Vieniesuelski dyktatar Madura vyklikaŭ Maska na pajadynak. Toj pahadziŭsia i pastaviŭ umovy
Usio pačałosia z taho, što miljarder nie pryznaŭ vynikaŭ sfalsifikavanych vybaraŭ u Vieniesuele.
31.07.2024 / 20:49
Vieniesuelski dyktatar Nikałas Madura i amierykanski miljarder Iłan Mask. Fota: Matias Delacroix / AP, Dimitrios Kambouris / Getty Images
Vieniesuelski dyktatar Nikałas Madura abviaściŭ miljardera Iłana Maska svaim «novym zaklatym voraham» i vyklikaŭ taho na pajadynak.
«Ja nie bajusia ciabie, Iłan Mask. Davaj bicca tam, dzie zachočaš», — ahučyŭ svoj vyklik Madura padčas vystupleńnia na nacyjanalnym telebačańni, pieradaje vydańnie New York Post.
Hetaja reakcyja Madura adbyłasia ŭśled za publikacyjaj Maska ŭ tvitary (X), dzie toj abvinavaciŭ vieniesuelskaha dyktatara ŭ «pakutach i śmierciach vieniesuelskaha naroda» i zaklikaŭ jaho pajści z prezidenckaj pasady.
Na sam vyklik na pajadynak ad Madura Mask paźniej adkazaŭ zhodaj. Miljarder pastaviŭ umovu, što kali ŭ bojcy pieramoža jon, to Madura pakinie ŭładu ŭ Vieniesuele, a kali pieramoža Madura, to Mask padoryć palityku biaspłatny bilet na Mars.
Nahadajem, što masavyja pratesty achapili Vieniesuełu paśla nibyta pieramohi ciapierašniaha kiraŭnika krainy Nikałasa Madura na niadzielnych prezidenckich vybarach (taho ŭžo paśpiašaŭsia pavinšavać Alaksandr Łukašenka).
Ułady krainy paśla zakančeńnia hałasavańnia abviaścili, što za Madura prahałasavaŭ, maŭlaŭ, 51% vybarščykaŭ. U toj ža čas niezaležnyja apytańni davali 60% hałasoŭ jahonamu supierniku Edmunda Hansalesu Urucia.
Demanstranty pa ŭsioj krainie patrabujuć adstaŭki Madura, pierakryvajuć ruch transpartu.
Ciapierašnija pratesty suprać vynikaŭ vybaraŭ u Vieniesuele. Fota: Matias Delacroix / AP
Na vulicach, u tym liku ŭ Karakasie, apazicyjaniery ładziać maršy, u asobnych haradach sprabujuć prarvacca na vybarčyja ŭčastki i zryvajuć płakaty z Madura na rekłamnych ščytach. U stalicy tysiačy pratestoŭcaŭ sieli na matacykły i zajmajuć darohi.
Tym časam Vieniesueła adklikaje svaich dypłamataŭ z krain, jakija nie pryznali vybary: Arhiencina, Čyli, Pieru, Kosta-Ryka, Panama, Daminikanskaja Respublika i Uruhvaj.
Iłan Mask zajaviŭ, što zhubiŭ syna z-za błakataraŭ pałavoha vyśpiavańnia
Jak adrazu paśla zamachu na Trampa sacsietki zapoŭnili teoryi zmovy i pry čym tut Iłan Mask