ES nie pryznaje pieravybrańnie Madury prezidentam Vieniesueły
Jeŭrapiejskaja rada ličyć pieramožcam na prezidenckich vybarach u Vieniesuele kandydata ad apazicyi Hansalesa, abapirajučysia na mierkavańnie niezaležnych ekśpiertaŭ, piša DW.com.
05.08.2024 / 08:51
Fota: Jesus Vargas / Getty Images
Aficyjnyja vyniki padliku hałasoŭ na prezidenckich vybarach u Vieniesuele, apublikavanyja Nacyjanalnaj vybarčaj radaj krainy (CNE), nie mohuć być pryznanyja jak dakładnyja — takaja pazicyja ES. Adpaviednaja zajava ad imia viarchoŭnaha pradstaŭnika ES pa zamiežnych spravach Žaziepa Barela była apublikavana na sajcie Jeŭrarady.
«Kopii pratakołaŭ hałasavańnia na vybarach, apublikavanyja apazicyjaj i razhledžanyja niekalkimi niezaležnymi arhanizacyjami, pakazvajuć na toje, što Edmunda Hansales Urucija, vidavočna, źjaŭlajecca pieramožcam prezidenckich vybaraŭ sa značnaj pieravahaj hałasoŭ», — adznačajecca ŭ zajavie Barela.
ZŠA raniej aficyjna zajavili ab pryznańni Hansalesa pieramožcam na vybarach z «niepieraadolnym adryvam». Dziaržsakratar krainy Entani Blinkien zaklikaŭ vieniesuelski ŭrad «pačać abmierkavańnie pavažlivaha, mirnaha pierachodu ŭłady ŭ adpaviednaści z vybarčym zakanadaŭstvam Vieniesueły i pažadańniami vieniesuelskaha naroda».
Prezidenckija vybary ŭ Vieniesuele prajšli 28 lipienia. Padkantrolny ŭradu krainy vybarkam zajaviŭ, što Madura, jaki da hetaha kiravaŭ krainaj na praciahu dvuch prezidenckich terminaŭ, atrymaŭ padtrymku 51,2 adsotka vybarščykaŭ. Pry hetym mižnarodnyja naziralniki da vybaraŭ dapuščanyja nie byli.
Ułady Vieniesueły abviaścili Maduru pieramožcam vybaraŭ z 51% hałasoŭ. Ale jość pytańni
Vieniesuelski dyktatar Madura vyklikaŭ Maska na pajadynak. Toj pahadziŭsia i pastaviŭ umovy