Prajšła epocha. Kultavaja sacsietka Ask.fm spyniaje pracu
Płatforma adkazaŭ na ananimnyja i publičnyja pytańni, jakaja była dzika papularnaja ŭ pačatku 2010-ch, anansavała kančatkovaje spynieńnie pracy da kanca hetaha hoda. Voś u čym pryčyna takoha rašeńnia.
26.10.2024 / 19:03
Fota: Ask.fm
Ask.fm zakryjecca 1 śniežnia 2024 hoda, aficyjna paviedamili stvaralniki płatformy.
Pa ich słovach, heta rašeńnie abumoŭlena značnym źmianšeńniem kolkaści karystalnikaŭ.
«Na žal, naša płatforma bolš nie adpaviadaje patrebam sučasnych karystalnikaŭ sacyjalnych sietak. Paśla zachaplalnaha šlachu praciahłaściu bolš za 10 hadoŭ my vymušanyja paviedamić pra jaho zaviaršeńnie. Płatforma pytańniaŭ i adkazaŭ dla ananimnych razmoŭ spyniaje pracu z 1 śniežnia 2024 hoda.
Kali my zasnavali kampaniju, my vieryli ŭ ideju adkrytaj kamunikacyi i znosin praz pytańni, adkazy i ščyryja razmovy. My pieraadoleli niamała ciažkaściaŭ, kab harantavać, što płatforma zastajecca całkam biaśpiečnaj dla kožnaha karystalnika. Dziakuj usim tym, chto byŭ cikaŭnym, kab zadavać pytańni, i dastatkova śmiełym, kab adkazvać na ich ščyra», — napisali na sajcie płatformy jaje stvaralniki.
Administracyja sacsietki adznačyła, što pačynajučy z 24 kastryčnika 2024 hoda rehistracyi novych akaŭntaŭ bolš nie buduć dastupnyja. Adnačasova z hetym pastupova buduć vydalacca ŭsie asabistyja danyja z płatformy zhodna ź dziejnymi normami i patrabavańniami.
Nahadajem, što Ask.fm — heta sacyjalnaja sietka, stvoranaja amal 15 hadoŭ tamu ŭ Łatvii, dzie karystalniki mohuć zadavać adzin adnamu ananimnyja abo publičnyja pytańni, stvarajučy tym samym łancuh znosin i navat spabornictvy pamiž karystalnikami pa daścipnaści adkazaŭ. Płatforma była papularnaja ŭ mnohich krainach Jeŭropy i SND u pačatku 2010-ch hadoŭ, na joj možna było sačyć za siabrami abo cikavymi asobami i daviedvacca ich mierkavańni na roznyja temy.
Mienavita mahčymaść zadavać pytańni ananimna i pryciahvała bolš za ŭsio karystalnikaŭ u hetuju sacsietku, adnak heta ž časam stvarała na płatformie hlebu dla roskvitu kibierbulinhu.
Lehiendarny miesiendžar ICQ aficyjna spyniŭ pracu
Drobiazi ź minułaha i novaha žyćcia. Nastalhičny trend u biełaruskim tyktoku