Селётнім пераможцам прэміі Анемпадыстава стала кніга Насты Кудасавай і Святланы Дземідовіч
25 кастрычніка ў Бельску Падляшскім у Польшчы падчас фестывалю «Бардаўская восень» прайшла цырымонія ўзнагароджання прэміяй Міхала Анемпадыстава за найлепшую вокладку кнігі, выдадзенай у 2023 годзе. Пераможцамі сталі Святлана Дземідовіч і Лукаш Левандоўскі за вокладку кнігі Насты Кудасавай «Побач», паведамляе Беларускі ПЭН.
25.10.2024 / 21:51
Прэмія Дземідовіч і Левандоўскаму прысуджаная
«за графічнае адлюстраванне пачуццяў, што мы перажываем, і ўвасабленне паэтычнага свету ў адметных візуальных вобразах».
Вокладка кнігі Насты Кудасавай і Святланы Дземідовіч «Побач»
Сёлета на прэмію за найлепшую кніжную вокладку намінавалася 37 кніг. У кароткі спіс журы абрала 9 вокладак:
- Кацярына Пікірэня — вокладка кнігі «Анталогія паэтак: выбранае Вальжынай Морт»
- Сяргей Шабохін — вокладка кнігі Зінаіды Бандарынай «Да новага заўтра»
- Анатоль Лазар — вокладка кнігі Алеся Разанава «З маланкаю ў сэрцы»
- Кацярына Пікірэня — вокладка кнігі Мэіра Шалева «За сіняй гарой»
- Адам Паўлоўскі — вокладка кнігі Андрэя Сцепанюка «Зямля над белай ракой»
- Святлана Дземідовіч, Лукаш Левандоўскі — вокладка кнігі Насты Кудасавай, Святланы Дземідовіч «Побач»
- Сяргей Шабохін — вокладка кнігі Яўгеніі Пфляўмбаўм «Сонца»
- Сяргей Шаматульскі — вокладка кнігі Сяргея Лескеця «Шэпт»
- Артур Камароўскі, Ксенія Шталянкова — вокладка кнігі Артура Камароўскага «Corpus Vile»
Кароткі спіс абіраўся рэйтынгавым галасаваннем: сябры журы ацэньвалі кожную вокладку па дзесяцібальнай шкале, адзнакі сумаваліся.
Прэмія была заснаваная ў 2019 годзе ў памяць пра чалавека многіх талентаў — мастака, паэта, фатографа, дызайнера, публіцыста, культуролага Міхала Анемпадыстава.
Першым пераможцам прэміі стаў Грыгорый Кацнэльсон за вокладку кнігі «Віленскі покер» Рычарда Гавяліса. 2022 год стаў першым, калі прэмія праходзіла не ў Беларусі. Пераможцам тады стаў дызайнер Анатоль Лазар, які стварыў вокладку кнігі «(Не)расстраляныя» пра беларускіх культурных дзеячаў — ахвяр сталінскіх рэпрэсій. Узнагароду мінулага года атрымалі дызайнерка Яна Галушкіна і лічбавы архіў Veha.
Адроджаную прэмію «За свабоду думкі» атрымаў вядомы музычны гурт
Стаў вядомы шорт-ліст літаратурнай Прэміі Ежы Гедройця. Хто трапіў у выніковую шасцёрку?
Абвешчаныя поўныя спісы намінантаў прэміі імя Наталлі Арсенневай за 2022 і 2023 гады
Палітзняволены Максім Знак трапіў у шорт-ліст прэміі Цэнтра Вацлава Гавэла