Vajskoŭcy nie vieryli Syrskamu, kali jon raskazaŭ im pra płany. Stali viadomyja padrabiaznaści apieracyi ŭ Kurskaj vobłaści
Vydańnie The Economist apytała vajskoŭcaŭ, jakija ŭdzielničali ŭ apieracyi, i krynicy, znajomyja z pryniaćciem rašeńniaŭ.
19.08.2024 / 18:34
Dyrektar kijeŭskaha Muzieja historyi Druhoj suśvietnaj vajny historyk Juryj Saŭčuk niasie darožny znak u Sudžy. 16 žniŭnia 2024 h. Fota: AP
Jak piša The Economist, apieracyja USU ŭ Kurskaj vobłaści — dziorzkaja zaduma, padrychtavanaja va ŭmovach strohaj sakretnaści. Jana padniała bajavy duch i pakazała, jakuju składanuju taktyku apieracyj zdolnaja ažyćciaŭlać ukrainskaja armija.
Jak raskazali krynicy vydańnia, ukrainskaje kamandavańnie razhladała niekalki scenaroŭ nastupu na słabyja miescy rasijskaj miažy: udar u Branskaj vobłaści na poŭnačy, udar u Kurskaj vobłaści, kambinacyja dvuch i bolš varyjantaŭ.
Hałoŭnaja meta zaklučałasia ŭ tym, kab adciahnuć vojski ad Danbasa i zajmieć raźmiennyja karty dla budučych pieramovaŭ.
Alaksandr Syrski. Fota: hromadske.ua
Hałoŭnakamandujučy USU hienierał Syrski trymaŭ płany ŭ sakrecie. Jon dzialiŭsia imi tolki z vuzkim kołam hienierałaŭ. Z prezidentam Syrski kamunikavaŭ sam-nasam, biez pamočnikaŭ. Bolšuju častku raźviedki praviała vajskovaja raźviedka, a nie HUR, jakoje padklučyli tolki na paźniejšym etapie.
Jak śćviardžaje krynica vydańnia, zachodnich sajuźnikaŭ taksama naŭmysna pakinuli ŭ niaviedańni: «Dźvie papiarednija apieracyi Syrskaha byli sarvanyja Zachadam. Ab adnoj ź ich stała viadoma rasiejcam, a ŭ inšym vypadku nam było zahadana spynić apieracyju».
Abmiežavańnie suviazi da ŭzroŭniu «treba viedać» dazvoliła ŭkraincam pačać ataku da taho, jak rasijanie zrazumieli, što adbyvajecca.
«Rasijanie razumieli, što niešta rychtujecca, ale, chutčej za ŭsio, mierkavali, što dla takoj dziorzkaj apieracyi nam spatrebicca adabreńnie amierykancaŭ», — cytuje vydańnie słovy adnoj z krynic. Kali pierad Zachadam paŭstaŭ fakt taho, što adbyłosia, jon nie staŭ piarečyć.
Hienierał Syrski zabłytaŭ praciŭnika, schavaŭšy prybyćcio svaich samych zahartavanych u bajach bryhad. Pierakidvańnie padmacavańnia ŭ prymiežnyja lasy było abhruntavana abaronaj ad mierkavanaha nastupu rasijskich vojsk na Sumy. U toj ža čas va ŭkrainskich ŚMI źjaviłasia infarmacyja ab chutkim rasijskim uvarvańni.
«Ratacyja adbyłasia prykładna za paŭtara tydnia da pačatku Kurskaj apieracyi. (…) Rasijanie praciahvali vieryć, što my prosta abaraniajem miažu», — raskazaŭ vydańniu radavy 80-j bryhady Siarhiej, jaki byŭ siarod tych, chto pieršy zajšoŭ u Kurskuju vobłaść.
Sami sałdaty pačali padazravać, što adbyvajecca niešta surjoznaje, u pačatku žniŭnia, kali im niečakana vydali ryštunak: novyja kaski z ubudavanymi navušnikami i novyja šturmavyja vintoŭki. Jany pravodzili vučeńni na makietach, jakija, jak vyśvietliłasia paźniej, ujaŭlali saboj rasijskija vioski.
Hienierał Syrski źbiaroh bolšuju častku sił dla druhoj chvali ataki, i, mahčyma, mienavita tamu Rasija spačatku paličyła praryŭ nie nadta surjoznym.
Sałdaty kažuć, što nie pavieryli svajmu kamandziru, kali jon raskazaŭ im pra płany.
«My śmiajalisia… My žartavali, što siońnia nie 1 krasavika. A kamandzir tolki ŭśmichaŭsia, viedajučy, što my navat nie ŭjaŭlajem, što nas čakaje», — uspaminaje radavy Siarhiej.
Sakretnaść padrychtoŭki i pradumanaja taktyka, naprykład, vykarystańnie FPV-dronaŭ dla prykryćcia z pavietra, sadziejničali chutkamu prasoŭvańniu ŭkrainskich vojsk.
Rasijanie bili pa ŭkraincach ź viertalotaŭ i zakidvali płaniernymi bombami — jakija časta padali na rasijskija ž vioski, ale na ziamli USU nie sustrakali surjoznaha supracivu.
Pa słovach krynicy vydańnia ŭ hienieralnym štabie Ukrainy, ukrainskija vojski vykarystoŭvali taktyku «manieŭranaj ataki», padobnaj da toj, što ŭžyvaje i načalnik rasijskaha Hienštaba Valeryj Hierasimaŭ.
Na praciahu pieršych piaci dzion ukrainskaja taktyka była vydatna efiektyŭnaj. 82-ja bryhada prarvałasia na ŭschod u kirunku Vialikaha Sałdackaha, a 80-ja — na zachad, da Małoj Łokny. Nievialikija padraździaleńni pramacvali ŭraźlivyja miescy, pierš čym puścić u chod ciažejšuju braniatechniku.
Jak piša vydańnie, hienierał Syrski adroźnivajecca ŭvahaj da detalaŭ. Ale kali pieršaja faza była staranna spłanavanaja, to ciapier kampanija raźvivajecca pa situacyi. Straciŭšy elemient niečakanaści, ukrainski nastup zamarudziŭsia.
Pa słovach krynicy vydańnia ŭ Hienieralnym štabie Ukrainy, prezident Zialenski ŭsio jašče nastojvaje na maksimalnym prasoŭvańni, ale Syrski aściarožničaje, zasiarodziŭsia na pašyreńni fłanhaŭ uzdoŭž miažy, kab stvaryć bolš abaronienyja linii.
«Syrski nie durań… Jon viedaje, što praźmiernaje prasoŭvańnie pastavić pad udar usiu apieracyju», — zapeŭniła vydańnie krynica z atačeńnia hałoŭkama.
Kala rajcentra Koranieva raźbili jašče adnu vialikuju kałonu rasijskaj techniki — Z-błohiery
USU pranikli ŭ Kurskuju vobłaść