Stała viadomaja asoba administratara kanała vahnieraŭcaŭ Grey Zone, jaki zahinuŭ u Mali. Raskazvajem pra jaho
Jahonaje imia nazvali najmity-nieanacysty z DŠRH «Rusič».
28.07.2024 / 03:18
Mikita Fiadzianin. Fota ź jahonaj staronki Ukantakcie
Mikitu Fiadzianinu było 29 hadoŭ. Rodam jon ź Lipiecka, a viadoma pra jaho niašmat.
Fiadzianin byŭ hiendyrektaram dźviuch kampanij u Maskvie: «Aliveta», jakaja isnavała z 2015 pa 2019 hod i zajmałasia prybirańniem pamiaškańniaŭ i prodažam aŭto, a taksama «Hłobał sistems», jakaja isnavała z 2015 pa 2017 hod i ŭ jakoj byli paznačanyja ažno 68 vidaŭ dziejnaści. Akramia taho, jon byŭ zasnavalnikam jašče dźviuch užo likvidavanych kampanij: «Anit-20» i «Łontas».
Niezrazumieła, sprabavaŭ Fiadzianin stvaryć biznes i jon prahareŭ, ci jon byŭ prosta padstaŭnoj asobaj. U apošnich bazach ź miescami pracy jon nazyvaŭ siabie «ajci-śpiecyjalistam» dy «smmščykam», ale heta było ŭžo paśla stvareńnia kanała.
Čas, kali Fiadzianin pajšoŭ na vajnu, nieviadomy, viadoma zatoje, što ź lipienia 2022 da prynamsi siaredziny minułaha hoda jon mieŭ peŭnyja daŭhi, jakija jon čamusić nie hasiŭ. U druhoj pałovie 2023-ha ich było 448936 rasijskich rubloŭ (ad 4500 da 5100 dalaraŭ pavodle tahačasnaha kursu).
Mikita Fiadzianin. Fota ź jahonaj staronki Ukantakcie
Fiadzianin zasnavaŭ kanał Grey Zone u 2019 hodzie. Z adnosna nievialikaha prajekta jon vyras u adzin z najbolšych i ŭpłyvovych pravahnieraŭskich kanałaŭ. Akramia raspalvańnia varožaści i publikacyi zabojstvaŭ ukrainskich vajskoŭcaŭ, hety kanał ź pieršych vusnaŭ aśviatlaŭ miaciež Pryhožyna i vydavaŭ šmat insajdaŭ.
Kanał navat traplaŭ u niamiłaść da rasijskaha hienštaba za zališnie aktyŭnuju krytyku rasijskaha kamandavańnia.
Fiadzianin taksama byŭ vielmi aktyŭny ŭ internet-kamientavańni. Tolki z pačatku hetaha hoda sa svajho asnoŭnaha telehram-akaŭnta jon pakinuŭ pad 30 tysiač paviedamleńniaŭ. Tam jon raskazvaŭ pra słužbu ŭ Afrycy, publikavaŭ roznyja bajki z frontu i žarty.
Tam ža jon taksama šmat krytykavaŭ kamandavańnie, naprykład, pisaŭ, što ŭ płanie apieracyj u tyle «praciŭnik (ukraincy) ŭ dziesiać razoŭ pieraŭzychodziać nas (rasijan)», abo chvaliŭ taktyku «Azova». Apošniaje paviedamleńnie ad jaho źjaviłasia 20 lipienia, u kanale — 23-ha.
Dniami ŭ składzie atrada «Vahniera» Mikita Fiadzianin zahinuŭ padčas zładžanaj tuarehami zasady ŭ Mali. Jahonaje cieła trapiła na videa, jakoje raspaŭsiudžvajecca ŭ internecie. Asobu mužčyny raskryli najmity DŠRH «Rusič», jakija prytrymlivajucca nieanacysckich pohladaŭ.