Расія перайшла ў контрнаступ у Курскай вобласці, ударыла ў фланг — ваенкары
Расійскія войскі выбілі УСУ з чатырох сёлаў Курскай вобласці за адзін дзень, сцвярджаюць расійскія блогеры. Украінскі бок пра сітуацыю ў Глушкоўскім і Коранеўскім раёнах не паведамляў.
10.09.2024 / 19:58
Расійскія ваенкары сцвярджаюць, што сёння пачаўся контрнаступ у Курскай вобласці. Прыкладная лінія фронту там пазначаная на мапе зверху сінім колерам, а кірунак удару — чырвоным.
«155-я брыгада марской пяхоты Ціхаакіянскага флота … выбіла УСУ з вёсак Гардзееўка, Віктараўка, Бяхава і вызваліла палову сёлаў Апанасаўка і Снагасць у Курскай вобласці. Менш чым за 12 гадзін», — напісаў тг-канал «Тройка».
Гаворка пра населеныя пункты на сутыку Глушкоўскага і Коранеўскага раёнаў, на заходнім флангу выступу, які ўкраінскія войскі занялі на расійскай тэрыторыі.
«Увесь мінулы тыдзень 51 полк 106-ай дывізіі ПДВ павольна рыхтаваў плацдарм для атакі ключавога сяла (мясцовага вузла дарог) — Снагасці. Ён ішоў з поўначы з боку Коранева і сёння раніцай хуткай атакай увайшоў у Снагасць, — так апісвае сітуацыю блогер Юрый Падаляка. — Адначасова з ім з захаду (з Глушкоўскага раёна) 155 брыгада ціхаакіянскіх марпехаў, таксама раптоўна, абрынулася на праціўніка ў Гардзееўцы. Такім чынам праціўнік у Апанасьеўцы, Унязапным, Віктараўцы і Бяхаве быў адрэзаны ад забеспячэння і ахоплены з флангаў».
«Пазіцыі нашых войскаў за сёння тактычна палепшаныя. Гэта не падстава для радасці, гэта руцінная праца, — перасцерагае ад лішняга аптымізму мясцовы канал «Ополчение / Рыльск / Медведь». — На сёння застаецца шмат пытанняў па размяшчэнні лбс (лініі баявога сутыкнення — НН). Ёсць рэчы, якія складана вытлумачальныя і незразумела, чаму адбываецца менавіта так, а не інакш. Бліжэйшыя дні раскрыюць інтрыгу — чаму ВСУ застаюцца там, дзе застаюцца, і адыходзяць там, дзе адыходзяць».
Украінскі бок гэтых паведамленняў пакуль ніяк не каментаваў. Украінскі наступ апошнія тыдні спыніўся, пра заняцце новых населеных пунктаў не паведамлялася. Гэта, імаверна, звязана з перакідваннем расійскіх рэзерваў пад Курск. У тым ліку расійскія войскі ўтрымалі кантроль над Глушкоўскім раёнам нават пасля знішчэння ўкраінцамі мастоў цераз раку Сейм.
Нечаканым рыўком у пачатку жніўня ўкраінская армія заняла каля 1000 квадратных кіламетраў у Курскай вобласці Расіі, але не змагла выйсці да Рыльска, Льгова, Курчатава і самога Курска — найбольшых гарадоў вобласці, што ляжаць на рацэ Сейм. Тым не менш, расіяне былі вымушаныя перакінуць на Куршчыну частку сваіх сілаў з Данбаса.
Шайгу: Пра перамовы з Украінай не можа ісці гаворкі, пакуль не выкінем іх з нашай тэрыторыі
«Нічога там новага няма» — Вальфовіч аб прарыве ўкраінцаў у Курскую вобласць
Кіраўнік Мінабароны Брытаніі: Аперацыя на Куршчыне паставіла Пуціна ў тупік, ён шукае адказ
«За апошнія шэсць дзён праціўнік не прасунуўся ні на метр у кірунку Пакроўска» — Сырскі
Пуцін назваў «святым абавязкам» выціснуць УСУ з Курскай вобласці