Jašče adzin biełarus, jakomu pahražała ekstradycyja na radzimu, atrymaŭ status uciekača ŭ Armienii
22 kastryčnika Słužba mihracyi i hramadzianstva MUS Armienii pryniała rašeńnie ab nadańni statusa ŭciekača biełarusu Uładzimiru Bałandzinu, paviedamlaje «Radyjo Svaboda».
22.10.2024 / 22:05
Uładzimir Bałandzin
36-hadovaha hramadzianina Biełarusi Uładzimira Bałandzina zatrymali na hruzinska-armianskaj miažy, u kantrolna-prapusknym punkcie Bahratašen, i źmiaścili ŭ turmu ŭ Armienii ŭ sakaviku 2024 hoda.
Jak śćviardžajuć u Minsku, na radzimie Bałandzina abvinavačvajuć nibyta ŭ rastracie. Miž tym advakaty biełarusa śćviardžajuć, što vytvorcu mebli Bałandzina pryciahnuli da adkaznaści za ŭdzieł u pratestach 2020 hoda suprać vynikaŭ prezidenckich vybaraŭ u Biełarusi.
Vanadzorski ofis Chielsinkskaj hramadzianskaj asamblei bolš za vosiem miesiacaŭ zajmaŭsia abaronaj pravoŭ Bałandzina, kab nie dapuścić jahonaj ekstradycyi ŭ Biełaruś.
Hienprakuratura Armienii pryniała rašeńnie vydać Uładzimira Bałandzina Biełarusi 31 traŭnia. U armianskaj prakuratury zajavili, što biełaruskaja Hienprakuratura nibyta dała harantyi abarony jahonych pravoŭ i svabodaŭ. Rašeńnie armianskaj prakuratury, jakoje dazvoliła ekstradycyju, asprečvali ŭ armianskich sudach, ale marna.
Uładzimier Bałandzin raniej padaŭ zajaŭku na atrymańnie prytułku, jaje paralelna razhladała Słužba mihracyi i hramadzianstva MUS Armienii.
Ciapier stała viadoma, što chadajnictva biełarusa zadavolili — Uładzimiru Bałandzinu bolš nie pahražaje niebiaśpieka ekstradycyi, pakolki ciapier jon maje status uciekača ŭ Armienii, a jahonaja ekstradycyja zabaronienaja kanviencyjaj, zaznačajuć pravaabaroncy.
Hienprakuror Švied abmierkavaŭ u Armienii pytańnie vydačy biełarusaŭ pa zapytach režymu
Armienija na pasiadžeńni ŭ Maskvie admoviłasia padpisvać dźvie zajavy ad imia SND
Łapšyn miarkuje, što inicyjataram jaho zatrymańnia ŭ Armienii staŭ pasoł Kaniuk
U Jerevanie pa biełaruskim zapycie zatrymlivali błohiera Aleksandra Łapšyna