«My ŭvajšli lohka, praktyčna biez supracivu». Što havorać pra apieracyju USU ŭ Kurskaj vobłaści jaje ŭdzielniki
Kali litara «Z» stała simvałam uvarvańnia Rasii va Ukrainu, to bieły trochvuholnik na vajskovaj technicy USU simvalizuje samuju śmiełuju sprobu Ukrainy dać joj adpor.
Hetyja trochvuholniki nalaplajuć abo malujuć na bartach kožnaha hruzavika, bienzavoza abo transparciora, jaki nakiroŭvajecca da miažy z Rasijskaj Fiederacyjaj, piša BBC z Sumskaj vobłaści.
Hety nastup dazvoliŭ ukraincam zachapić sotni kvadratnych kiłamietraŭ rasijskaj terytoryi i mocna padniaŭ bajavy duch.
Ukrainski sałdat z pazyŭnym «Tomaš» tolki što viarnuŭsia z transhraničnaj apieracyi razam sa svaim tavaryšam «Akordam».
«Heta było kruta», — bieź jakich-niebudź emocyj apisvaje jon vajennyja pośpiechi ŭkrainskaj apieracyi.
Ich padraździaleńnie apierataraŭ BPŁA rychtavałasia da nastupleńnia na praciahu dvuch dzion.
«U nas byŭ zahad prybyć siudy, ale my nie viedali, što mienavita heta značyć, — pryznajecca Tomaš, jaki spyniŭsia, kab vypić kavy na aŭtazapraŭcy. — My zahadzia padavili ŭsie varožyja srodki suviazi i nazirańnia, heta značyć zahadzia padrychtavali kalidor dla ŭvachodu».
Kolki rasijskaj terytoryi było zaniata ŭkrainskimi vojskami, dakładna nie viadoma. Hałoŭnakamandujučy USU Alaksandr Syrski zajaviŭ, što Ukraina ŭžo kantraluje 1000 kvadratnych kiłamietraŭ u Kurskaj vobłaści, ale hetyja danyja vyklikajuć peŭny skiepsis.
U aŭtorak ministerstva abarony Rasii śćviardžała, što sproby ŭkraincaŭ rušyć napierad hłybiej byli spynienyja, ale ŭ minułym jaho nie raz užo łavili na pieradačy iłžyvych źviestak.
Jak by tam ni było, ale, zdajecca, Kijeŭ hatovy pajści na hetuju ryzykoŭnuju vajennuju hulniu.
Takoha ŭzroŭniu aktyŭnaści ŭ Sumskaj vobłaści, jakaja miažuje z Rasijaj, ja nie bačyŭ z časoŭ advajovy svaich terytoryj u 2022 hodzie, kali ŭkraincy nanosili ŭdar za ŭdaram, i viecier, zdavałasia, dźmuŭ u ich vietrazi.
Heta, niesumnienna, unosić doŭhačakanuju pieramienu ŭ paŭzučy charaktar vajny na źniasileńnie apošnich 18 miesiacaŭ, ale nazyvać heta pośpiecham ci niaŭdačaj było b zaŭčasna.
Meta apieracyi zastajecca šmat u čym niajasnaj, choć prezident Uładzimir Zialenski kazaŭ ab naniasieńni ŭdaraŭ pa rajonach, ź jakich Rasija moža atakavać Ukrainu, i ab nabližeńni da «spraviadlivaha miru».
Pry hetym vidavočna, što Kijeŭ nakiroŭvaje tudy svaje adbornyja siły.
Mocnaha vyhladu ŭkrainskija bajcy toŭpiacca vakoł bajavych mašyn. Bolšaść vietliva admaŭlajucca ad razmovy z žurnalistam. Niekatoryja vyhladajuć zmardavanymi.
Bi-bi-si ŭdałosia parazmaŭlać u miesiendžary z adnym z sałdat, jaki znachodzicca na rasijskaj terytoryi.
Pavodle jaho słoŭ, spatrebilisia miesiacy płanavańnia dla taho, kab zaachvocić Maskvu vyvieści padraździaleńni ź inšych učastkaŭ frontu va Ukrainie i pierakinuć ich u Kurskuju vobłaść.
«Spracavaŭ elemient niečakanaści, — kaža jon. — My ŭvajšli vielmi lohka, praktyčna biez supracivu. U noč na 6 žniŭnia miažu pierasiekli pieršyja hrupy, i było niekalki napramkaŭ».
«Amal adrazu my vyjšli na zachodniuju ŭskrainu Sudžy», — dadaje jon.
U takich apieracyjach sakretnaść hulaje na ruku vajskoŭcam, čaho nie skažaš ab hramadzianskim nasielnictvie.
Dziasiatki tysiač ludziej evakuirujucca pa abodva baki miažy, pakolki avijaŭdary ŭzmacniajucca, a bajavyja dziejańni nabližajucca.
«Rasijskija cyvilnyja nie supraciŭlajucca, my ich nie čapajem, — tłumačyć ukrainski sałdat. — Ale jany staviacca da nas albo rezka niehatyŭna, albo ŭvohule nijak».
«Padmanvajuć nakont pieramiaščeńniaŭ i dysłakacyi rasijskich vojskaŭ», — dadaje jon.
Sałdaty, ź jakimi my mieli znosiny, paćviardžajuć, što rasiejcy sapraŭdy pierakinuli vojski z uschodniaj linii frontu, uklučajučy Charkaŭski, Pakroŭski i Tarecki kirunki.
Ale kazać ab zapavoleńni rasijskaha nastupu nie davodzicca.
Uładzimir Pucin paabiacaŭ «hodny adkaz» na pieršaje ŭvarvańnie ŭ Rasiju z časoŭ Druhoj suśvietnaj vajny. Adnak strach, jaki jon mieŭ namier pasiejać, nie dabraŭsia da zapylenych prymiežnych siołaŭ i haradoŭ, jakija rehularna bambujuć jaho ŭłasnyja vojski.
Michaś i jaho siabar Valera prajazdžajuć mima na svaich aranžavych «žyhulach» u siale Stećkoŭka Sumskaj vobłaści.
«Ja chaču, kab jany [Kursk] uziali, i ŭziali voś tak! — kaža Miša, žestykulujučy i skručvajučy rukami pavietra. — Kab zabrali ŭsio, navat Maskvu!»
Hetaja lutaja reakcyja — pramy vynik raspačataha ŭ lutym 2022 hoda rasijskaha ŭvarvańnia.
«Rasija napała pieršaj, nie my, — kaža Valera praz apuščanaje škło aŭtamabila. — Našy ciapier dali adkaz, pakazali, što my taksama zdolnyja. Kali b našym dali dazvoł raniej, jany ŭžo daŭno ŭziali b!»
Padobna, što Ukraina narešcie atrymała doŭhačakany dazvoł ad Zachadu na vykarystańnie jaho zbroi dla ŭdaraŭ pa terytoryi Rasii.
Adnak staŭki vielmi vysokija, ab čym śviedčać novyja abarončyja zbudavańni, jakija ŭzvodziacca na ŭskrainach Sum.
Da minułaha tydnia ŭ hetym rajonie bajalisia rasijskaha nastupu na poŭnačy Ukrainy. Kali ŭkrainskaje ŭvarvańnie pravalicca, hetyja aściarohi mohuć chutka apraŭdacca.
Rasijskaje vojska demanstruje značnuju pieravahu pa kolkaści vajskoŭcaŭ i vajskovym zabieśpiačeńni.
«Kab doŭha ŭtrymlivać terytoryju, patrebnyja dźvie rečy: bolš haradoŭ nakštałt Sudžy pad našym kantrolem i reziervy, — piša BBC ukrainski vajskoviec z terytoryi supiernika. — Naš front užo traščyć pa švach, i niezrazumieła, dzie my ich voźmiem».
Dla Kijeva łohika abo nadzieja zaklučajecca ŭ tym, što Rasii daviadziecca pieraklučyć uvahu z bajavych dziejańniaŭ na ŭkrainskaj ziamli na ŭłasnuju terytoryju.
Niekatoryja va Ukrainie ličać, što hetaje kontrnastupleńnie moža navat uzmacnić jaje pazicyi na budučych mirnych pieramovach. Ale jano taksama moža adsunuć pieramovy jašče dalej.
Maskva nie źviartałasia pa dapamohu da ADKB u suviazi z padziejami ŭ Kurskaj vobłaści
Z ranicy USU ŭziali ŭ pałon u Kurskaj vobłaści bolš za 100 rasijskich vajskoŭcaŭ i prasunulisia na 1-2 km — Syrski
U Rasii terminova šukajuć ludziej dla kapańnia akopaŭ u Kurskaj vobłaści
Rasija vyvodzić častku vojskaŭ z Ukrainy z-za bajoŭ u Kurskaj vobłaści
Bajden upieršyniu prakamientavaŭ bajavyja dziejańni ŭ Kurskaj vobłaści
Kamientary