Biahucha Cimanoŭskaja hatovaja sudzicca z byłym mužam za 33000 dalaraŭ i pahražaje pazbavić jaho hramadzianstva
Biełaruski płyviec Jaŭhien Curkin u žniŭni 2023 hoda raskazvaŭ, što paśla zaviaršeńnia spartyŭnaj karjery i pierajezdu ŭ Polšču pačaŭ treniravać dziaciej u Varšavie i zajmacca biznesam — kuplaj i dastaŭkaj aŭtamabilaŭ z ZŠA. Jahonym partnioram pa hetym prajekcie staŭ Arsienij Zdanievič, były muž biahuchi Kryściny Cimanoŭskaj (para raźviałasia ŭ 2023 hodzie). Ale skončyŭsia hety biznes nie nadta dobra, daviedałasia «Trybuna».
07.10.2024 / 17:29
Arsienij Zdanievič
Pradpryjemstva pracavała tak: mašyny kuplali na aŭkcyjonie, ramantavali i dastaŭlali klijentam u Polšču.
Adnak urešcie supracoŭnictva z Curkinym nie atrymała raźvićcia i naohuł zharnułasia. Jašče viasnoj «Trybunie» stała viadoma pra vychad Curkina z aŭtamabilnaha prajekta. Były muž Cimanoŭskaj praciahnuŭ haniać mašyny ŭžo ŭ adzinočku. Hetym jon zajmaŭsia da niadaŭniaha času. Adnak vielmi padobna, što ŭ biznesie ŭ Zdanieviča paŭstali prablemy.
Jak minimum piaciora čałaviek śćviardžajuć, što addali jamu svaje hrošy, ale abiacanyja mašyny nie atrymali. Ludzi źbirajucca padać kalektyŭny isk u polski sud, bo ličać siabie paciarpiełymi.
U materyjale «Trybuny» zhadvajecca, što Zdanievič zarehistravaŭ u Polščy kampaniju USA CAR EXPRESS, jakaja zajmałasia dastaŭkaj aŭtamabilaŭ z ZŠA. Adnak z vosieni 2023 hoda klijenty nie atrymlivali abiacanyja mašyny i nie mahli źviazacca z Zdanievičam.
Paviedamlajecca, što sam jon ciapier znachodzicca ŭ Hruzii, praciahvaje vieści raskošny ład žyćcia, kuplaje darahija rečy, ale nie vykonvaje abaviazacielstvy pierad klijentami.
Byłyja partniory i navat byłaja žonka Kryścina Cimanoŭskaja taksama majuć finansavyja pretenzii da Zdanieviča. Cimanoŭskaja raskazała, što Zdanievič nibyta prysvoiŭ dźvie mašyny, jakija byli kuplenyja za jaje 30000 dalaraŭ, a taksama nie viarnuŭ joj doŭh u 3000 dalaraŭ.
«Ja dała jamu svaich 30 tysiač dalaraŭ. My zakazali dźvie mašyny jašče letaś, kali jon tolki zaniaŭsia biznesam. Heta byŭ pieryjad, kali ja źjechała na čempijanat śvietu (i tam daviedałasia pra čarhovuju zdradu) i zahavaryła pra razvod. Da majho viartańnia jon hetyja dźvie ŭžo dastaŭlenyja mašyny pierapisaŭ na siabroŭ. Možna skazać, jon skraŭ u mianie dźvie mašyny na 30 tysiač dalaraŭ.
Na žal, pakolki aŭto pieršapačatkova nie byli zarehistravanyja ni na kaho z nas dvaich, ja ničoha nie dakazała. Jon prosta mianie kinuŭ — i ŭsio, ja straciła hrošy.
Taksama jon uziaŭ u mianie ŭ doŭh 3 tysiačy dalaraŭ. Napisaŭ raśpisku i abiacaŭ viarnuć. Naturalna, ničoha nie viarnuŭ i navat pry najaŭnaści raśpiski skazaŭ, što ničoha nie pavinien», — raskazvaje Kryścina Cimanoŭskaja.
Dziela taho biahucha zajaŭlaje, što
«kali raptam niejki dobry advakat hatovy ŭziacca za hetuju spravu z mašynami, kab dapamahčy i mnie, i inšym, to ja z zadavalnieńniem budu supracoŭničać i navat hatovaja paspryjać u pazbaŭleńni jaho [Arsienia Zdanieviča] polskaha hramadzianstva, tamu što jon heta hramadzianstva atrymaŭ dziakujučy mnie».
Cimanoŭskaja pradaje darahoje aŭto, padoranaje byłym mužam
«Zrazumieła, što vartaja lepšaha». Kryścina Cimanoŭskaja razvodzicca
Muž Cimanoŭskaj — pra charaktar žonki, rasstavańni ź joju, adjezd ź Biełarusi i zarobki