Kreml narešcie pryznaŭ, što Saudaŭskaja Aravija admoviłasia ad členstva ŭ BRIKS
Rasijskija ŭłady mocna spadziavalisia zaručycca padtrymkaj Saudaŭskaj Aravii na samicie BRIKS u Kazani i navat paznačyli jaje ŭ prezientacyi samitu jak paŭnapraŭnaha člena arhanizacyi, adnak realnaść akazałasia daloka nie takoj viasiołkavaj.
24.10.2024 / 10:38
Saudaŭski prync Machamied bien Sałman z prezidentam Ukrainy Uładzimiram Zialenskim u lutym 2024 hoda. Fota: Bandar Aljaloud/Saudi Royal Palace via AP
Saudaŭskaja Aravija, jakaja atrymała zaprašeńnie ŭstupić u BRIKS u pačatku 2024 hoda, tak i nie stała paŭnavartasnym členam błoka, pryznaŭ pamočnik Pucina pa mižnarodnych spravach Juryj Ušakoŭ, pieradaje ahienctva The Moscow Times sa spasyłkaj na TASS.
«Saudaŭskaja Aravija na samicie BRIKS u Kazani znachodzicca ŭ statusie zaprošanaj dziaržavy. Heta značyć, možna skazać, što Saudaŭskaja Aravija budzie ŭdzielničać nie na samim samicie BRIKS, a na sustrečy ŭ farmacie «BRIKS Plus», praduhledžanym dla krain, jakija nie ŭvachodziać u arhanizacyju», — zajaviŭ Ušakoŭ u kamientarach da TASS.
Kreml jašče ŭ studzieni abviaściŭ, što Saudaŭskaja Aravija dałučyłasia da BRIKS z pačatku 2024 hoda razam z AAE, Efiopijaj, Jehiptam i Iranam, što pavialičyła kolkaść udzielnikaŭ arhanizacyi da 10 krain. Praz dva tydni ministr handlu karaleŭstva Madžyd al-Kasabi abvierh rasijskija zajavy, a krynicy ahienctva Reuters u Er-Ryjadzie ŭdakładnili, što zaprašeńnie ŭ BRIKS usio jašče znachodzicca na stadyi razhladu.
Niahledziačy na heta, Saudaŭskaja Aravija była ŭklučana ŭ prezientacyi samitu jak paŭnapraŭny člen arhanizacyi, ale naśledny prync karaleŭstva Machamied bien Sałman tak i nie pryjechaŭ na samit, adpraviŭšy zamiest siabie kiraŭnika MZS krainy, tłumačyć The Moscow Times.
Pra toje, što Kreml žadaje bačyć Machamieda bien Sałmana na samicie BRIKS u Kazani, jaki rasijskija ŭłady nazvali «samaj značnaj zamiežnapalityčnaj padziejaj» u rasijskaj historyi, u vieraśni paviedamlaŭ kiraŭnik MZS RF Siarhiej Łaŭroŭ. Ale Er-Ryjad tady adkazaŭ admovaj.
«Saudaŭskaja Aravija nakiruje ministra zamiežnych spraŭ», — zajaviŭ raniej usio toj ža pamočnik Pucina pa mižnarodnych spravach Juryj Ušakoŭ, kamientujučy padrychtoŭku samitu. Z čym źviazanaje rašeńnie prynca, Ušakoŭ tady nie ŭdakładniŭ, abmoviŭšysia, što na partnioraŭ Rasii cisnuć zachodnija krainy, pahražajučy nastupstvami ŭ vypadku pajezdki ŭ Kazań.
Saudaŭskaja Aravija, jakaja nie dałučyłasia da antyrasijskich sankcyj, paśla pačatku vajny zastavałasia klučavym sajuźnikam Kramla na rynku nafty. Choć administracyja Džo Bajdena vosieńniu 2022 hoda ŭhavorvała saudytaŭ pavialičyć zdabyču, kab zamianić rasijskija bareli, jakija trapili pad embarha, Machamied bien Sałman zastaŭsia vierny sajuzu z Pucinym i, naadvarot, skaraciŭ pastaŭki na 2 młn barelaŭ na dzień. Metaj było ŭtrymlivać kaciroŭki blizka da $100 za barel.
Ale praz dva hady nastroi ŭ Er-Ryjadzie pačali mianiacca. Karaleŭstva zaniepakojenaje źnižeńniem svajoj doli na rynku i maje namier pierajści da palityki pavieličeńnia zdabyčy, navat kali dla hetaha pryjdziecca doŭha trymać nizkija ceny, raskazali ŭ kancy vieraśnia znajomyja ź situacyjaj krynicy Financial Times.
Ministr enierhietyki Saudaŭskaj Aravii prync Abdel Aziz bien Sałman zajaviŭ, što niekatoryja krainy kartela APIEK+, u pryvatnaści Kazachstan i Irak, nie vykonvajuć svaje kvoty, i pryhraziŭ, što košt barela moža abrynucca da $50.
Dla Rasii heta najhoršy scenar z mahčymych, adznačaje Luk Kupier, navukovy supracoŭnik Łondanskaj škoły ekanomiki: krušeńnie naftavych kacirovak da ŭzroŭniaŭ 2014-2016 hadoŭ istotna ŭskładnić Pucinu «finansavańnie jaho vajskovaj mašyny». U biudžet biahučaha hoda ŭrad zakłaŭ naftu pa $70 i prykładna na takuju ž canu ($69,7) raźličvaje ŭ nastupnym hodzie.
Saudaŭskaja Aravija, u adroźnieńnie ad Rasii, moža lahčej pieražyć tannuju naftu, tłumačyć Kupier: radoviščy ŭ Aravijskaj pustyni znachodziacca značna bližej da pavierchni, čym sibirskija pakłady ŭ viečnaj mierzłacie, a tamu sabiekošt saudaŭskich barelaŭ nižejšy. Da taho ž Er-Ryjad moža lohka i chutka naraścić vytvorčaść i kampiensavać cenavyja straty za košt abjomaŭ.
Jak heta adbyvajecca, bien Sałman nahladna prademanstravaŭ Pucinu ŭ 2020 hodzie, kali Rasija ŭ razhar pandemii vyrašyła vyjści sa ździełki APIEK+. Saudaŭskaja Aravija naraściła zdabyču da 12 młn barelaŭ za dzień, abviaściła rekordnyja za 30 hadoŭ źnižki i spuściła naftavyja ceny da ŭzroŭniaŭ 1990-ch hadoŭ (mienš za $10 za barel Brent). Praź niekalki miesiacaŭ Kreml byŭ vymušany kapitulavać, viarnucca ŭ pahadnieńnie i, pavodle novych umoŭ, skaracić zdabyču bolš za ŭsich.
«U adroźnieńnie ad saudaŭskaj, rasijskaja nafta nie źjaŭlajecca tannaj u zdabyčy. Tamu (Rasija) drenna padrychtavanaja da situacyi nizkich cen, — adznačaje Kupier. — Heta tłumačyć rasijskuju łohiku vajskovaj eskałacyi, jakaja patrabuje chutkich pośpiechaŭ na poli boju — da taho, jak ceny nafty ŭpaduć».
Ciapier Saudaŭskaja Aravija pampuje 8,9 młn barelaŭ u dzień — i heta minimalnaja zdabyča z 2011 hoda. Sa śniežnia karaleŭstva pačnie dadavać na rynak 83 tysiač barelaŭ u dzień kožny miesiac i da kanca śniežnia 2025 hoda pavialičyć pastaŭki na 1 młn barelaŭ u dzień.
Kitaj uvodzić kantrol nad ekspartam tavaraŭ padvojnaha pryznačeńnia na fonie vajny va Ukrainie