Saudaŭskaja Aravija pahražaje Rasii padzieńniem cen na naftu da $50 za baral
Er-Ryjad miarkuje, što Rasija, Irak i Kazachstan nie prytrymlivajucca ŭziatych na siabie abaviazacielstvaŭ.
Ministr nafty Saudaŭskaj Aravii zajaviŭ, što ceny mohuć upaści da $50 za baral, kali «parušalniki» ŭ miežach OPEC+ nie buduć prytrymlivacca ŭzhodnienych abmiežavańniaŭ na vytvorčaść, piša infarmavanaje vydańnie «Uoł-stryt džornał» sa spasyłkaj na pradstaŭnikoŭ krain kartela.
Hetyja zajavy inšyja vytvorcy interpretavali jak schavanuju pahrozu ad karaleŭstva, što jano hatovaje raźviazać cenavuju vajnu dla zachavańnia svajoj doli na rynku, kali inšyja krainy nie buduć prytrymlivacca pahadnieńniaŭ hrupy.
OPEC+ — heta kartel, u jaki ŭvachodziać jak 12 krain-udzielnic Arhanizacyi krain-eksparcioraŭ nafty (OPEC), tak i 10 inšych dziaržaŭ, u tym liku Rasija. OPEC+ była ŭtvoranaja ŭ 2016 hodzie dla taho, kab trymać ceny na naftu na vysokim uzroŭni.
Adpaviedna, heta pavyšaje i ceny na haz. Krainy-imparciorki vuhlevadarodaŭ, siarod jakich Kitaj, Indyja i krainy Jeŭrasajuza, nie zdoleli ničoha zrabić z hetaj kartelnaj zmovaj.
Zbližeńnie Rasii z Saudaŭskaj Aravijaj na asnovie supolnaha intaresu ŭ vysokich cenach na naftu pamianiała raskład siłaŭ na mižnarodnaj arenie. Biez hetaha Maskva naŭrad ci b mieła dastatkova hrošaj, kab vyrašycca na sprobu zachopu Ukrainy ŭ 2022 hodzie.
Apošnija try miesiacy ceny na naftu mieli tendencyju da źnižeńnia. Nafta Brent kaštavała bolš za 80 dalaraŭ za baral (bočka ŭ 159 litraŭ) u červieni, u vieraśni jaje cana apuściłasia nižej za 70 dalaraŭ. Praŭda, paśla zabojstva Izrailem lidara arhanizacyi «Chiezbała» i ŭdaru Irana pa Izraili ŭ aŭtorak ceny na naftu trochi padskočyli.
Adnak u cełym napružanaść na Blizkim Uschodzie istotna na ceny nafty pakul nie ŭpłyvaje.
Na minułym tydni padčas telefonnaj kanfierencyi ministr nafty Saudaŭskaj Aravii, prync Abdułaziz bin Sałman, papiaredziŭ inšych vytvorcaŭ, što ceny mohuć upaści da $50 za baral, kali jany nie buduć prytrymlivacca ŭzhodnienych skaračeńniaŭ vytvorčaści, zhodna z paviedamleńniami delehataŭ OPEC, jakija ŭdzielničali ŭ kanfierencyi.
Jak paviedamlajecca, jon vyłučyŭ Irak, jaki ŭ žniŭni pierabraŭ svaje kvoty na 400 000 baralaŭ za dzień, i Kazachstan, vytvorčaść u jakim pavinna ŭzraści z adnaŭleńniem radovišča Tenhiz, zdolnaha davać 720 000 baralaŭ za dzień.
Saudaŭskaje pasłańnie było nastupnym: «Niama sensu dadavać bolš baralaŭ, kali dla ich niama miesca na rynku», — skazaŭ adzin z delehataŭ. «Niekatorym lepš zamaŭčać i pavažać svaje abaviazki pierad OPEC+».
Skaračeńni vytvorčaści OPEC+ pryviali da skaračeńnia doli krain hrupy na suśvietnym rynku. Sioleta jana skłała 48%, što mienš za 50% u 2023 hodzie i 51% u 2022 hodzie, zhodna z danymi Mižnarodnaha enierhietyčnaha ahienctva (IEA). U nastupnym hodzie kankurencyja, jak čakajecca, jašče bolš abvostrycca.
Płanujecca, što sioleta zdabyča nafty ŭ ZŠA, Hajanie i Brazilii vyraście bolš čym na 1 miljon baralaŭ u dzień. Brazilija dałučyłasia da hrupy OPEC+ sioleta, ale zajaviła, što nie budzie ŭdzielničać u skaračeńni vytvorčaści. ZŠA i Hajana ŭ OPEC+ nie ŭdzielničajuć.
Analityki miarkujuć, što Rasija taksama sioleta ekspartavała bolš, čym dazvalała joj kvota. Maskvie patrebnyja hrošy dla viadzieńnia vajny.
Biudžet Saudaŭskaj Aravii taksama spłanavany tak, što joj patrebnyja ceny na ŭzroŭni $85 za baral, kab finansavać svaju ekanamičnuju transfarmacyju.
Apošniaja cenavaja vajna na rynku nafty zdaryłasia ŭ sakaviku 2020 hoda, kali Saudaŭskaja Aravija dabivałasia sastupak ad Rasii. Tady źnižeńnie ekanamičnaj aktyŭnaści na fonie pandemii pryviało da padzieńnia cen na naftu nižej za 40 dalaraŭ amal na hod.
Biełaruś za apošnija dziesiacihodździ pieratvaryłasia ŭ ekanamičnym sensie ŭ prydatak Rasii. Choć zdabyča nafty ŭ Biełarusi i nie pakryvaje ŭłasnych patreb, my atrymlivajem reštu nafty pa źnižanych cenach. Tamu finansava Biełaruś apynajecca ŭ vyjhryšy ŭ pieryjady vysokich cen na naftu: tady raście rasijski rynak, na jaki Biełaruś ekspartuje bolšaść svaich tavaraŭ i pasłuh. U toj ža čas źnižeńnie cen na enierhanośbity zvyčajna pryvodzić da zapavolvańnia i biełaruskaj ekanomiki.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič7
Kamientary
Darečy, transpart nafty ź Blizkaha Ŭschodu dla ES prablemny, a dziejańni Irana robiać jaho j niebiaśpiečnym. Inšaja sprava Hajana, pierachod ź jakoj dla tankiera pamieru VLCC ( z 2 młn barelaŭ nafty na borcie) zajmaje 10-11 dzion... Da ZŠA dyk i ŭvohule 5-6 dzion chopić... To bok, možna ličyć, što rehijon Piersickaj zatoki bolš nie ŭ stanie napužać ES i ZŠA enerhietyčnym kryzysam, saŭdytam zastaniecca malicca na Kitaj ź Indyjaj, a iranskija pahrozy blakavać Harmuz nia spyniać rašučaść Izraila.