Zamiena paśviedčańnia kiroŭcy ŭ Biełarusi. Što treba viedać

Kali treba mianiać paśviedčańnie kiroŭcu?

Paśviedčańnie kiroŭcy ŭzoru 2011 hoda vydavałasia terminam na 10 hadoŭ, pa zakančeńni terminu dziejańnia abaviazkova treba zamianiać jaho na novaje.

Kiroŭca z praterminavanym paśviedčańniem pryraŭnoŭvajecca da biaspraŭnika, tamu varta ŭvažliva sačyć za terminam dziejańnia dakumienta. Minimalny štraf — 5 bazavych vieličyniaŭ (200 rubloŭ na ciapierašni momant).

Taksama paśviedčańnie treba mianiać pry źmienie proźvišča i ŭ vypadkach fizičnaha znosu dakumienta.

Pry hetym zakanadaŭstva nie zabaraniaje zamianić dakumient na novy pa ŭłasnym žadańni. Naprykład, kali vy źmianili imidž abo vam prosta nie padabajecca, jak vy vyhladajecie na starym zdymku. 

Što treba mieć pry sabie?

Dla zamieny paśviedčańnia kiroŭcy treba mieć pry sabie nastupny pieralik dakumientaŭ:

• Pašpart abo dazvoł na žycharstva;
• Dziejnaja miedycynskaja daviedka ŭzoru 1 zdr/u-10;
• Staroje paśviedčańnie kiroŭcy (kali jano nie zhublena);
• Zajava;
• Paćviardžeńnie apłaty za pasłuhi pa zamienie paśviedčańnia.

Abmianiać paśviedčańnie kiroŭcy možna ŭ lubym padraździaleńni DAI niezaležna ad miesca rehistracyi.

Kolki kaštuje?

Zamiena paśviedčańnia kiroŭcy kaštuje 2 bazavyja vieličyni (80 rubloŭ).

Kali zamiena adbyvajecca praz toje, što vy zhubili staroje paśviedčańnie, to daviadziecca zapłacić 3 bazavyja (120 rubloŭ).

Dadatkova treba apłacić 0,04 bazavaj (1,6 rub) za kampjutarnyja pasłuhi i 0,08 bazavaj (3,2 rub) za afarmleńnie zajavy. Druhuju z hetych sum možna sekanomić, kali padrychtavać zajavu doma.

Apłačvać možna praz adździaleńnie banka, Biełpoštu abo praz ARIP.

Maksimalny termin zamieny paśviedčańnia kiroŭcy składaje 3 pracoŭnyja dni z momantu padačy zajavy. Na praktycy novy płastyk zvyčajna vydajuć dzień u dzień abo na nastupny pracoŭny dzień.

Pavialičyć

20 hadoŭ zamiest 10

Z 23 sakavika 2024 hoda paśviedčańnie kiroŭcy ŭ Biełarusi vydajuć terminam na 20 hadoŭ, a nie na 10 hadoŭ, jak heta było raniej.

Biesterminovyja pravy z abmiežavańniami

Ale jość peŭnaja katehoryja kiroŭcaŭ u Biełarusi, jakich zamiena pravoŭ nie tyčycca. Heta tyja ludzi, jakija paśpieli atrymać paśviedčańnie kiroŭcy jašče ŭ časy isnavańnia SSSR. 

Savieckaje paśviedčańnie biesterminovaje, biełaruskaje zakanadaŭstva nie abaviazvaje kiroŭcaŭ zamianiać jaho na novaje. 

Ale jość važny niuans. Biełaruś — adzinaja kraina, jakaja dahetul pryznaje biesterminovaje paśviedčańnie kiroŭcy savieckaha ŭzoru. Tamu vyjazdžać pa im za miežy Biełarusi nielha, navat u Rasiju.

• 1
• 0
• 1
• 0
• 1
• 0
• 0
• 0