Mininfarm «prosić» kniharaspaŭsiudnikaŭ samastojna pazbavicca ad «destruktyŭnaj» litaratury
Ministerstva infarmacyi 23 kastryčnika razasłała biełaruskim arhanizacyjam, jakija raspaŭsiudžvajuć drukavanyja vydańni, cyrkularny list z «prośbaj» samastojna pravieści ŭ svaim asartymiencie čystku, kab pazbavicca ad «litaratury, zdolnaj nanieści škodu nacyjanalnym intaresam Respubliki Biełaruś». Pry hetym akreśleńnie takoj litaratury — vielmi šyrokaje i niekankretnaje.
25.10.2024 / 19:30
U liście Mininfarm paviedamlaje, što viadzie pastajannuju pracu «pa vyjaŭleńni i niedapuščeńni raspaŭsiudžańnia destruktyŭnaj litaratury, jakaja ŭ tym liku ŭpłyvaje na duchoŭna-maralnuju śfieru jak na važny składnik nacyjanalnaj biaśpieki».
Pry hetym u ministerstvie viedajuć, što
«ŭ kniharniach, bujnych handlovych sietkach i internet-kramach majucca ŭ prodažy drukavanyja vydańni, jakija skažajuć histaryčnuju praŭdu i spraviadlivaść, prapahandujuć nietradycyjnyja seksualnyja adnosiny, relihijnuju nieciarpimaść, hvałt, žorstkaść i parnahrafiju, raspalvajuć varožaść i nianaviść, papularyzujuć nietradycyjnyja dla biełaruskaha hramadstva subkultury, a taksama vydańni pra pałavoje vychavańnie dziaciej, zdolnyja akazać niehatyŭny ŭpłyŭ na ich fizičnaje i psichičnaje raźvićcio, skazić ujaŭleńnie pra tradycyjnyja siamiejnyja kaštoŭnaści».
Dziela taho, «z metaj zachavańnia maralnych kaštoŭnaściaŭ biełaruskaha naroda», kiraŭnikoŭ adpaviednych ustanoŭ «prosiać»
«samastojna pravieści reviziju drukavanych vydańniaŭ, jakija realizujucca arhanizacyjaj, i vydalić z prodažu drukavanyja vydańni, raspaŭsiud jakich zdolny nanieści škodu nacyjanalnym intaresam Respubliki Biełaruś».
Chto vyšukvaje ŭ kramach i biblijatekach «ekstremisckuju» litaraturu?
«Ekstremisckuju litaraturu» składajem asobna». U biblijatekach rychtujucca da adkryćcia śpiecchranaŭ