Eks-dziaržsakratar ZŠA apublikavaŭ imavierny mirny płan Trampa pa Ukrainie. Što ŭ im?
Niama nijakich dokazaŭ namieru Trampa ŭ vypadku prychodu da ŭłady schilić Ukrainu da kapitulacyi.
26.07.2024 / 09:56
Donald Tramp. Rebecca Blackwell / AP
Były dziaržsakratar ZŠA Majk Pampiea, jaki zajmaŭ hetuju pasadu ŭ 2018-2021 hadach i, miarkujučy pa publikacyjach ŚMI, da hetaha času zachoŭvaje suviaź z Donaldam Trampam, apublikavaŭ u The Wall Street Journal kałonku «Mirny płan Trampa dla Ukrainy». U joj jon apisvaje, jak «moža vyhladać paśpiachovy płan dla Ukrainy», piša «Ahienctva»
Siarod punktaŭ — uzmacnieńnie sankcyj suprać Rasii, źniaćcie abmiežavańniaŭ na pastaŭki zbroi Ukrainie i admiena abmiežavańniaŭ na jaje vykarystańnie, prahrama lend-lizu na 500 młrd dalaraŭ, ustupleńnie Ukrainy ŭ ES i NATA.
U kałoncy, jakuju Pampiea napisaŭ sumiesna z byłym daradcam pieradvybarčaj kampanii Trampa Devidam Urbanam, havorycca, što niama nijakich dokazaŭ namieru Trampa ŭ vypadku prychodu da ŭłady schilić Ukrainu da kapitulacyi.
Naadvarot, mienavita Tramp padčas svajho prezidenctva źniaŭ zabaronu, uviedzienuju papiaredniaj administracyjaj, na pastaŭki Kijevu rakiet Javelin.
«U toj čas jak Bajden uviazaŭsia ŭ vajnu z-za słabaści, Tramp moža adnavić mir z dapamohaj siły», — havorycca ŭ kałoncy.
Paśla hetaha ŭ tekście pieraličvajucca kankretnyja punkty prahramy, jakija, na dumku aŭtaraŭ, moža vykanać Tramp:
Uviadzieńnie «realnych sankcyj» suprać Rasii. Aŭtary pišuć, što biahučyja sankcyi «dobra hučać na papiery, ale pustyja [pa sutnaści]»: naprykład, rasijskija banki vyzvaleny ad abmiežavańniaŭ, kali ich dziejnaść źviazana z prodažam enierhanośbitaŭ.
Źniaćcie ŭsich abmiežavańniaŭ na typy zbroi, jakija Ukraina moža atrymlivać i vykarystoŭvać. Heta, jak pišuć aŭtary, adnović pazicyi Ukrainy i stvoryć situacyju, pry jakoj Kreml sutykniecca z rostam vydatkaŭ i akažacca ŭ situacyi, kali jaho pieramoha niemahčymaja. Heta prymusić Pucina zrazumieć, što vajna pavinna skončycca, dadajuć aŭtary kałonki.
Zapusk prahramy lend-liza na 500 młrd dalaraŭ. «Zamiest taho, kab abciažarvać padatkapłacielščykaŭ ZŠA novymi rachunkami, dazvolcie Ukrainie zaniać stolki hrošaj, kolki joj treba, kab kupić amierykanskuju zbroju», — pišuć aŭtary. Tak, na ich dumku, možna pasłać «vyrazny sihnał» Pucinu, «što jon nikoli nie pieramoža».
Taksama płan praduhledžvaje «aktyvizacyju NATA», u tym liku prymus krain Jeŭropy da vydatkaŭ na abaronu ŭ 3% ad VUP; raźvićcio abaronnaj pramysłovaści ZŠA («My pavinny pakazać našym supiernikam, asabliva Rasii i Kitaju, što jany nie mohuć kankuravać z abaronnymi mahčymaściami ZŠA»), adnaŭleńnie adnosin z Saudaŭskaj Aravijaj i Izrailem, jakoje pavinna stabilizavać Blizki Uschod i daść saudytam mahčymaść dałučycca da Vašynhtona ŭ sprobie vycieśnić Maskvu z enierhietyčnych rynkaŭ; a taksama «raskryćcio enierhietyčnaha patencyjału Amieryki» — hety punkt aŭtary nie rasšyfroŭvajuć, ale adznačajuć, što jon pryviadzie da źnižeńnia cenaŭ, što skarocić biudžet Rasii na vajennyja vydatki.
Usie hetyja kroki, jak pišuć aŭtary, pavinny dazvolić Trampu pastavić umovy nieadkładnaha spynieńnia ahniu.
U hetym vypadku ŭ Kijeva źjaviacca značnyja siły dla abarony, nichto nie pryznaje akupacyju Rasijaj ukrainskich terytoryj, a Ukraina zmoža adnavicca za košt reparacyj z zamarožanych srodkaŭ rasijskaha CB.
Paśla hetaha Ukraina pavinna jak maha chutčej ustupić u NATA, a aljans — stvaryć fond na 100 młrd dalaraŭ dla jaje ŭzbrajeńnia, pišuć aŭtary. Jeŭrasajuz taksama pavinien być «chutka pryniać Ukrainu» i dapamahčy joj z ekanamičnym raźvićciom.
Kali Rasija budzie vykonvać usie ŭmovy, Zachad pastupova zdymie ź jaje sankcyi, pišuć aŭtary. Jany buduć poŭnaściu źniaty, kali Ukraina ŭvojdzie ŭ ES i NATA.
Siarod zachodnich analitykaŭ raspaŭsiudžanaje mierkavańnie, što Tramp bolš prydatny kandydat dla Pucina (choć toj i kaža publična advarotnaje). Adnak apisany Pampiea i Urbanam «płan Trampa» naŭrad ci spadabajecca ŭ Kramli.
Siarod zarehistravanych vybarcaŭ za Trampa 48%, za Charys 46% — apytańnie New York Times
Borys Džonsan raskazaŭ, u čym źmiest mirnaha płana Donalda Trampa pa Ukrainie
Kamała Charys aficyjna zajaviła, što idzie ŭ prezidenty