«Niekalki miesiacaŭ nie mahu abniać dzicia». Maładaja maci prosić Łukašenku viarnuć maleńkaha syna, jakoha zabraŭ baćka
Sioleta ŭ mai mužčyna zabraŭ 6-hadovaha syna Dzianisa ŭ byłoj žonki na vychodnyja — ale dahetul nie viarnuŭ dzicia maci. Viktoryja Tampiej kaža, što z taho momantu nie bačyła chłopčyka. Ni čynoŭniki, ni milicyja nie dapamahajuć joj viarnuć syna. Jana vyrašyła zapisać zvarot da Łukašenki.
01.08.2024 / 13:31
Viktoryja Tampiej. Skrynšot videa ŭ tyktoku
Maładaja maci vykłała videa z prośbaj ab dapamozie ŭ svaim tyktoku.
— U mai moj były muž Ihar Varapaj zabraŭ dzicia, kab pravieści ź im vychodnyja i dahetul jaho nie viarnuŭ. Ja nie viedaju, dzie moj syn i z kim jon, u jaki dziciačy sadok jon chodzić i ci chodzić uvohule.
Viktoryja kaža, što sud Centralnaha rajona Minska 20 červienia vydaŭ rašeńnie ab nieadkładnym vykanańni raniejšaj pastanovy suda, zhodna ź jakoj miesca pražyvańnia syna vyznačana z maci.
— Heta ihnarujecca. Sudovaja vykanaŭca biaździejničaje, spasyłajučysia na toje, što jana nie razumieje, jak vykanać rašeńnie suda.
Viktoryja kaža, što nieadnojčy sprabavała viarnuć siabie dzicia.
— Ja niekalki razoŭ vyklikała supracoŭnikaŭ milicyi, ale jany nie dapamahli mnie, spasyłajučysia na toje, što heta hramadzianska-pravavyja adnosiny. Ja chadžu pa zamknionym kole i maru tolki ab tym, kab chutčej abniać svajho syna.
Viktoryja prosić viarnuć joj syna, pakarać tych, chto vinavaty ŭ ich rasstańni, a taksama razabracca ŭ biaździejnaści ludziej, jakija tearetyčna pavinny byli dapamahać u takoj situacyi.
Žančyna pieraličvaje, u jakija instancyi źviartałasia, kab chłopčyka narešcie znajšli. Ale śćviardžaje, što ŭsiudy atrymała tolki farmalnyja adpiski. Milicyja navat nie zaŭsiody vyjazdžała paśla jaje zvanka na liniju 102, kab pryjechać i dapamahčy zabrać dzicia.
Za sutki videa nabrała kala 300 tysiač prahladaŭ i bolš za 10 tysiač łajkaŭ.