Centrabank Rasii pavysiŭ klučavuju staŭku da rekordnych 21%. Jak heta zakranie Biełaruś?
Centrabank Rasii pryniaŭ rašeńnie pavysić klučavuju staŭku z 19% da 21%. Heta ŭžo treciaje pavyšeńnie ciaham hoda — i maksimalnaje ŭ historyi Rasii. «Naša Niva» spytała ŭ ekanamista Lva Lvoŭskaha, što heta aznačaje i jak zakranie Biełaruś.
25.10.2024 / 16:52
Elvira Nabiulina, staršynia Centrabanka Rasii. Fota: Maksim Konstantinov/SOPA Images/LightRocket via Getty Images
Navošta heta rabić?
Klučavaja staŭka — heta minimalny pracent, pad jaki Centrabank vydaje kredyty kamiercyjnym bankam. Kali staŭka vysokaja, hramadzianam i biznesu brać kredyty niavyhadna. Jany pačynajuć mienš tracić hrošaj. Praz heta ahulny abarot hrašovych srodkaŭ u ekanomicy źnižajecca.
Akademičny dyrektar BEROC Leŭ Lvoŭski tłumačyć takija dziejańni tym, što rasijskija ŭłady bačać surjozny pierahreŭ ekanomiki, tamu i prymajuć zachady, kab jaje astudzić.
«Na pierahreŭ upłyvajuć vialikija vajennyja vydatki, jakija adbyvajucca biez adpaviednaha rostu ekanomiki. Rost vydatkaŭ niesuvymierny rostu prapanovy, tamu staršynia Centrabanka RF Elvira Nabiulina kaža, što ekanomiku treba astudžać, u čym jana, biezumoŭna, maje racyju», — kaža Lvoŭski.
Mienavita dziela taho, kab nie dapuskać pierahrevu ekanomiki i razhonu inflacyi, i adbyvajecca ŭžo treciaje ciaham hoda pavyšeńnie klučavoj staŭki. U lipieni jaje padniali z 16 da 18% hadavych, a ŭ vieraśni — da 19%. Ciapierašniaje pavyšeńnie da 21% stała rekordnym dla Rasii.
«Heta pakazvaje, što pierahreŭ sapraŭdy jość, što heta surjoznaja prablema, jakuju ekanamičnaje kiraŭnictva Rasii zaŭvažaje i sihnalizuje rynku, što maje namier zmahacca z hetaj prablemaj».
Źmiena pamieru staŭki refinansavańnia Centrabanka Rasii. Infahrafika RBK
Jak heta adabjecca na Biełarusi?
U vyniku, spažyvańnie ŭ Rasii budzie praciahvać źnižacca, što my ŭžo nazirajem u apošnija niekalki miesiacaŭ, kali biełaruski ekspart u RF pierastaŭ raści tymi ž tempami, jak ros da hetaha.
«Niekatoryja tavary ŭ RF stanuć daražejšymi, adpaviedna źmienšycca popyt u tym liku i na biełaruskija tavary. Tamu heta adabjecca i na Biełarusi, bo na dolu Rasijskaj Fiederacyi prypadaje bolš za 60% ekspartu», — źviartaje ŭvahu Lvoŭski.
Pry hetym, jak adznačaje ekanamist, kali padzialać biełaruski ekspart u RF na vajenny i nievajenny, to vajenny ekspart mocna nie pacierpić, bo Rasija maje namier tracić na vajnu ŭsio, što možna. U pieršuju čarhu pacierpić ekspart nievajenny.
Usio heta, na dumku ekanamista, budzie pryvodzić da taho, što rost VUP i zarobkaŭ u Biełarusi budzie zapavolvacca.
«Prahnozy na nastupny hod i biez hetaha nie nadta pazityŭnyja, ale paśla takich krokaŭ pryčyn dla aptymizmu zastajecca jašče mienš», — ličyć ekśpiert.
Ilustracyjny zdymak. Fota: «Naša Niva»
U Biełarusi prablemu admaŭlajuć
Aproč hetaha, Leŭ Lvoŭski źviartaje ŭvahu, što, u adroźnieńnie ad rasijskich čynoŭnikaŭ, biełaruskija nie tolki nie zaŭvažajuć taho, što biełaruskaja ekanomika taksama pierahretaja, ale i admaŭlajuć heta.
«U našaj ekanomicy adbyvajecca taki samy pierahreŭ, ale biełaruskija ekanamičnyja ŭłady jaho admaŭlajuć. Na fonie zajaŭ ad svaich rasijskich kaleh, takija pavodziny vyhladajuć usio bolš dziŭna. Jany va ŭsim raŭniajucca na Rasiju, ale tam staršynia Centrabanka kaža, što ŭ RF jość surjoznyja prablemy ź pierahrevam ekanomiki, što z hetym treba zmahacca.
Biełaruskija ŭłady nazirajuć tuju samuju karcinu, ale kažuć, što pierahrevu niama, što zmahacca niama z čym, što my praciahniem stymulavać ekanomiku», — źviartaje ŭvahu ekanamist.
Što ŭ biełaruskaj ekanomicy dobra, a što moža vybuchnuć? Adkazvaje ekanamist
Snapkoŭ pachvaliŭsia, što biełarusy ciapier zarablajuć rekordna šmat. Ci tak heta na samoj spravie?