Źjaviŭsia śpis krain, jakich Rasija ličyła patencyjnymi celami dla jadziernaha ŭdaru. Tam jość i Kitaj, i Iran
Na sakretnych kartach patencyjnych celaŭ rasijskaha fłotu dla naniasieńnia jadziernych udaraŭ, jakija atrymała vydańnie Financial Times, paznačanyja bujnyja harady i abjekty mnohich krain.
13.08.2024 / 12:46
Rakietnyja vyprabavańni rasijskaha fłotu ŭ Japonskim mory. Fota: Minabarony Rasii / AP Photo
Pavodle sakretnych dakumientaŭ Minabarony Rasii za 2008-2014 hady, rasijski fłot adpracoŭvaŭ naniasieńnie rakietna-jadziernych udaraŭ pa bujnych haradach i abjektach krain NATA na vypadak paŭnamaštabnaj vajny z Zachadam.
Ale ŭ śpisie dla patencyjnych udaraŭ, akramia dziaržaŭ NATA, jość i ciapierašnija sajuźniki Kramla, paviedamlaje vydańnie Financial Times.
Tak, na zakrytych prezientatyŭnych kartach dla aficerskaha składu Rasii, jakija krynicy Financial Times nazyvajuć «niapoŭnymi», u jakaści celaŭ siarod prazachodnich krain abranyja Estonija, Narviehija, Hiermanija, Francyja, Vialikabrytanija, Rumynija, Bałharyja, Turcyja i Japonija.
Akramia ich, jak bačna na karcie, Kreml taksama paznačyŭ harady i vajskovyja abjekty sajuznych Irana, Kitaja i Paŭnočnaj Karei. Jość u śpisie i Azierbajdžan.
Zakrytyja prezientatyŭnyja karty dla aficerskaha składu Rasii za 2008-2014 hady, na jakich paznačanyja patencyjnyja celi dla jadziernaha ŭdaru z dadatkovymi kamientarami ad žurnalistaŭ Financial Times. Krynica: Financial Times
Financial Times adznačaje, što ŭ zakrytych rasijskich dakumientach havorycca pra pieravahi prymianieńnia jadziernaj zbroi na rańniaj stadyi kanfliktu z vyšejpieraličanymi krainami. Taksama ŭ ich akcentujecca ŭvaha na mahčymaść rasijskich karabloŭ nieści jadziernuju zbroju.
«Vysokaja manieŭranaść fłotu dazvalaje nanosić raptoŭnyja i masiravanyja ŭdary z roznych napramkaŭ», — napisana ŭ adnym z dakumientaŭ.
Hałoŭnym pryjarytetam u vypadku kanfliktu z NATA ŭ dakumientach nazvana «pasłableńnie vajennaha i ekanamičnaha patencyjału praciŭnika». Analityki, na jakich spasyłajecca Financial Times ličać, što heta aznačaje naniasieńnie jadziernych udaraŭ pa abjektach hramadzianskaj i krytyčnaj infrastruktury.
Taksama ŭ źlitaj prezientacyi zhadvajecca varyjant «demanstracyjnaha ŭdaru» — padryvu jadziernaj zbroi ŭ addalenym rajonie dla zastrašvańnia zachodnich krain. Taki ŭdar, jak havorycca ŭ dakumientach, pavinien prademanstravać «najaŭnaść i hatoŭnaść da ŭžyvańnia vysokadakładnaj niestratehičnaj jadziernaj zbroi» i «namier prymianić jadziernuju zbroju».
Rasija maje płan vajny z Kitajem — FT