Ci šmat źmienicca ad taho, što va Ukrainu prybyli źniščalniki F-16?
Vajskovy karespandent Bi-bi-si Džonatan Bił kamientuje navinu pra toje, što va Ukrainu narešcie prybyli doŭhačakanyja zachodnija samaloty-źniščalniki. Pavodle jaho słoŭ, heta paspryjaje źmienie situacyi, ale cudaŭ čakać nie varta, piša Ukrainskaja słužba Bi-bi-si.
31.07.2024 / 22:47
Zdymak ilustracyjny. Fota: AP Photo/Czarek Sokolowski, File
Ukraina z pačatku vajny była ŭ niavyhadnym stanoviščy z punktu hledžańnia vajenna-pavietranych sił. I jana prasiła pra F-16, sučasnyja zachodnija źniščalniki, praktyčna ź pieršaha dnia vajny.
Jana čakała vielmi doŭha. Tamu važna, što Ukraina atrymlivaje chacia b niešta.
Kali zirnuć na vajnu ciapier — Rasija vykarystoŭvaje svaju pieravahu ŭ pavietry, vykarystoŭvajučy kiravanyja avijabomby: heta vialikaja pahroza na froncie ciapier. Heta bomby, jakija zapuskajuć u rasiejskaj pavietranaj prastory, za 40-50 km ad celaŭ va Ukrainie.
Heta strašnaja i mahutnaja zbroja. Jany vykarystoŭvajuć ich pa Charkavie, u Charkaŭskim nastupleńni, ja bačyŭ ich tam. Hetyja bomby vyklikajuć mocny strach, jany žudasnyja.
Kali ŭ vas jość F-16 z rakietami siaredniaj dalokaści kłasa «pavietra-pavietra» — to heta mahło b niejtralizavać hetuju pahrozu, kali budzie dazvoł źbivać rasijskija samaloty ŭ rasijskaj pavietranaj prastory.
Adnak z usioj zbrojaj, jakuju daje Zachad, treba paźbiahać vyrazu «hiejm čejndžar», heta značyć cudadziejny srodak, jaki źmienić chod vajny. Nijakaja zbroja nie moža vyrašyć chodu vajny. Adzinaj takoj zbrojaj byli sistemy SPA Patriot. Heta čysta abarončaja zbroja, jakoj Ukrainie patrabavałasia ŭsio bolš i bolš. Ale nivodnaja nastupalnaja zbroja, jakuju atrymała Ukraina, nie źmianiła dynamiku kanfliktu.
Ukraina ŭ pavietry mieła surjoznaje adstavańnie — i tut F-16 dapamohuć.
Toje, što vyklikaje surjoznuju zaniepakojenaść u Kijeva i zachodnich krain, jakija pieradajuć Ukrainie F-16 — heta toje, što jany stanuć mišeńniu rasijan.
Jość aściarohi i z nahody samich F-16, tamu što heta vielmi mahutnyja reaktyŭnyja samaloty. Jany majuć vielizarny pavietrazabornik, što, jak pyłasos, zasmoktvaje śmiećcie na ŭźlotnaj pałasie.
Tamu jość pytańnie, ci spraviacca ź imi ŭźlotnyja pałosy va Ukrainie. Jany majuć patrebu ŭ techničnym absłuhoŭvańni i heta, vierahodna, aznačaje, što va Ukrainu pavinny prybyć zachodnija padradčyki.
Tamu ludziam nie varta čakać, što zachodnija źniščalniki raptam źmieniać dynamiku vajny. Ciažka ŭjavić, što heta mahčyma. Dy i Rasija budzie ŭličvać prybyćcio samalotaŭ.
I varta pamiatać, što ŭ RF zaŭsiody budzie bolš samalotaŭ, čym va Ukrainy. Tak, Ukrainie ŭdajecca źbivać rasijskija samaloty i z F-16 šancy źbić ich uzrastuć — pry ŭmovie, što jany buduć mieć adpaviednuju zbroju.
Ale nie treba śpiašacca, uskładajučy nadziei na prybyćcio F-16 i toje, što jany adrazu daduć Ukrainie pieravahu ŭ pavietry. Hetaha nie budzie. I nie ŭsie jany pryjduć adnačasova, a buduć pastaŭlacca pastupova. Jany źmieniać situacyju, ale jany nie pryniasuć Ukrainie raptoŭnaj pieramohi.
Pieršaja partyja źniščalnikaŭ F-16 prybyła va Ukrainu
ZŠA abstalujuć samaloty F-16 dla Ukrainy sučasnaj zbrojaj
Pačaŭsia praces pieradačy źniščalnikaŭ F-16 Ukrainie — pieršyja samaloty ŭžo na šlachu ŭ krainu