Što budzie rabić Zachad, kali Pucin naniasie jadzierny ŭdar? Jość try varyjanty, adzin ź ich katastrafičny dla Biełarusi

Nie adkazvać na ŭdar, a «izalavać»

U 2016 hodzie Rada nacyjanalnaj biaśpieki ZŠA, klučavy kansultatyŭny orhan pry amierykanskim prezidencie pa siłavoj prablematycy, pravioŭ vajennuju hulniu, jakaja madelavała napad Rasii na adnu z krain Bałtyi. Padrabiaznaści vykładzieny ŭ knizie žurnalista Freda Kapłana «The Bomb: Presidents, Generals And The Secret History Of Nuclear War».

Pa scenary siły NATA paśpiachova supraćstajać uvarvańniu, pieramahajučy «na ziamli», i tady Kreml nanosić udar jadziernaj zbrojaj małoj mahutnaści (jaje taksama nazyvajuć taktyčnaj jadziernaj zbrojaj) pa žyvoj sile praciŭnika albo pa vajennaj bazie ŭ Hiermanii, dzie raźmiaščajucca bieśpiłotniki, bajavaja avijacyja abo bojeprypasy.

Spačatku dyskusija pajšła ŭ rečyščy niepaźbiežnaha adkazu: jakija vidy jadziernaj zbroi i pa jakich metach varta ŭžyć. Ale tahačasny daradca vice-prezidenta Džo Bajdena pa pytańniach biaśpieki Kolin Keł, ciapier namieśnik ministra abarony pa vajenna-palityčnych pytańniach užo pry prezidencie Bajdenie, paviarnuŭ abmierkavańnie ŭ zusim inšy bok.

Jaho łohika zaklučałasia ŭ nastupnym: vykarystańnie jadziernaj zbroi ŭpieršyniu z 1945 hoda stanie pavarotnym momantam u historyi i redkim šancam abjadnać suprać Rasii ŭvieś śviet, «izalavać» krainu i damahčysia istotnaha asłableńnia jaje ekanomiki i ŭzbrojenych sił.

Naadvarot, jadzierny ŭdar u adkaz «narmalizuje» jadziernuju zbroju jak instrumient viadzieńnia bajavych dziejańniaŭ i ŭ lubym vypadku nie dazvolić chutčej i ź mienšymi stratami zaviaršyć kanflikt na karyść aljansu.

Paśla šmathadzinnych sprečak i hramadzianskija, i vajennyja členy kamiteta (u ich liku byli namieśnik staršyni Abjadnanaha kamiteta načalnikaŭ štaboŭ Poł Siełva i hałoŭnakamandujučy Abjadnanymi siłami NATA ŭ Jeŭropie Filip Brydłaŭ) syšlisia na tym, što prynamsi pieršym krokam u adkaz stanuć kanviencyjanalnyja siły i srodki, a nie jadziernaja ataka.

Udaryć u adkaz, nie pa Rasii

Praź miesiac toj ža scenar vajennaj hulni razyhrali ŭžo siarod kamiteta kiraŭnikoŭ Rady nacyjanalnaj biaśpieki ZŠA. Jak i ŭ pieršy raz, prapanova hienierałaŭ pierajści da vybaru metaŭ dla ŭdaru ŭ adkaz asprečyli z tymi ž arhumientami: miery nievajennaha ŭździejańnia (sankcyi, razryŭ adnosin, handlovaja błakada) naniasuć niesuvymierna bolšuju škodu supierniku.

Pry hetym ministr abarony Eštan Karter zajaviŭ, što pry takim raźvićci padziej razburycca ŭsia hłabalnaja architektura biaśpieki, pabudavanaja na vajskovych sajuzach na čale z ZŠA, pierš za ŭsio, Paŭnočnaatłantyčny aljans, pakolki viera partnioraŭ u amierykanskija harantyi pabudavanaja na biezumoŭnym pastułacie ab zdolnaści i rašučaści Vašynhtona nanieści ŭdar u adkaz u vypadku prymianieńnia varožymi režymami jadziernaj zbroi.

Namieśnik dziaržsakratara, a ciapier dziaržsakratar Entani Blinkien tady admoviŭsia zaniać čyj-niebudź bok.

Jak by tam ni było, členy kamiteta pierajšli da pytańnia: kali i ŭžyvać jadziernuju zbroju, to kudy jaje nakiravać? Prapanova ŭdaryć pa Kalininhradskaj vobłaści nie znajšła padtrymki, pakolki heta terytoryja Rasii, a značyć, u adkaz na amierykanski ŭdar Maskva moža atakavać terytoryju ZŠA. Varyjant z atakaj pa US RF u krainie Bałtyi, jakaja pa lehiendzie padvierhłasia napadu, taksama adkinuli z-za pahrozy praźmiernych achviar siarod hramadzianskaha nasielnictva dziaržavy-člena NATA.

Bolšaść udzielnikaŭ u vyniku padtrymali kampramis — jadzierny ŭdar pa bližejšym sajuźniku Rasii — Biełarusi, choć pa scenary vajennaj hulni kraina nie prymała nijakaha ŭdziełu ŭ rasijskim ŭvarvańni (u adroźnieńnie ad taho, što my nazirajem u chodzie biahučaj vajennaj kampanii va Ukrainie).

Takim čynam, na bolš vysokim uzroŭni ŭnutry Rady nacyjanalnaj biaśpieki ZŠA jadzierny ŭdar u adkaz paličyli nieabchodnym, ale nie z punktu hledžańnia vajennaj metazhodnaści, a pa pryčynach palityčnaha charaktaru — jak paćviardžeńnie pierakanaŭčaści Amieryki jak hłabalnaha centra siły ŭ situacyi krytyčnaj pahrozy śvietaparadku, jaki skłaŭsia.

Abmiežavanaja jadziernaja vajna

U 2020 hodzie, užo pry prezidencie Donaldzie Trampie Minabarony ZŠA padzialiłasia padrabiaznaściami vajennaj hulni, jakaja madeluje napad Rasii z dapamohaj taktyčnaj jadziernaj zbroi na amierykanski vajenny abjekt u Jeŭropie.

Amierykanskaje stratehičnaje kamandavańnie, jakoje abjadnoŭvaje siły jadziernaha strymlivańnia, supraćrakietnaj abarony i vajenna-kaśmičnyja siły, u časie kansultacyj ź ministram abarony i prezidentam u kančatkovym vyniku vyrašyłasia na abmiežavany jadzierny adkaz. Pakolki litaralna za tydzień da hetaha Pientahon spravazdačyŭsia ab pastanoŭcy na bajavoje dziažurstva małamahutnych jadziernych bojeprypasaŭ W76-2 dla balistyčnych rakiet padvodnych łodak (BRPŁ) Trident, ekśpierty pryjšli da vysnovy, što havorka idzie mienavita ab ich užyvańni.

Pry administracyi Trampa taktyčnaja jadziernaja zbroja typu bajavoha błoka W76-2 ličyłasia najbolš prydatnym varyjantam reahavańnia na nie-stratehičnuju rasijskuju jadziernuju ahresiju. Pamiž opcyjami zusim nie adkazvać i adrazu ž aktyvavać siły jadziernaha strymlivańnia — taktyčnyja jadziernyja BRPŁ sapraŭdy vyhladajuć adekvatnym i ŭmieranym rašeńniem.

Zrešty, jość adzin niuans. Jak adznačaje toj ža Fred Kapłan, na vypuščanych z amierykanskich padłodak BRPŁ nie budzie napisana, što jany niasuć małamahutny jadzierny zarad, tamu ŭ Maskvie paprostu mohuć vytłumačyć pusk jak pieršuju chvalu stratehičnaha rakietnaha napadu i ŭ adkaz udaryć mižkantynientalnymi balistyčnymi rakietami pa ZŠA, spravakavaŭšy tym samym poŭnamaštabnuju jadziernuju vajnu.

Čaho ž nam čakać

Na Zachadzie dapuskajuć, što prezident Uładzimir Pucin źvierniecca da zbroi masavaha źniščeńnia (chimičnaj abo taktyčnaj jadziernaj zbroi) u vypadku, kali rasijskija vojski vyčarpajuć kanviencyjanalnyja mahčymaści da taho, jak zdolejuć damahčysia rašučaha pośpiechu na ŭkrainskim teatry vajennych dziejańniaŭ, tym bolš što sankcyi ŭsio macniej bjuć pa ekanomicy krainy, a ŭnutrypalityčnyja vydatki ad praciahu bajavych dziejańniaŭ rastuć.

Sapraŭdy, siońnia šancy na sapraŭdnuju jadziernuju vajnu, vierahodna, na samym vysokim uzroŭni z časoŭ Karybskaha kryzisu. Toje, što adbyvajecca va Ukrainie, pakazvaje, što Pucin prymaje važnyja rašeńni na asnovie zusim niasłušnych ujaŭleńniaŭ ab realnym stanoviščy rečaŭ. I heta, biezumoŭna, pavyšaje ryzyku jadziernaj eskałacyi.

Ź inšaha boku, pieramoŭny praces pamiž Rasijaj i Ukrainaj, a taksama publičnyja zajavy ab źnižeńni vajennaj aktyŭnaści US RF pa mienšaj miery na dvuch apieracyjnych napramkach va Ukrainie chutčej śviedčać na karyść realizacyi deeskałacyjnaha scenara.

U lubym vypadku, dva z troch razhledžanych varyjantaŭ vajennych hulniaŭ, praviedzienych na vysokim uradavym uzroŭni ŭ ZŠA, praduhledžvajuć jadzierny adkaz na prymianieńnie Maskvoj jadziernaj zbroi, a adsiul rukoj padać da samaha horšaha. Nakolki možna sudzić, pakul ni adzin z zacikaŭlenych bakoŭ kanfliktu va Ukrainie da hetaha nie hatovy.

• 10
• 0
• 5
• 28
• 32
• 52
• 29
• 0