenkaŭcam nie padabajecca
«Praduktovy hipierrealizm — toje, za što hałasuje bolšaść». Monič pra mastackija husty ŭ hramadstvie
Jany malavali Biełaruś. Mikita Monič skłaŭ panteon biełaruskich mastakoŭ VIDEA