U Polščy pakul nie mohuć stvaryć «Ukrainski lehijon» — niama achvotnych
Ministr abarony Polščy Uładzisłaŭ Kosiniak-Kamyš zajaviŭ u intervju partału Wirtualna Polska, što polskija ŭłady pakul što nie znajšli dastatkovaj kolkaści ŭkraincaŭ, jakija žyvuć u Polščy i žadajuć ustupić u «Ukrainski lehijon», kab adpravicca na radzimu vajavać.
02.10.2024 / 19:51
Ministr abarony Polščy Uładzisłaŭ Kosiniak-Kamyš. Fota: AP Photo/Czarek Sokolowski
Pavodle słoŭ Kosiniaka-Kamyša, Kijeŭ rabiŭ hučnyja zajavy adnosna nibyta hatovych dałučycca da USU ŭkraincaŭ z Polščy. Havorka išła pra tysiačy achvotnych, ale nasamreč polskim uładam pakul nie ŭdałosia sfarmavać navat adnoj bryhady.
«My nie niasiom adkaznaści za viarboŭku. Kolkaść ludziej, jakija pavinny byli vyzvacca z ukrainskaha boku, zanadta małaja. Čakańni na pačatku byli vielmi vysokimi — što moža być sfarmavanaja navat adna bryhada, h.zn. niekalki tysiač čałaviek. Adnak hetaha nie adbyłosia», — zajaviŭ Kosiniak-Kamyš.
Pierad hetym u lipieni hetaha hoda było padpisana ŭkrainska-polskaje abarončaje pahadnieńnie. Prezident Ukrainy Uładzimir Zialenski tady zajaviŭ, što na terytoryi Polščy płanujecca sfarmavać padraździaleńnie pad nazvaj «Ukrainski lehijon». Hetaje dobraachvotnaje farmavańnie budzie prachodzić padrychtoŭku ŭ Polščy, za jaho zabieśpiačeńnie buduć adkazvać sajuźniki Ukrainy, a Ukraina biare na siabie viarboŭku.
U vieraśni kiraŭnik MZS Polščy Radasłaŭ Sikorski zajaŭlaŭ:
«My sa svajho boku daŭno ŭsio zrabili. Ciapier čakajem ukrainskich pryzyŭnikoŭ ci dobraachvotnikaŭ».
Pa jaho słovach, u Polščy znachodziacca tysiačy ludziej, zarehistravanych u bazie Ukrainy.
«Mnohija ź ich sapraŭdy chočuć słužyć i zamianić svaich suajčyńnikaŭ, ale jany kažuć: my nie chočam być adpraŭlenymi ŭ boj, nie budučy naležnym čynam navučanymi i ekipiravanymi», — rastłumačyŭ Sikorski.
Pasoł Ukrainy ŭ Polščy Vasil Zvaryč u sioletnim mai zajaviŭ, što da pačatku poŭnamaštabnaha ŭvarvańnia Rasii va Ukrainu ŭ Polščy žyli ad 1,5 da 2 młn ukraincaŭ, jašče 1,3 młn vyjechali tudy paśla 24 lutaha 2022 hoda. Pa stanie na maj 2024 hoda ŭ Polščy taksama zastavałasia kala 950 tys. biežancaŭ, nie ličačy ŭkrainskich hramadzian, jakija žyvuć tam, pracujuć i płaciać padatki.
Sikorski prapanavaŭ pieradać Krym na 20 hadoŭ pad mandat AAN
Paźniak prapanavaŭ stvaryć anałah «Biełsata» — ukrainski telekanał ź viaščańniem na Biełaruś