Беларуса, які кінуў два «кактэйлі Молатава» ў каралеўскі палац у Осла, прысудзілі да шасці месяцаў турмы
На судзе мужчына растлумачыў, што дзейнічаў у роспачы.
24.09.2024 / 10:52
Фота: VG-tipser / Jan Gregersen
Беларуса, які 8 ліпеня кінуў два «кактэйлі Молатава» ў каралеўскі палац у Осла, прысудзілі да шасці месяцаў турмы, піша «Беларусь і свет» са спасылкай на Dagbladet.
Абвінавачванне прасіла прызначыць 50-гадоваму беларусу восем месяцаў пазбаўлення волі. Пры вынясенні прысуду акруговы суд Осла ўлічыў слабое здароўе мужчыны і тое, што ён перасоўваецца на інвалідным вазку.
На судзе мужчына растлумачыў, што дзейнічаў у роспачы: хацеў прыцягнуць увагу да несправядлівасцяў, якім ён падвергнуўся, асабліва ў цэнтры прыёму бежанцаў у Нідэрландах, а таксама, што не можа вярнуцца ва Украіну, дзе пражываў раней. Ён прызнаў сябе вінаватым, пагадзіўся з прысудам і папрасіў прабачэння ў жыхароў Осла і Нарвегіі.
8 ліпеня мужчына на інвалідным вазку кінуў два «кактэйлі Молатава» ў будынак каралеўскай рэзідэнцыі ў Осла. Яны патрапілі ў дзверы ў задняй частцы будынка, яна загарэлася. Ніхто не пацярпеў, агонь змаглі хутка патушыць.
Паводле інфармацыі нарвежскага выдання, беларус прыехаў у Нарвегію за тыдзень да здарэння. Вядома, што мужчына знаходзіцца ў вышуку ў Нідэрландах за іншае правапарушэнне.
У Осла беларус кінуў два кактэйлі Молатава ў каралеўскі палац