Dva polskija futbolnyja arbitry napilisia i skrali darožny znak. A nazaŭtra mieli sudzić Lihu čempijonaŭ
Polskija futbolnyja arbitry-mižnarodniki Bartaš Frankoŭski i Tomaš Musiał u noč z 5 na 6 žniŭnia byli zatrymanyja palicyjaj u Lublinie. Pierad matčam Lihi čempijonaŭ pamiž kijeŭskim «Dynama» i šatłandskim «Hłazha Rejndžers» jany ŭžyvali ałkahol i nie raźličyli svaich siłaŭ, piša TVP Sport.
06.08.2024 / 19:14
Bartaš Frankoŭski. Fota: Stuart Franklin/Getty Images
6 žniŭnia ŭ 20:00 na lublinskim stadyjonie adbudziecca adboračny matč Lihi čempijonaŭ pamiž kijeŭskim «Dynama» i šatłandskim «Hłazha Rejndžers». Polski arbitr-mižnarodnik Bartaš Frankoŭski byŭ pryznačany na jaho hałoŭnym sudździoj, a jahonym pamočnikam musiŭ być Tomaš Musiał.
Adnak sudziejstvu ŭ takim składzie adbycca ŭžo nie sudžana, bo ŭ 01:43 u Lublinie byli zatrymanyja troje mužčyn, jakija skrali darožny znak i nakiravalisia ź im u bok adnaho z handlovych centraŭ. Dvuma z hetych mužčyn jakraz i akazalisia polskija arbitry.
«Kala 1:40 my atrymali paviedamleńnie, što troje mužčyn niasuć pa vulicy darožny znak. Na miesca byli nakiravanyja palicyjanty. Usie mužčyny byli ŭ stanie ałkaholnaha apjanieńnia i mieli ŭ kryvi bolš za 1,5 pramile ałkaholu. Jany trapili ŭ vyćviareźnik», — paviedamili ŭ palicyi.
U Bartaša Frankoŭskaha ŭ kryvi vyjavili kala 1,7 pramile ałkaholu, u Tomaša Musiała — kala 1,8 pramile.
Polski futbolny sajuz vypuściŭ adnosna hetaj situacyi admysłovuju zajavu. Kantrakty sudździaŭ, kali praviedzienaje rasśledavańnie paćvierdzić papiaredniuju infarmacyju, majuć być skasavanyja. A dyscyplinarny kamitet moža ŭvohule ŭvieści im zabaronu na prafiesiju.
UEFA imhnienna daviedaŭsia pra hetuju spravu i adreahavaŭ małankavaj źmienaj składu sudziejskaj bryhady na matč. Frankoŭskaha i Musiała zamieniać inšyja polskija arbitry: Tomaš Kviatkoŭski i Pavieł Malec.