Vialiki Jehipiecki muziej u Hizie adkryŭsia paśla 20 hadoŭ budaŭnictva
U muziei sabranaja ŭnikalnaja ekspazicyja.
18.10.2024 / 16:10
Ekspazicyja Vialikaha Jehipieckaha muzieja ŭ Hizie. Fota: Sayed Hassan/Getty Images
16 kastryčnika Vialiki Jehipiecki muziej častkova adkryŭ asnoŭnyja halerei dla testavaha zapusku, prymajučy da čatyroch tysiač naviedvalnikaŭ u dzień. Pra heta paviedamlaje Associated Press.
Probny zapusk, pavodle słoŭ pamočnika ministra turyzmu i staražytnaściaŭ Jehipta pa archieałahičnych pytańniach muzieja al-Tajeba Abasa, dapamoža padrychtavacca da poŭnaha adkryćcia — naprykład, vyznačyć miescy, dzie ŭ muziei ŭźnikajuć pierapoŭnienyja zony. Aficyjnaja data adkryćcia pakul nie abvieščanaja.
Ekspazicyja Vialikaha Jehipieckaha muzieja ŭ Hizie. Fota: Mohamed Elshahed/Anadolu via Getty Images
Ekspazicyi ŭ 12 załach muzieja achoplivajuć hramadstva, relihiju i dziaržaŭny ład Staražytnaha Jehipta, dadaŭ al-Tajeb Abas. Usie zały padzielenyja pa dynastyjach i raźmieščanyja ŭ histaryčnym paradku, i ŭ kožnaj budzie pradstaŭlena nie mienš za 15 tysiač artefaktaŭ.
Ekspazicyja Vialikaha Jehipieckaha muzieja ŭ Hizie. Fota: Gehad Hamdy/picture alliance via Getty Images
Pakul što naviedvalnikam buduć adkrytyja tolki 10 załaŭ, astatnija dźvie zały stanuć dastupnymi paśla aficyjnaha adkryćcia kompleksu.
«Što tyčycca aficyjnaha adkryćcia, to ciapierašniaja situacyja ŭ śviecie — niespryjalnaja. Rašeńnie budzie prymać palityčnaje kiraŭnictva krainy», — skazaŭ al-Tajeb Abas.
Vialiki Jehipiecki muziej. Fota: Grand Egyptian Museum
Budaŭnictva Vialikaha Jehipieckaha muzieja pobač ź piramidami Hizy pačałosia ŭ 2005 hodzie i kaštavała bolš za adzin miljard dołaraŭ. Adkryćcio muzieja płanavałasia na 2020 hod, ale nieadnarazova adkładałasia pa roznych pryčynach, uklučajučy pandemiju karanavirusa. Z kanca 2022 hoda niekatoryja siekcyi muzieja adkrytyja dla abmiežavanych ekskursij z metaj adpracoŭki vopytu i łahistyki pryjomu naviedvalnikaŭ.
Uvachod u Vialiki Jehipiecki muziej. Fota: Grand Egyptian Museum
Vialiki Jehipiecki muziej płanuje prymać nie mienš za 3 miljony turystaŭ štohod. Pavodle zadumy architektaraŭ, pamiž piramidami Hizy i kulturnym kompleksam budzie stvorana piešachodnaja zona, kab naviedvalniki «mahli ździejśnić zajmalnaje padarožža ad staražytnych piramid da skarbaŭ faraonaŭ».
Ceny na ŭvachodnyja bilety dla turystaŭ pačynajucca ad 1 200 jehipieckich funtaŭ (kala 23 jeŭra).
Na samaj viaršyni piramidy Chieopsa ŭ Jehipcie zaŭvažyli sabaku
Navukoŭcy raskryli adnu z hałoŭnych tajamnic jehipieckich piramid
Staražytnaści z razrabavanych muziejaŭ Sudana pradajucca za biescań na aŭkcyjonach