«Dedpuł i Rasamacha». Absalutna adbity film, jaki ŭsim spadabajecca
Stary Łohan paŭstaje z mahiły, kab razam z admarozkam u čyrvonym kaściumie razvalić kinasuśviet supierhierojaŭ i vyratavać naša leta.
02.08.2024 / 22:08
Chto moža vystajać suprać pary bieśśmiarotnych supierludziej, adzin ź jakich Chju Džekman? Kadr ź filma
26 lipienia adbyłasia suśvietnaja premjera filma «Dedpuł i Rasamacha» (Deadpool & Wolverine), jaki źniaŭ Šon Levi. U kinateatrach Biełarusi prakat filma pačniecca z 3 žniŭnia.
Heta ŭžo treci zapar film Levi, dzie ŭ hałoŭnaj roli vystupaje jahony ziamlak Rajan Rejnalds paśla «Hałoŭnaha hieroja» (2021) i «Prajekta «Adam» (2022).
Hrymučaja sumieś samaha admarožanaha antyhieroja i ŭlubionca ŭsich časoŭ u suśviecie Marvel nie mahła nie vybuchnuć — i jana vybuchnuła. Film za debiutny ŭikend sabraŭ rekordnuju kasu, całkam akupiŭšysia litaralna za paru dzion. Heta najlepšy vynik u historyi dla filmaŭ z rejtynham R i najlepšy siarod filmaŭ pra Ludziej Iks. I heta tolki pačatak.
Film pačynajecca scenaj, jak Dedpuł (Rajan Rejnalds) raskopvaje mahiłu Rasamachi (Chju Džekman), jaki zahinuŭ pa siužecie filma «Łohan» 2017 hoda, kali abaraniaŭ dziaŭčynku, svajho hienietyčnaha kłona. Ale ŭ mahile, niahledziačy na zvyšnaturalnuju zdolnaść Rasamachi da rehienieracyi, tolki jahony adamantavy škilet z reštkami zhniłaj płoci. Kaściakom pamierłaha hieroja jon vyrubaje atrad «statystaŭ», pasłanych pa jahonuju hałavu. U chod iduć i adamantavyja kipci, i rebry, i ściahno, a chrybietnikam z čerapam Łohana jon, jak mołatam, rastruščvaje mazhi i pramiežnaści ŭsim navokał.
Tancavalny boj Dedpuła z kostkami Łohana pad trek Bye Bye Bye užo zavirusiŭsia ŭ sacsietkach. Kadr ź filma
Ahidnaje apahańvańnie mahiły z elemientami niekrafilii pad nastalhičny trek Bye Bye Bye hurta NSYNC — litaralna adlustravańnie taho, što zrobić film z suśvietam Marvel.
Jak Dedpuł da takoha dakaciŭsia? Seksualna zakłapočanamu bałbatunu ŭ čyrvonym abciahvalnym kaściumie paščaściła tolki ź nievierahodnaj žyvučaściu, jakaja daje jamu amal poŭnuju bieśśmiarotnaść, va ŭsim inšym jon niaŭdačnik: u šnarach, ź vidavočnymi psichičnymi razładami, jon nie moža znajści sabie miesca siarod zvyčajnych supierhierojaŭ, i navat dziaŭčyna Vanesa (Marena Bakaryn), dla vyratavańnia jakoj jon skarystaŭsia pieramiaščeńniem u časie, jaho kidaje.
Uejd Uiłsan u kampanii siabroŭ-dzivakoŭ. Kadr ź filma
«Ja malusia kožny srany dzień, kab Djabał ciabie zabraŭ i skončyŭ toje, na što Bohu jajcaŭ nie chapiła», — kaža jahonaja lubimaja ślapaja susiedka Eł (Łeśli Ahams).
Uejd Uiłsan, jaki chavajecca pad maskaj Dedpuła, pieražyvaje kryzis siaredniaha ŭzrostu. Prybiŭšy stepleram paryk da svajoj łysaj hałavy, padobnaj, jak usie kažuć, da mašonki, jon idzie pracavać zvyčajnym pradaŭcom tačak. Pakul adnojčy, śviatkujučy dzień narodzinaŭ u ciesnym kole takich ža siabroŭ-dzivakoŭ, jaho nie vykradajuć bajcy ŭ formie, jakich jon pryniaŭ za stryptyzioraŭ.
Navat Vanesa kinuła niepuciovaha Uejda. Kadr ź filma
Dedpuł pračynajecca va Upravie časavych źmienaŭ, vakoł jakoj raniej raźvivalisia padziei ŭ sieryjale «Łoki». Miascovy načalničak Paradoks (Mećju Mak-Fedjen, jaki viadomy pa roli ŭ sieryjale «Spadčyńniki») tłumačyć jamu, što jon asablivy i moža źbierahčy Śviaščennuju liniju času ad katastrofy.
«Ja — marvełaŭski Isus!» — dumaje Dedpuł, ale ŭsio bolš prazaična. Suśviet Dedpuła zahinajecca, bo zahinuŭ jahony klučavy subjekt Rasamacha, a Paradoks choča paskoryć praces, kab nie korpacca jašče tysiaču hadoŭ z hetaj prablemaj. Dedpułu prapanujuć pierajści ŭ śviet, dzie niama Iks-mienaŭ, a jość Mściŭcy, i narešcie stać choć kimści.
Zdajecca, hety Łohan — toje, što treba. Ci nie? Kadr ź filma
Jon admaŭlajecca kinuć svoj suśviet, dzie zastalisia kachanaja dziaŭčyna i siabry, i źbiahaje z pryładaj pieramiaščeńnia pamiž suśvietami, kab adšukać novaha Rasamachu dla jaho.
Spačatku jon sprabuje adkapać pamierłaha Łohana ŭ svaim śviecie, ale kali razumieje, što kaściak nie ažyvie, skača sa śvietu ŭ śviet, šukajučy kahości padobnaha. Traplajecca ŭsio nie toje: to maleńki, to adnavoki, to Hienry Kevił z bakienbardami i cyharaj zamiest Chju Džekmana. I ŭsie varyjanty Rasamachi vynosiać nadakučlivamu Dedpułu mazhi (litaralna) pry sustrečy.
Padmianić Łohana viersijaj ź inšaha suśvietu nie takaja błahaja ideja, kali padumać. Kadr ź filma
Narešcie jamu traplajecca ŭ bary mienš ahresiŭny maralna złamany pjanica, vielmi padobny da staroha Łohana, jakoha Dedpuł zabiraje z saboj va Upravu. Praŭda, hety Rasamacha akazvajecca rasčaravańniem svajho śvietu i Paradoks adpraŭlaje abodvuch niaŭdačnikaŭ u Pusteču, štości nakštałt vialikaj śmietnicy Multysuśvietu, kudy traplaje ŭsio niepatrebnaje z supierhierojskich filmaŭ.
Dedpułu nieabchodna vyrvacca adsiul, pakul pryłada Paradoksa ź miłaj nazvaj «Patrašyciel Času» nie razburyła jahony śviet. Razam z Rasamacham, jakoha Dedpuł nievierahodna złuje, jon šukaje novych sajuźnikaŭ na hetym supierhierojskim śmietniku, kab maksimalna kryvava zamačyć usich vorahaŭ i vyratavać svaich blizkich.
Pusteča, u jakuju śpisvajuć niepatrebny druz z multysuśvietu Marvel. Kadr ź filma
Pakolki Dedpuł nie moža zatknucca, dźvie hadziny hledačy patanajuć u adbornych maciukach, miarzotnych nieprystojnaściach, kałamburach i humary, ad jakoha čarnieje ŭ vačach — i heta mienavita toje, čaho my tak daŭno ŭsie čakali, kab narešcie rassłabicca i adpačyć hałavoj.
Va ŭsich filmach ź sieryi pra Dedpuła źniesiena da djabła «čaćviortaja ściana», jakaja adździalaje kinahierojaŭ i hledača, a bijahrafii realnych akcioraŭ błytajucca ź ichnimi vydumanymi piersanažami. Heta robić kamičny efiekt jašče bolš mocnym.
Tut u maksimalna ździeklivaj formie vyśmiejvajecca absalutna ŭsio. Padkołvajuć jak hierojaŭ, tak i akcioraŭ, u tym liku žartami pra Kanadu, adkul pachodzić «adziny narmalny kanadziec» Łohan, i Aŭstraliju, ź jakoj pachodzić sam Džekman. Praŭda, za žarty pra Kanadu možna adchapić ad Dedpuła, bo Rejnalds kanadziec. Zabłytalisia? A niavažna, tut niama nijakich miežaŭ pamiž vydumkaj i realnaściu.
Dedpuł i jaho sabačka. Kadr ź filma
Vidać, jašče adnym žartam nad radzimaj Džekmana musiła stać scena, jakaja pierajmaje postapakaliptyčnyja filmy pra Šalonaha Maksa, dziejańnie jakich adbyvajecca ŭ Aŭstralii. Ale atrymaŭsia ździek ź filma «Furyjosa» — fantastyčnaha pravału hetaha hoda. Zvyčajna lažačych nie bjuć, ale tolki nie ŭ «Dedpule».
Asobny ŭzrovień humaru i ździekaŭ tyčycca kinakarparacyj, jakija stajać za kinaadaptacyjaj suśvietu Marvel. Raniej filmy pra Dedpuła i ludziej Iks zdymalisia kinastudyjaj 21st Century Fox, jakuju nienažerny Disney kupiŭ razam z pravami na hetyja franšyzy ŭ 2019 hodzie. Znakamitaja zastaŭka 20th Century Fox, jakaja kaliści źziała zołatam pad pražektarami, ciapier valajecca napałovu zaniesienaja piaskom u Pustečy, kudy skidajuć usio niepatrebnaje.
Dedpuł pieryjadyčna, kali choča vydać niešta zusim čornaje, adžartoŭvajecca, što my ž ciapier Disney, namiakajučy na praktyku kampanii zanižać uzrostavy cenz na škodu filmam, aby ŭ kinateatry pryjšło jak maha bolš hledačoŭ. Narmalizavać chacieli i Dedpuła, ale heta była nievykanalnaja misija, i film, na ščaście, vyjšaŭ z rejtynham 17+.
Hałoŭnyja hieroi na fonie zaniesienaj piaskom zastaŭki kampanii 20th Century Fox, jakuju razam z Dedpułam i Rasamachaj vykupiŭ Disney. Kadr ź filma
Naturalna, toje, što Fox «pachavaŭ» niezadoŭha da pakupki hałoŭnaha ŭlubionca ŭsich časoŭ — Rasamachu / Chju Džekmana (ciažka zrazumieć, kaho ź ich lubiać bolš), było nie ŭ intaresach Disney, jakija b chacieli maksimalna zarabić na takim kaštoŭnym ekzemplary. Litaralna jak Dedpuł u pačatku filma, Disney raskapała mahiłu, kab dastać ź jaje na śviet božy Rasamachu.
«Fox ciabie pachavali, a Disney uvaskresiŭ. Ciapier buduć ekspłuatavać da 90 hadoŭ», — namiakaje Dedpuł u razmovie z Rasamacham na siońniašniuju praktyku biaskoncych sikviełaŭ, prykviełaŭ i śpin-ofaŭ u kinaindustryi.
55-hadovy Chju Džekman, miarkujučy pa cudoŭnaj formie i zajzdrosnym siks-paku, na piensiju nie źbirajecca i navat u 90 hadoŭ daść žaru nam na radaść.
«Zaraz budzie porava». Kadr ź filma
Bojki pamiž situatyŭnymi naparnikami, Dedpułam i Rasamacham, praktyčna bieśśmiarotnymi piersanažami — dobra pastaŭleny biessensoŭny fars, u jakim kroŭ lijecca fantanami čysta pa fanie, dla zadavalnieńnia hledačoŭ. Hetak ža, jak i epičnaja bojka ź inšymi Dedpułami, taksama śpisanymi va ŭtyl.
«Rychtujcie kułački, zadroty, zaraz budzie porava», — papiaredžvaje Dedpuł hledačoŭ z ekrana.
Stvaralniki «Dedpuła i Rasamachi» vykacili na supierhierojski śmietnik sapraŭdy adbornyja adkidy — hierojaŭ (ci ich frahmienty) ź filmaŭ minułych dziesiacihodździaŭ. Zrabili heta nie tolki dla nastalhii, bo ŭžo viadoma, što niekatoryja ź ich viernucca na ekrany ŭ najbližejšy čas.
Dedpuł i Rasamacha svaracca jak staraja siamiejnaja para. Kadr ź filma
Film, jak pakoj padletka, prosta zavaleny paschałkami, adsyłkami i pramoj ekspłuatacyjaj vizualnych vobrazaŭ i piersanažaŭ ź inšych supierhierojskich filmaŭ dy niaŭdałych linijaj z komiksaŭ, pra jakija chočacca spytać — kamu i navošta heta pryjšło ŭ hałavu? Stvaralniki vyvalvajuć ceły BiełAZ fansiorvisu na błohieraŭ i hikaŭ, jakija ŭžo kinulisia raźbirać film na kadry.
Trochi śloz Chju Džekmana pa svaim losie da śmierci hulać Rasamachu. Kadr ź filma
«Dedpuł», jak «Atrad samazabojcaŭ», «Miratvorac» dy «Pacany» — filmy i sieryjały, jakija siońnia pieravaročvajuć z noh na hałavu supierhierojskaje kino, jany poŭnyja ščyraj satyry nad sučasnym hramadstvam i kinaindustryjaj dy biespraśvietna čornaha humaru.
Pakul vysokaadukavanaja publika teatralna zakočvaje vočy, čujučy źlohku pošłyja namioki ŭ lubym filmie, badziory i trešovy «Dedpuł i Rasamacha» nie pakidaje nivodnaha kamieniu ad hetaha dvudušnaha chanžastva. Seksualnaja abjektyvizacyja i brydkasłoŭje tut srodki mastackaj vyraznaści, i heta pracuje lepš, čym dušny pafas inšych filmaŭ pra supierhierojaŭ. Nu i Rasamacha ŭ vykanańni Chju Džekmana. Što vam jašče treba dla ščaścia? Idzicie i hladzicie!
Hiendarnyja kvoty ŭ postapakalipsisie. «Furyjosa» — ci atrymaŭsia novy halivudski bajevik?