U Francyi aryštavali ŭltralevaha aktyvista. Jaho padazrajuć u dyviersijach na čyhuncy
Tym časam, u paniadziełak u niekalkich rajonach Francyi byli ździejśnieny novyja dyviersii na optavałaknovych kabielach.
29.07.2024 / 12:31
Ilustracyjnaje fota: Francois Lochon / Gamma-Rapho via Getty Images
Ułady aryštavali aktyvista ŭltralevaha ruchu na abjekcie, jaki naležyć čyhunačnaj kampanii SNCF; jaho padazrajuć u aktach sabatažu, jakija niekalki dzion tamu paralizavali pracu sietki, paviedamlaje Bi-bi-si.
Mužčynu zatrymali ŭ narmandskim Uasieli na poŭnačy Francyi ŭ niadzielu, u jaho byli klučy ad techničnych pamiaškańniaŭ SNCF, instrumienty i litaratura, źviazanaja z ultralevymi ruchami, paviedamlajuć krynicy ŭ palicyi.
Pakul rana kazać, ci źviazany hety čałaviek z aktami sabatažu, jakija paralizavali francuzskuju čyhunačnuju sietku ŭ minułuju piatnicu. Zaraz hety čałaviek dapytvajecca francuzskaj palicyjaj.
Tym časam, u paniadziełak u niekalkich rajonach Francyi byli ździejśnieny novyja dyviersii na optavałaknovych kabielach.
Telekamunikacyjnyja abjekty, jakija naležać francuzskaj kampanii SFR, padvierhlisia aktam vandalizmu ŭ noč na paniadziełak, paviedamlaje Le Parisien.
Pa danych vydańnia, u roznych rajonach Francyi byli pierarezany kabieli ŭ elektryčnych šafach, što paŭpłyvała na pracu fiksavanaj suviazi. Na hety momant nieviadoma, ci jość suviaź pamiž aktami vandalizmu na abjektach telekamunikacyj i dyviersijami na čyhunačnaj sietcy na minułym tydni.
Ministr unutranych spraŭ Francyi Žerald Darmanien zajaviŭ u paniadziełak, što pravaachoŭnyja orhany «vyjavili peŭnuju kolkaść profilaŭ», jakija mahli ździejśnić dyviersiju ŭ noč na piatnicu suprać čyhunačnaj infrastruktury.
«Heta tradycyjnyja mietady ŭltralevych, i niekatoryja ludzi mohuć być źviazanyja z hetymi ruchami, ale ja pačakaju, pakul nie pastupiać usie elemienty rasśledavańnia», — skazaŭ ministr u efiry telekanała France 2, kažučy pra akty sabatažu, jakija adčuvalna ŭskładnili ruch transpartu pierad cyrymonijaj adkryćcia Alimpijady.
U dzień adkryćcia Alimpijady ŭ Paryžy 26 lipienia Nacyjanalnaja kampanija čyhunak Francyi (SNCF) paviedamiła ab sieryi padpałaŭ sistem puciavoj sihnalizacyi. Mnohija ciahniki byli zatrymanyja ci admienienyja. Incydent zakranuŭ kala 800 tysiač pasažyraŭ.
U paniadziełak u ministerstvie transpartu paviedamili, što ŭsie vysakachutkasnyja maršruty ciahnikoŭ adnavili pracu ŭ narmalnym režymie.
U dzień cyrymonii adkryćcia Alimpijady ŭ Francyi adbylisia dyviersii na čyhuncy
Pastanoŭščyk cyrymonii adkryćcia Hulniaŭ u Paryžy adkazaŭ na krytyku
Tyniejdžarka ź Japonii stała alimpijskaj čempijonkaj u 14 hod. Pryčym u jakoj dyscyplinie!
Alimpijskaha kamientatara Eurosport adchilili ad pracy za seksisckaje vykazvańnie ŭ efiry