Расказваем, хто тая 50-гадовая мінчанка Аксана, якую затрымалі па вяртанні з Польшчы
Губазікаўцы называюць яе адміністратаркай чата беларусаў Каліша, але гэтаму няма пацверджанняў.
26.07.2024 / 07:00
Аксана Нахайка. Фота з яе старонкі Укантакце
Дзякуючы праекту DIT мы высветлілі, што затрыманую клічуць Аксана Нахайка. Ён 50 годаў, яна родам з Мінска. Нахайка доўга працавала бібліятэкарам у Нацыянальнай бібліятэцы, пасля ў страхавых кампаніях і турфірмах.
Невядома, калі яна пераехала ў Польшчу, але ў чат «Беларусы Каліша» ўступіла ў снежні 2023-га. Вядома, што ў польскім горадзе Каліш яна працавала ў невялікай краме.
Аксана вельмі актыўная: удзельнічае ў квізах і мерапрыемствах, любіць доўгія вандроўкі і веламарафоны. Тое самае яна пісала і ў чаце — распавядала пра тое, куды можна схадзіць у горадзе і спрабавала дапамагчы беларусам у іх патрэбах.
Аксана Нахайка падчас веламарафона. Фота з яе старонкі Укантакце
Адзначым, што ў чаце не абмяркоўваюцца палітычныя навіны і гэта адзначана ў правілах. Уся «палітыка» адтуль выдалялася. Але гэта не абараніла Аксану ад затрымання.
У відэа ГУБАЗіК Нахайка кажа, што «была адміністратарам чата «Беларусы Каліша»». Мы не ведаем, ці гэта праўда, губазікаўцы не публікуюць аніякіх доказаў. У той жа час Нахайка ў чаце пісала ад сябе, а адміністратар пісаў ад акаўнта чата. Пры гэтым у тэлеграме можна назначыць чалавека «адміністратарам» дзеля таго, каб дадаць яму подпіс у самім чаце і не даваць адміністратарскіх правоў.
У самім чаце ў найлепшыя часы было 60 чалавек, але, зразумела, цяпер частка людзей выйшла адтуль.
Невядома, што цяпер з Аксанай і ў чым яе вінавацяць.
Затрымалі адміністратара чата беларусаў Шры-Ланкі. За чат на 90 чалавек яму пагражаюць крыміналкай
Прадпрымальніка, якога затрымалі па вяртанні з-за мяжы, асудзілі да дзевяці гадоў калоніі за данаты
Што новага правяраюць у тэлефонах на мяжы пры вяртанні ў Беларусь