Aŭtapierahonny biznes — usio? Chutka stanie nielha pradavać rasijanam śviežapryhnanyja mašyny ź ES i ZŠA
Z 1 kastryčnika 2024 hoda ŭ Rasii pačnuć dziejničać novyja staŭki ŭtylizacyjnaha zboru na aŭto. Voś jak heta zakranie Biełaruś.
19.09.2024 / 07:00
Ilustracyjny zdymak. Fota: «Naša Niva»
Zapłanavany rost cenaŭ da 2030 hoda
U Rasii z 1 kastryčnika 2024 hoda na 70—85% pavyšajucca staŭki ŭtylizacyjnaha zboru. Dalej jon budzie raści kožny hod na 10—20% až da 2030 hoda.
Ekśpierty rasijskaha rynku prahnazujuć, što paśla kastryčnickaha pavyšeńnia ceny na novyja aŭtamabili ŭ Rasii vyrastuć pryblizna na 15%.
Rasijski ŭrad pajšoŭ na takija kroki, kab padtrymać miascovych aŭtavytvorcaŭ (pierš za ŭsie AŭtaVAZ), a taksama stymulavać kitajskich i inšych aŭtavytvorcaŭ budavać zavody terytoryi Rasii. Tamu pavyšeńnie stavak u pieršuju čarhu budzie adbivacca na aŭtamabilach, jakija impartujuć u Rasiju z trecich krain.
Nie ŭsio tak prosta
Reč u tym, što pavyšeńnie stavak utylzboru nie tyčycca fizičnych asob, kali jany nabyvajuć aŭto z-za miažy dla asabistaha vykarystańnia, a abjom ruchavika nie pieravyšaje 3 litry. Dla takich mašyn utylzbor u Rasii zastajecca mizernym — kala 120-185 biełaruskich rubloŭ. U Biełarusi ŭtylzbor za lehkaviki dla fizasob bolšy — 544-816 rubloŭ.
Ilustracyjny zdymak. Fota: «Naša Niva»
Ale lhotnyja staŭki ŭtylzboru ŭ Rasii dziejničajuć tolki ŭ tym vypadku, kali čałaviek nie budzie pradavać mašynu ciaham 12 miesiacaŭ. Kab pradać mašynu raniej, čym praz hod, rasijanam treba dapłacić heta zbor pa kamiercyjnym taryfie. Dla aŭto z abjomam ruchavika ad 1 da 2 litraŭ heta pryblizna 5500 jeŭra.
Pryčym tut Biełaruś?
Važnym momantam dla Biełarusi źjaŭlajecca toj fakt, što pačynajučy z 1 kastryčnika 2024 hoda ŭ Rasii źmianiajucca praviły apłaty ŭtylzboru dla aŭtamabilaŭ, jakija byli razmytnienyja ŭ inšych krainach JEAES, kudy ŭvachodzić i Biełaruś.
Pa novych praviłach, dla taho, kab zapłacić minimalny ŭtylzbor zamiest kala 5500 jeŭra, mašyna musić prabyć u krainie JEAES nie mienš za hod.
Na aŭtamabili, uviezienyja ŭ Rasiju da 1 kastryčnika 2024 hoda, buduć dziejničać raniejšyja praviły apłaty ŭtylzboru pry ŭmovie, što dakumienty ŭ mytnyja orhany buduć padadzienyja nie paźniej za 1 listapada 2024 hoda.
Fota: skrynšot z pastanovy ŭrada RF
Pryčym niekatoryja ŚMI padajuć infarmacyju tak, nibyta novaŭviadzieńni buduć tyčycca tolki mašyn, jakija razmytnienyja ŭ Biełarusi z vykarystańniem 50%-j lhoty pa ŭkazie №140 (dla šmatdzietnych i invalidaŭ).
Ale ŭ rasijskim zakonie nijakich zhadak pra heta niama. Tamu atrymlivajecca, što navat razmytnienyja pa poŭnym taryfie aŭto pry prodažy ŭ Rasiju papadajuć pad apłatu kamiercyjnaha ŭtylzboru, jaki vyličvajecca tysiačami jeŭra.
Pierahonščyki — usio?
Heta aznačaje, što nieŭzabavie biznes pa pieraprodažu śviežapryhnanych aŭto ź Jeŭropy i ZŠA ŭ Rasiju pierastanie isnavać, bo ciaham hoda paśla ŭvozu taki transpart budzie «nieprachadny».
Tamu rasijanam mohuć być cikavyja tolki tyja mašyny, jakija ŭvieźli ŭ Biełarusi minimum za hod da taho.
Ilustracyjny zdymak. Fota: «Naša Niva»
Praz heta biełaruskim handlaram śviežapryhnanymi aŭto ź Jeŭrasajuza i ZŠA ŭ chutkim časie daviadziecca pracavać, raźličvajučy vyklučna na pakupnikoŭ ź Biełarusi.
Situacyja, jakaja składziecca na biełaruskim rynku, krychu nahadvaje pačatak 2010-ch, kali mašyny ŭ Biełarusi padzialali na «prachadnyja na Rasiju i Kazachstan» (jakija trapili ŭ Biełaruś da 2010 hoda), i «nieprachadnyja».
Było 430 tysiač — stała 90 tysiač. Jak pa darozie ź Jeŭrasajuza ŭ Biełaruś mašyny hublajuć sotni tysiač kiłamietraŭ prabiehu
Sankcyi prynosiać svoj plon — prodažy novych aŭto ŭ Biełarusi bjuć rekordy
Zamiena paśviedčańnia kiroŭcy ŭ Biełarusi. Što treba viedać