Dźviarnoha majstra z Kalinkavičaŭ buduć sudzić pa 4 palityčnych artykułach. U sacsietkach jon chvalić Pucina i Kadyrava
U 2020-m Hienadź Karniejaviec padtrymaŭ ruch za svabodnyja vybary. Ale paśla pačatku vajny rašuča vystupiŭ za Rasiju. Ciapier jamu pahražaje da 6 hadoŭ kałonii za staryja reposty.
05.10.2024 / 11:36
Hienadź Karniejaviec. Fota ź jahonaj staronki ŭ Adnakłaśnikach
Hienadziu Karniejaŭcu 55 hadoŭ. Jon naradziŭsia i vyras u Kalinkavičach, rajcentry na Homielščynie. Viadoma, što apošnija hady mužčyna byŭ indyvidualnym pradprymalnikam, zajmaŭsia pracami pa dźviarach — ustanoŭkaj i ramontam dźviarej i arak u Kalinkavičach i vakolicach.
U 2020-m mužčyna repościŭ publikacyi niezaležnych miedyja i supołak u roznych sacsietkach.
Adzin z davajennych repostaŭ Hienadzia ŭ Adnakłaśnikach
Ale z pačatkam rasijskaha ŭvarvańnia va Ukrainu ton jahonych publikacyj źmianiŭsia. Ciapier bolšaja ich častka pryśviečanaja padtrymcy Rasii ŭ vajnie. Choć i raniej jon repościŭ niešta pra Pucina, ale, chutčej, epizadyčna.
Skrynšoty sa staronki Hienadzia ŭ Adnakłaśnikach. Staronka mužčyny ź lutaha 2022 hoda składajecca ź ich amal całkam
Sacsietki Hienadzia nie abnaŭlajucca z maja 2024 hoda. 13 červienia 2024 hoda jaho asudzili za «raspaŭsiud ekstremisckich materyjałaŭ» u sudzie Kalinkavickaha rajona. Padobna, paśla na jaho zaviali kryminalnuju spravu.
Sud nad Hienadziem pačniecca 11 kastryčnika 2024 hoda ŭ sudzie Žytkavickaha rajona. Jaho vinavaciać va «ŭdziele ŭ dziejańniach, jakija hruba parušajuć hramadski paradak» (č. 1 art. 342 KK), «paklopie» (art. 188 KK), «paklopie na Łukašenku» (č. 1 i 2 art. 367 KK) i «abrazie Łukašenki» (č. 1 art. 368 KK). Žycharu Kalinkavičaŭ pahražaje da šaści hadoŭ kałonii.
Sudzić jaho budzie Alaksandr Anoška, jaki asudziŭ pa palityčnych spravach z 2020 hoda čatyroch čałaviek.
Jak zaścierahčy siabie ŭ VK, Facebook i «Adnakłaśnikach» — padrabiazny hajd
Raskazvajem, jak daviedacca, dzie i kamu vy stavili łajki ŭ sacsietkach, i pierastrachavacca